Mark 14 - O Vatavata we Garaqa 1931 (Vanuatu)

¹ Naŋ o qoŋ nirua ti o rowolagau wa o lakalaka ape bread vatuga; wa ira oloolo liwoa tara vatogo ŋaŋ me sike si a tauria mun o galeva wa we ge mateia.

² Ape neira me vet wa, Nipea alo lakalaka, o sul wa matikotiko wun apena.

³ Wa alo ni we toga a Bethania alo iman i Simon i resresmavin, we risa ape ganagana, o tavine we mule ma mun o urai we tirotiroga alo wetov matevat, o gene tun; naŋ ni me ge wora o wetov wa me liŋ avune qatuna.

⁴ Naŋ nalolora o tuaniu qara anuanu vires neira apena, we vet wa, Ape sava me ge vanameag o urai iloke?

⁵ Ape me wol reag lai o urai iloke mun o som we qoqo nan melnol vaga tol apena, wa me la lai mun ra masara: wa neira me var vavavagia.

⁶ Naŋ i Jesus me vet wa, Ukeg roroŋo ineia; ape sava kamiu we vavagailea? Ni me gagapalag o gene we wia munau.

⁷ Ape o masara ŋaŋ we toga vagae amen kamiu, wa alo si kam qe maros kam te ge wia lai mun neira: pa inau na gate toga vagae amen kamiu.

⁸ Ni me ge nol o gene ni me ge lai; ni me van moai ma si a nonon naturiak ape qaraŋ tamate.

⁹ We nun na we vava mun kamiu wa, Te maŋasag valvanua o lea we wia alo marama nol, wa te kakakae aia ape gene ilone o tavine iloke me ge mona, mun namauluna.

¹⁰ Naŋ i Judas Iskariot, i tuwale iloke nanra numei nirua, me van at sur ra oloolo liwoa sin maniriŋ neia mun neira.

¹¹ Naŋ neira me roŋotag pa me qara apena, wa neira me ligog si a le o som munia. Naŋ ni me sike raka o masaoi we wia sin maniriŋ neia alolona.

¹² Naŋ alo qoŋ tuwale ape bread vatuga, ineira we vus mate o rowolagau alolona, ira tiŋqoro anana me vet munia wa, Ko we maros kamam a van a wurvag taurmate avea, si ko te gana o rowolagau aia?

¹³ Naŋ ni we vatraŋ at o tanun anana pulrua, we vet mun rara wa, Ura vano ilo laqlaqe vanua, wa o tanun we rig o tano pei te varniŋa ikamurua, pa ura tataga ineia.

¹⁴ Wa ni qe kalo pata ivea, ura vava mun o tagiima ilone wa, I Vatogo we vet si, Avea o ima tawu kamam ira tiŋqoro anak te gana o rowolagau aia?

¹⁵ Wa ni te gaganag mun kamurua o tawtawu ima we poa me wosalag matemate goro mun o epa, ura wurvag taurmate aia.

¹⁶ Naŋ ira tiŋqoro me rowolue, wa me kalo pata ilo laqlaqe vanua, wa me ilo qalo tama ni me gaganag ti mun rara; wa rara me wurvag taurmate o rowolagau.

¹⁷ Naŋ me ravrav veta, ni me van ma, tara o numei nirua.

¹⁸ Wa alo neira we risa wa we ganagana i Jesus me vet wa, We nun nau we vet mun kamiu wa, Si i tuwale tamen kamiu te maniriŋ nau, iloke gina we gana tuwale amen nau.

¹⁹ Naŋ o lolowono qara wonot raka neira, wa neira me varus tuwatuwale neia, we vet wa si, Inau? naŋ tuara wa si, Inau?

²⁰ Naŋ ni me valui gorora we vet wa, I tuwale nan ra numei nirua, kara we tuk tuwale ilo tapera.

²¹ We nun i Nat tanun we van at, tama me rave veta ti ape ineia: pa tur magarosa o tanun ilone namona we maniriŋ i Nat tanun! we wia ras munia si o tanun ilone gate wota ma.

²² Wa neira we ganagana, wa i Jesus me le o bread, wa me wievavae paso, we tuqe wora, we tirag mun neira, ti vet wa, Tur le momiu, tur gana; iloke naturiak.

