Mark 11 - O Vatavata we Garaqa 1931 (Vanuatu)

¹ Naŋ alo neira we rivtag Jerusalem, a Bethphage veta wa a Bethania ape tauwe Olivet, ni we vatraŋ at o tiŋqoro anana pulrua, ti vet mun rara wa,

² Ura mule at ilo vutre vanua we sar taniniga kamurua; wa rigrig kamurua we mule pata ilolona kamurua te ilo suar o nati ass me ligo vataqav veta; isei gate pute ilo tiqa avunana; ura mamasug, wa ura lavia ma.

³ Pa si sei qe vava mun kamurua wa si, Apesava kamurua we ge tamaike? ura vava si, I Lord we maros ranua; wa rigrig ni te vatraŋ kelua ma iake.

⁴ Naŋ rara me mule at, wa we ilo suar o nati ass me ligo vataqav ape mateima a varea alo matesala we tawela, wa rara we mamasug.

⁵ Naŋ o tuan ragai we tiratira aia me vet mun rara wa, Kamurua we ge o sava, we mamasug o nati ass?

⁶ Wa irara me vava muneira tama i Jesus me vareg ti munrara apena; wa neira we maukeg mun rara.

⁷ Naŋ rara we lav o nati ass sur Jesus, wa we savrag kalo ivunana nor o siopa ŋaŋ, wa ni me pute avunana.

⁸ Wa we qoqo me lilŋag nor o siopa alo matesala; wa o tuaniu mulaŋ me tara o wotiu alo tantangae ŋaŋ, wa we vear goro o matesala nia.

⁹ Wa irasei we tira moai, tarasei we tataga a tagir we awoawo we vava si, Hosana; tur wievavae i gene we mule ma alo sasan Lord.

¹⁰ Turwia o marana we mule ma alo sasan i Lord, anon tamanina i David nane; Hosana vawo tuka.

¹¹ Naŋ i Jesus me mule pata i Jerusalem, wa ilo vatine we roŋo; wa me ate kelkel paso avune gene ŋaŋ, ape o masao ravrav me wesu veta, ni me rowolue kel i Bethania, tara numei nirua amaia.

¹² Naŋ a tavala maran, neira me rowolue nan o Bethania, wa ni me maliŋsala;

¹³ wa ni we ilo o fig aras, o naunaui apena, wa ni me mule sin ilo suar wun o sava avunana: nava me niŋa veta apena, ni gate ilo o sava, nava vires naunaui; o manigiu o tau fig tagai tiqa.

¹⁴ Naŋ i Jesus me valui goro, me vava munia wa, Nipea o tanun a gana o woai naniko aŋaisa ti tuai ti tuai. Wa ira tiŋqoro anana me roŋotag mora.

¹⁵ Naŋ neira we niŋa Jerusalem; wa i Jesus me mule pata ilo vatine we roŋo, me qeteg vure lue irasei we tuvatuvag wa irasei we wolwol alo vatine we roŋo, wa me wil tapeliŋ o tano som norasei we valvalete, wa o tano putepute ŋaŋ norasei we wolwol qona.

¹⁶ Wa ni gate ukeg isei sin mule raveaglue o vatine we roŋo vag o tapera.

¹⁷ Naŋ ni me vatogo raka, ti vet muneira wa si, Gate rave veta si, Te loglog naimak o ima tataro mun o veve sul nol? nava kamiu me ge mun liara vuspal.

¹⁸ Pa ira vatvatogo tara oloolo liwoa me roŋotag mora, wa me sike raka neira te ge tagea tama avea ineia. Ape neira me gogoloa, o manigiu o sul nol we mamakei lava ape non o vatvatogo.

¹⁹ Naŋ ti ravrav siwo, wa ni we roworowolue at nan o laqlaqe vanua.

²⁰ Naŋ a tavala maran alo neira we mulemule taso, neira me ilo mora o fig ilone me kor veta alo garina kalo ma.

²¹ Naŋ i Peter we lolomaran kel apena we vava munia wa, Rabi, ilo, o fig ko me vivnag ti me kor veta.

²² Naŋ i Jesus me valuia ti vet muneira wa, Tur taur momiu o nomtup apen God.

²³ Ape we nun na we vava mun kamiu si, Valsei qe vet mun o tauwe iloke si, Te sau kalo ko, wa te savragiko ilo lama; wa sin qe tete nomvaruarua alo toqana apena, nava we nomtup si o gene ŋaŋ ni we vet apena te ge ran, o sava tea ni ta vava apena te lai munia.

²⁴ O manigiu o ine na we vet mun kamiu wa, O savasava ŋaŋ kamiu te paere alo tataro, tur nomtup si kamiu we taur momiu, wa te lai mun kamiu.

²⁵ Wa alo si kam qe tira we tataro, tur nomvitag si o manigiu tea tapena amensei; si i Tamamiu mulaŋ we tavunana a nomvitag napugamiu mun kamiu.

²⁶ Nava si kam qe tete nomvitag momiu, i Tamamiu mulaŋ we tavunana tete nomvitag napugamiu.

²⁷ Naŋ neira we niŋa mulaŋ i Jerusalem; wa alo ni we mule kelkel alo vatine we roŋo, ira moe oloolo tara vatvatogo, tara tamtamaragai mulaŋ, we mule ma suria,

²⁸ we vava munia wa si, Ko we gege tamaike mun o mana ta avea? wa isei me la muniko o mana iloke si ka ge tamaike?

²⁹ Pa i Jesus me valui goro we vava muneira wa, Wa inau mulaŋ na te varus mok kamiu o vavae tuwale, wa tur valui goro inau; wa paso nan na te gaganag mun kamiu si na we ge o ike ŋaŋ mun o mana ta avea.

³⁰ O vasugroŋo mon John, we ta vunana ma, si ma nan o tanun? Tur valui goro inau.

³¹ Naŋ neira me varvava vires neira, we vet si, Nina ta vava si, Ta vunana ma; ni te varus wa si, Apesa kamiu gate nomtupua?

³² Pa si nina ta vava si, Ma nan o tanun — pa neira me gogolo o sul; ape neira nol me nonom apen i John si o prophet ran.

³³ Naŋ neira me valui, we vet mun Jesus wa, Kamam gate gilala. Wa i Jesus we valui we vet muneira wa, Wa inau mulaŋ, na gate gaganag mun kamiu si mun o mana ta avea nau we gege o ike ŋaŋ.