Mark 16 - O Vatavata we Garaqa 1931 (Vanuatu)

¹ Naŋ o qoŋ mapsag me paso veta, wa i Meri o ta Magdala, tana i Meri raveven i James, ratol Salome, me tuvag moratol o gene punapuna ŋaŋ si ratol a mule a nonon ineia.

² Wa alo matava ran tape qoŋ tuwale talo wik, ratol we mule ma ape qaraŋ tamate, alo loa qara roworaka ti.

³ Wa ratol we varvava vires iratol wa si, Isei te wilreag mun natol o vat ape mate qaraŋa?

⁴ Naŋ ratol me ate kalo, we ilo si me wilreag veta o vat; ape we poa aneane.

⁵ Wa ratol me kalo pata ilo qaraŋa, we ilo o lumagav we pute ape matua, me saru goroa mun o siopa aqaga we tole; wa ratol we malarowo apena.

⁶ Naŋ ni me vet munratol wa, Nipea malarowo. Kamtol we sike i Jesus o ta Nasaret ilone, me woso teterpania ti; ni me tavaraka veta; ineia tagai iake. Ilo, o masaoi nake neira me saloa aia!

⁷ Panava tol toa kel, tol gaganag munra tiŋqoro anana wa mun i Peter si ni we tira moai kamiu i Galilea; kam te iloa aia tama ni me vet ti mun kamiu.

⁸ Naŋ ratol me rowolue gaplot me toa ran nan o qaraŋ tamate; ape o vararerere me ge ratol wa me tama munratol apena; wa ratol gate gaganag ilo munsei, ape ratol we gogogolo apena.

⁹ Naŋ ineia gina me tavaraka veta alo matava tape qoŋ tuwale talo wik, wa ni me ŋaŋalue amoa mun i Meri ta Magdala ni me vure lue ti nania o vui we tatas lavearua.

¹⁰ Wa o tavine ilone me mule mona at me gaganag munragai me togatoga ti amaia, neira we ruruŋtap wa we taŋtaŋ.

¹¹ Naŋ ragai me roŋotag si ni we esu, wa si ro gene ilone me iloa ti, pa neira gate nomtup ran apena.

¹² Naŋ o ine ŋaŋ me paso, ni me ŋaŋalue mulaŋ mun o tarapei we sea mun ragera pulrua tamaira alo we mulemule a matesala, we rowolue ilo utag.

¹³ Wa iragera mulaŋ me kel, me gaganag munragai qale toga; pa neira gate nomtup mulaŋ irara.

¹⁴ Paso nan ni me ŋaŋalue mun ra numei tuwale nane alo neira we risa ape ganagana, wa me gol vatanaura ape nor o nomqerqeret wa natoqara we wasvat, ape neira gate nomtup iragai me iloa ti me tavaraka veta.

¹⁵ Naŋ ti vet muneira wa, Tur mule at ilo marama nol, tur maŋasag o lea we wia munra gene tiŋ nol.

¹⁶ Isei qe nomtup, wa qe la o vasugroŋo, te vaesua; nava isei qe siriga te veveg qaloa.

¹⁷ Wa iloke ŋaŋ o vaglala te tataga rasei we nomtup; neira te vure lue o vui we tatas ŋaŋ alo sasak; neira te gatgato mun o liŋai we garaqa ŋaŋ;

¹⁸ neira te taur kalo o mata ŋaŋ; pa si neira qe ima o pei matemate tea tete ge manarasira; neira te taŋov ira gopae mun napanera wa neira te mauka apena.

¹⁹ Naŋ tamaine i Lord me vava paso muneira, me lav kaloa ivunana, wa ni me pute ape matuan God.

²⁰ Wa neira me rowolue, we toretore avea avea; pa i Lord we gagapalag saratuwale amaira, wa we rapai nor o vavae mun o vaglala ŋaŋ we tataga apena. Amen.