²³ Wa ni me taur o lasa, wa me wievavae paso qara la at mun neira: wa ineira nol me ima alolona.

²⁴ Naŋ ni me vava mun neira wa, Iloke nanarak tape vatavata we garaqa we ge sale ape tanun tar.

²⁵ We nun nau we vet mun kamiu wa, Na tete ima mulaŋ o lig wo vine, gai niŋa o qoŋ ilone na te ima we garaqa alo marana non God.

²⁶ Naŋ me sur paso o as, neira me van lue i tauwe Olivet.

²⁷ Naŋ i Jesus we vet mun neira wa, Kamiu nol te tutuag ape nau qarig alo qoŋ: ape me rave veta was, Na te vus i altag goro sheep, wa o sheep ŋaŋ te salsaleŋa apena.

²⁸ Pa na me tavaraka paso, nau qara tira moai kamiu i Galilea.

²⁹ Naŋ i Peter me vet wa, Si ta ge tutuagira nol, pa inau tagai.

³⁰ Naŋ i Jesus me vet munia wa, We nun na we vet muniko wa si, Qarig, alo qoŋ ran nake iloke, o toa gate kokorako vagarua tiqa, ko te tala inau vagatol.

³¹ Pa ni me vava gagarakae nan amoa wa, Si na te mate ran amaiko apena, na tete tala ilo iniko. Pa neira nol me vava tamaine.

³² Naŋ neira we va niŋa o vatine we log a Gethsemane, wa ni we vava mun ra tiŋqoro anana wa, Tur pute siwo iake, wa na te tataro.

³³ Naŋ ni me lav sea i Peter, wa i James, wa i John, wa me tama munia mun o ganawono we qisaŋia.

³⁴ Naŋ ni me vava mun ratol wa, Nalolok we wono aneane ape matea; tol toga iake; tol mamata goro.

³⁵ Naŋ ni me vano at gate asau nan ratol, wa me mas siwo alo tano, me tataro, si ta lai o masao qoŋ ilone te rowo reag nania.

³⁶ Naŋ ni me vet wa, Aba, Mama, o savasava ŋaŋ te lai muniko; Ka lareag o lasa iloke nan nau, pa nava nipea tama nau we maros nava tama ko we maros.

³⁷ Naŋ ni me vano ma we ilo ratol we matur, we vet mun i Peter wa, Simon, ka matur? Ko tete mamata lai o masao qoŋ tuwale?

³⁸ Tol mamata, tol tataro, kamtol wa van pata ilo meregale: we nun o tinegaro alo atai, pa o visogoi we mageregere.

³⁹ Wa ni me van at mulaŋ, me tataro, we vava mulaŋ o vavae ilone nane.

⁴⁰ Naŋ ni me van kel ma we ilo ratol we matur kel, ape namataratol we mava aneane, wa ratol gate gilala o sava ratol te valui goro munia.

⁴¹ Naŋ ni me van vagatoliu ma sur ratol we vet wa, Tol matur nake iloke, tol mapsag kamtol; me paso, o masao qoŋ me wesu; ilo, me maniriŋ veta i Nat tanun ilo panera ganganor.

⁴² Tavaraka, inina vano: ilo, i gene we maniriŋ nau me rasu veta ma.

⁴³ Wa gaplot alo ni qale vava, i Judas, i tuwale nan ra numei nirua, we van ma wa o sul we qoqo amaia, mun o gasal wa o kere ŋaŋ, nanra oloolo liwoa tara vatogo wa ira tamtamatua ŋaŋ.

⁴⁴ Naŋ i gene we maniriŋia me la veta o vaglala mun neira, me vet wa, Isei na te nimnimia, ineia gina; tur tauria, tur lav mantagia at.

⁴⁵ Naŋ ni me va niŋa ma, me van taso ma suria, we vet wa, Rabi, Rabi, wa me nimnimia.

⁴⁶ Naŋ neira me map napanera avunana, me taur varagetia.

⁴⁷ Naŋ tuwale nan neira me tira ti aia me naŋalue non o gasal, wa me vus o tanun anan i moe oloolo, me pura savrag naqorona.

⁴⁸ Naŋ i Jesus me valui goro ra me vet wa, Kam me rowolue ma tama goro o vus palu mun o gasal wa o kere ŋaŋ si a taur nau?

