Mark 15 - O Vatavata we Garaqa 1931 (Vanuatu)

¹ Wa gaplot alo matava ira oloolo liwoa tara tamtamatua wa ira vatogo wa o vavtig veveg nol me nit saratuwale naliŋara, wa me rot i Jesus, we lavia at, qara ukegia mun Pilat.

² Naŋ i Pilat me varusia wa, Alova, iniko o Maranaga nora ta Judea? Naŋ ni me valui goroa ti vet wa, Ko me vava.

³ Naŋ ira oloolo liwoa me tila ineia ape gene we qoqo.

⁴ Naŋ i Pilat me varus mulaŋ ineia we vet wa, Ko tete valui goro ran? Ilo si neira we tila iniko ape savasava we qoqo.

⁵ Pa i Jesus gate valui ilo mulaŋ, o manigiu si i Pilat me mamakei apena.

⁶ Wa alo val lakalaka ni me ukeukeg mun neira i gene rot tuwale, isei neira qe paere.

⁷ Wa tuara tanun nasasana i Barabas, me rot tuwale neia tara ragai me rowovatur, pa alo we rowovatur me vus nawono.

⁸ Wa o sul qara awoawo raka, we paepaere munia ni ge tama vagae muneira.

⁹ Pa i Pilat me valui gorora, we vet wa, Kamiu we maros si na ukeg mun kamiu i Maranaga nora ta Judea?

¹⁰ Ape ni we gilala si ra oloolo liwoa me ukegia ma o manigiu o mata wolowolo.

¹¹ Naŋ ira oloolo liwoa me vasurat o sul, si a ukeg raka sage i Barabas muneira.

¹² Wa i Pilat me valui gorora mulaŋ, me vet wa, Pa kamiu we maros na ge o sava mun i gene kam we log si i Maranaga nora ta Judea?

¹³ Naŋ neira me log raka mulaŋ wa, Woso teterpania.

¹⁴ Pa i Pilat me vet muneira wa, Pa avea o gene kiskislag ni me ge? Naŋ neira me log gagarakae nan amoa wa, Woso teterpania.

¹⁵ Wa i Pilat we maros we ge lolowia o sul; wa ni me ukeg mamasa i Barabas mun neira, pa me towos paso i Jesus qara ukegia si a woso teterpania.

¹⁶ Wa ira soldier me vantakia ilo masao ima, naiman i governor nane, qara suware tuwale ma o vavtigiu nol.

¹⁷ Wa neira me saru goroa mun o siopa we sorsoroga, wa we vir o vilvilqat wolakaukau, wa me vil naqatuna nia.

¹⁸ Wa me qeteg wievavae ineia wa, We wia gai, Maranaga nora ta Judea!

¹⁹ Wa me vus naqatuna mun o togo, wa me anus avunana, wa me vatieqau we taqaloŋ goroa.

²⁰ Wa me poroporosag paso neia, neira me sarusavrag o siopa sorsoroga nania, wa me saru goro kelua mun non o siopa. Naŋ neira we vavtak luea at si a woso teterpania.

²¹ Wa o tuara me sur sala aia, i Simon ta Kurene, we van ma nan o utag, ineia taman i Aleksander tana i Rufus; wa neira me ge vavakae munia ni rig non o wolowolo.

²² Wa neira me takia at ilo vatine a Golgotha, we vava leas si, O tano qat tamate.

²³ Wa neira me la munia o wine me kal tuwale mun o mur sin un, pa ni gate la.

²⁴ Wa me woso teterpan paso neia, neira me aseg non o siopa, we map nor o vaglala apena, isei ni le o sava, wa isei ni le o sava.

²⁵ Wa o masao qoŋ ni tol me wesu; naŋ neira we woso teterpania.

²⁶ Wa me rave o rave vaglala neira me tila neia ti apena avunana, si, I MARANAGA NORA TA JUDEA.

²⁷ Wa neira me woso teterpan tuwale amaia o vuspal pulrua, tuwale ape matuana, wa o varuei ape galaona.

²⁸ Pa qara ge tira o raverave we vet si, Me vasogo tuwale neia amen ra ganganor.

²⁹ Wa irasei we sur sala we liŋasapuria, we gagamail naqatura, we vet wa, Ewe, i sese wora ima we roŋo, wa i tape kel alo qoŋ nitol!

³⁰ Ka vaesuko, ka siwo sur ma nan o wolowolo.

³¹ Tamaine mulaŋ ira oloolo liwoa me poroporosag, we varvava amen ra vatogo wa, Ni me vaesu ragai we sea, pa ni tete vaesu kelua lai.

³² I Christ i Maranaga nora Israel ni siwo ilokenake nan o wolowolo, si nina a ilo a nomtup. Wa rara ilone me wosoteterpan tuwale rara ti amaia, rara we vasvasir ineia.

³³ Wa o masao qoŋ laveteai me wesu, wa o siliga me gara goro o vanua nol gai niŋa ape masao qoŋ lavevatiu.

³⁴ Wa ape masaoi lavevatiu i Jesus me awo raka mun o liŋai we poa, we vava wa, Eloi, Eloi, lama sabakthani? pa we vava leas si, God inau, God inau, ape sava ko me toavtag inau?

³⁵ Wa o tuanira we tira rivtag we roŋotag we vet wa, Ilo, ni we loglog i Elia.

³⁶ Wa i tuara me valago me ge ura o maŋmaŋ pul mun o vinegar, me sisgag ape au, me sigag kalo munia sin un, we vet wa, Tiqa, nina ilo monina si i Elia te van ma te la sur neia si tagai.

³⁷ Naŋ i Jesus me log mun o liŋai we poa, qara mapsag mot.

³⁸ Wa o siopa nin goro ima we roŋo me masare maworarua, me sage me niŋa siwo.

³⁹ Wa i liwoa goro soldier melnol we tira rivtag we sar taniniga neia, me ilo si me awo raka wa me mapsag mot tamaine, me vet wa, We nun o tanun iloke Natun God.

⁴⁰ Naŋ o tuan tavine mulaŋ we sagsagarag aras, wa amaira i Meri o ta Magdala, tana i Meri raveven i James mantagai tana i Joses, wa i Salome;

⁴¹ wa neira me tatataga neia ti ni we togatoga a Galilea wa me gagapalag suria; wa o retavine we sea mulaŋ we qoqo me sage tuwale amaia ti i Jerusalem.

⁴² Naŋ me ravrav veta, wa o masao qoŋ gismamate, we moai nan o qoŋ mapsag,

⁴³ wa o manigiu ilone i Joseph o ta Arimathea we van ma, ineia iloke o tanun we liwoa tape vavtig veveg, wa ni me toga narnare o marana non God; ni me sov naapena, me kalo pata sur i Pilat, wa me paere naturian i Jesus.

⁴⁴ Naŋ i Pilat me mamakei si ni me mate veta; wa ni me log ma suria i liwoa goro soldier melnol, we varusia si ni me mate we tuai veta;

⁴⁵ pa i liwoa goro soldier melnol me ge lolomarania apena, wa ni qara la mamasa o tamate mun i Joseph.

⁴⁶ Naŋ ni me tuvag o siopa we aqaga, wa we la sur siwo ineia, we lolos goroa mun o siopa ilone, we saloa alo qaraŋ tamate, me tit raka ti alo nua; wa we tiwila o vat ape mate qaraŋ tamate.

⁴⁷ Wa i Meri ta Magdala tana i Meri raveven i Joses me iloilo monrara si me saloa avea.