Mark 13 - O Vatavata we Garaqa 1931 (Vanuatu)

¹ Naŋ alo ni we rowolue nan o vatine we roŋo, o tuara tiŋqoro anana we vava munia wa, Vatogo, ilo, o vatvat we poapoa, wa o geara ŋaŋ we poapoa tama avea!

² Naŋ i Jesus me valuia we vava munia wa, Ko we sagarag gai o geara ŋaŋ we liwoa iloke? Tete tivtag tea iake o vat avune vat, wa gate sese savrag siwo.

³ Naŋ ni we putepute a tauwe Olivet, we sar taniniga o vatine we roŋo, wa i Peter, tana i James, ratol John, wa i Andrew, we varusia asau, wa si,

⁴ Si ka gaganag mun kamam, o gene ŋaŋ ilone te wesu aŋaisa? wa o sava o vaglala alo gene nol ilone te qeteg wesu vunvun?

⁵ Pa i Jesus me valui gorora, we qeteg vava si, Tur nonom apena nan sei wa valera ikamiu.

⁶ Ape we qoqo te mule ma alo sasak, we vava si, Inau ma; wa te valeraira we qoqo.

⁷ Pa alo ikamiu te roŋotag ape vagalo ŋaŋ wa o roro vagalo ŋaŋ, turpea matikotiko apena. Tete ava lai pa te tamaine; nava o ulusui tagai tiqa.

⁸ Ape o sul te tavaraka goro o sul, wa o marana goro o marana; wa o rir ŋaŋ te rir alo tuan vanua, wa o maro wa o mataka te qeteg raka. O qeteg vivtig iloke ŋaŋ nake.

⁹ Pa tur nonom momiu apena. Neira te ukeg vano kamiu ilo vavtig veveg ŋaŋ, wa te towtowos kamiu alo ima siwo tuwale ŋaŋ, wa te vatira kamiu goro nanagora governor tara maranaga ŋaŋ o manigiu inau, mun vaglala muneira.

¹⁰ Wa me vet si a maŋasag amoa o lea we wia mun o veve sul nol.

¹¹ Nava alo si neira qe rave kamiu aŋaisa, wa we ukeg vano kamiu mun o veveg, turpea nom teqateqa amoa si kamiu te vava o sava, wa turpea nom vasarig apena. Panava o sava tea ta ukeg ma sur kamiu alo masao qoŋ ilone, tur vava lue ilone. Ape gate kamiu we vavava nava o Vui we Roŋo.

¹² Wa o tasiu te ukeg vano i tasina ilo matea, wa o mama i natuna: wa o nanatui te tavaraka goro ira tamara tara ravevera wa te ge mateira:

¹³ wa ikamiu ira gene soŋus amaira o tanun sul o manigiu nasasak; nava isei ta roŋo maul gai niŋa o ulusui, te ge esu i gene ilone apena.

¹⁴ Nava alo si kam qe ilo o gene vasigtag te ge wou, we tira alo masaoi gate wia sin tira aia (pa i gene qe vasvasogo ni lolomaran apena), alo ine nane irasei ŋaŋ ta toga a Judea neira totoa i tauwe ŋaŋ.

¹⁵ Wa i gene ta toga avune ima nipea taqel siwo ilo ima, wa nipea kalo pata sin taur reag o sava nan alele imana;

¹⁶ wa i gene me sage veta ilo utag, nipea vusiag kel sin taur kalo non o siopa.

¹⁷ Pa tur magarosa iraro gene we tiana, tara raro gene o natmera amaira ape sus alo qoŋ ŋaŋ ilone!

¹⁸ Wa tur tataro nan nomiu o qoŋ toatoa wa wesu alo rara.

¹⁹ O manigiu o qoŋ ŋaŋ ilone o ganawono ran, wa gate sasarita tiqa apena nan o qeteg gene tiŋ ŋaŋ amon God me tiŋ mona ti, gai niŋa ma iloke nake, wa tete lai ran mulaŋ aŋaisa.

²⁰ Wa si i Lord ta tete vakokot o qoŋ ŋaŋ ilone o visogoi nol tete esu lai apena; nava o manigiu ira iloraka ni me ilorakatira ti ni me vakokot veta o qoŋ ŋaŋ ilone.

²¹ Wa alo ine nane si sei qe vet mun kamiu wa si, Ilo, iloke i Christ nake; si, Ilo, ilone; turpea nomtupua.

²² Ape ira Christ galegale tara prophet galegale te tira raka, wa te la vano o vaglala ŋaŋ wa o vasasa ŋaŋ si a valera ran, si ta lai, ira iloraka mulaŋ.

²³ Pa ikamiu, tur nonom momiu apena. Ilo, na me gaganag amoa o gene nol ŋaŋ mun kamiu.

²⁴ Nava alo qoŋ ŋaŋ ilone, o ganawono ilone me paso veta, wa te qara siliga goro o loa, wa o vula tete ukeg nasarina ma;

²⁵ wa o vitu ŋaŋ te masmas siwo ma alo tuka, wa o gene mana ŋaŋ ta vawo tuka te mariŋoriŋo.

²⁶ Naŋ alo ine nane neira te ilo mora i Nat tanun we mule ma alo maligo ŋaŋ mun o vavakae liwoa wa o leŋas.

²⁷ Wa alo ine ni te vatraŋ ira angel anana at, wa neira te vile tuwale ira iloraka ŋaŋ anana nan o matelaŋ nivat, nan o qeteg marama ma gai niŋa ape ulus tuka.

²⁸ Pa tur lolomaran o vavae tenegag iloke ape fig; alo si o salitiu qe qeteg quloquloga, wa ti awisiga raka, kamiu we gilala momiu si o magoto arivtag ma,

²⁹ wa ikamiu gina tamaine, alo si kamiu qe ilo o gene ŋaŋ iloke we qeteg raka, tur gilala si neia me rasu veta ma ape mateima.

³⁰ We nun na we vet mun kamiu wa, O taraŋiu iloke tete sarapun lai o gene nol ŋaŋ iloke gai wesu.

³¹ O tuka wa o tano te sarapun: nava nok o vavae ŋaŋ tete sarapun ilo lai.

³² Panava ape qoŋ nane ilone wa o masao qoŋ ilone itagai isei tuwale we gilala apena, gate ira angel ŋaŋ mulaŋ we tavunana, wa gate o Natui mulaŋ, nava o Mama.

³³ Tur nonom momiu apena, tur mamata maran, wa tur tatataro; ape kamiu gate gilala ape masao qoŋ ilone si aŋaisa.

³⁴ We tama o tanun me mule ti te vanua, wa me tivtag naimana ti, wa me maukeg o liwoa goro munra rowrowovag anana ti, wa munsei munsei non o gagapalag, wa me vareg mun i ilogoro mateima sin mamata goro.

³⁵ Pa kamiu tur mamata goro momiu apena; ape kamiu gate gilala si o tagiima we kel ma alo masaoi tama avea, si alo ravrav, si alo tine qoŋ, si alo toa ti kokorako, si alo matava ran;

³⁶ nan ni wa kel malarowo ma, wa we ilo suar kamiu we matmatur.

³⁷ Wa iloke na we vava mun kamiu, wa na we vava munrasei nol si, Tur mamata goro.