⁴⁹ Na me toga valqoŋ amen kamiu alo vatine we roŋo we vatvatogo, wa kam gate taur varaget nau: pa si o raverave ŋaŋ a tira apena.

⁵⁰ Naŋ neira nol me toavtagia, me valago nan.

⁵¹ Naŋ o tuara lumagav me tataga ineia ti, me viog goro naturiana mamasa mun o siopa we aqaga, wa neira we takulia.

⁵² Naŋ ni me rowo vitag o siopa me toa mamasa nan neira.

⁵³ Naŋ neira me vantak i Jesus sur i moe oloolo; naŋ we vug tuwale amaia ira oloolo liwoa nol, wa ira vatogo ŋaŋ, tara tamtamatua ŋaŋ.

⁵⁴ Naŋ i Peter me tataga ineia ma ti aras, me niŋa pata ilo masao iman i moe oloolo: wa ni we pute tuwale amaira tanun gagapalag, wa we masmasil alo valawar av.

⁵⁵ Naŋ ira oloolo liwoa ŋaŋ, wa o vavtig veveg nol me sikesike o tila apen i Jesus si neira a na mateia, pa gate ilo ran.

⁵⁶ Apen rasei we qoqo me tila galegale ape neia, pa nor o tila ŋaŋ gate sasarita tuwale.

⁵⁷ Naŋ o tuan tanun me tavaraka we tila galegale ineia, we vava wa,

⁵⁸ Kamam me roŋotag ni we vet wa, Na te sese savrag o ima we roŋo iloke o tano pane tanun, wa alo qoŋ nitol na te taur o varuei gate tano pane tanun.

⁵⁹ Pa tamaine mulaŋ nor o tila gate sasarita tuwale.

⁶⁰ Naŋ i moe oloolo me tavaraka alo vatitnara we varus i Jesus wa, Ko tete valui goro tea? O sava iloke neira we tila apeniko?

⁶¹ Pa ni me toga roroŋo, wa gate valui goro tea. O moe oloolo qara varusia mulaŋ we vet wa, Iniko i Christ, Natun i gene we toga wievavae?

⁶² Naŋ i Jesus wa, Inau; wa kamiu te ilo aŋaisa i Nat tanun we pute ape pane matua we mana, we van ma alo maligo ŋaŋ tavunana.

⁶³ Wa i moe oloolo qara sare non o siopa ŋaŋ, we vet wa, Nina maros mulaŋ ira gaganag we tira ape sava?

⁶⁴ Kamiu me roŋotag momiu o vava nawono; o sava kam we nonom apena? Wa neira nol me vevegia si we tira ape matea.

⁶⁵ Naŋ o tuaniu qara qeteg anus avunana, wa we lil goro nanagona, wa we wosawosa ineia we vet munia wa, Ka ligoligog; wa ira gagapalag ŋaŋ we lavia we towotowosia.

⁶⁶ Naŋ i Peter qale toga i siwo alo masao ima, o tuara malamala anan i moe oloolo we van ma.

⁶⁷ Naŋ ni we ilo i Peter we masil goro o av, wa ni we matag neia, qara vet wa, Pa iniko mulaŋ amen o ta Nasaret, i Jesus nake.

⁶⁸ Pa ni me tala, ti vet wa, Na gate gilala, na gate lolomaran o sava ko we vava. Naŋ ni qara rowo lue ilo malmaluima, wa o toa ti kokorako.

⁶⁹ Wa o malamala me ilo ineia, qara vava raka mulaŋ mun neira we tira aia, wa, Pa iloke tuwale nan neira.

⁷⁰ Pa ni me tala mulaŋ. Galewora iragai we tira aia we vet mulaŋ mun i Peter wa, Alova, iniko i tuwale nan neira, ape iniko o ta Galilea, wa naliŋama we tamaine.

⁷¹ Naŋ ni qara vasir raka, we vava vagogonag si, Na gate gilala ran o tanun iloke kam we vava apena.

⁷² Wa o toa qara kokorako vagarua ma. Naŋ i Peter qara lolomaran kel o vavae i Jesus me vet ti munia was, O toa tete kokorako vagarua tiqa, ko gai tala inau vagatol. Naŋ ni me nonomkel apena wa me taŋi.