Mark 10 - O Vatavata we Garaqa 1931 (Vanuatu)

¹ Naŋ ni me tavaraka nan o vatine, wa me niŋa o tiŋgoro vanua a Judea, wa a tavala Jordan kel rowo. Wa o sul ŋaŋ mulaŋ we rowolue tuwale ma suria; wa tama naliŋana nane ni me qeteg vatvatogo mulaŋ ineira.

² Naŋ ira Pharise me mule ma suria, we varusia wa si, We tira ape lea si o tanun te ukeg savrag lai i rasoana? pa neira we gale iloa.

³ Naŋ ni me valuira, we vava wa, Pa o sava i Moses me vatraŋ kamiu apena?

⁴ Naŋ neira wa, I Moses me maukeg apena si a rave o raverave gevtag, wa si a ukeg savragia.

⁵ Pa naŋ i Jesus me valui gorora we vet wa si, Ni me rave o vavae vatogo ilone mun kamiu we sasarita ape toqamiu we wasvat;

⁶ nava alo qeteg tiŋiva ma God me tiŋ neira o mereata wa o tavine.

⁷ Wa o manigiu o ike o tanun te toavtag i tamana tana ravevena, wa te kata apen rasoana,

⁸ wa irara rua te mun visogoi tuwale. O manigiu si gate irara rua mulaŋ nake, nava o visogoi tuwale.

⁹ Wa si ta tamaine, o sava God me vile tuwale ti, nipea o tanun a vilewora.

¹⁰ Naŋ ira tiŋqoro anana me varusia mulaŋ alo ima ape gene tuwale ilone.

¹¹ Naŋ ti vet muneira wa si, Isei qe ukeg savrag rasoana wa qe lag o tavine we sea, we pakapaka ape neia.

¹² Wa alo si o tavine qe ukeg savrag i rasoana, wa qe lag amen o mereata we sea, ni we pakapaka.

¹³ Naŋ neira me lav ma suria o natmera ŋaŋ sin taŋovira, pa ira tiŋqoro me ŋorov goro ragai me lavira ma ti.

¹⁴ Nava i Jesus me ilo, we loloanu apena, wa we vet muneira wa, Tur ukeg ira natmera si a mule ma sur nau, wa turpea ge gorora apena; ape o marana non God norasei we tama ineira.

¹⁵ We nun nau we vava mun kamiu wa, Si isei qe tete la mona o marana non God tama o natmera, ni tete mule pata lai ilolona.

¹⁶ Wa ni me garovag gorora, me taŋovira, me wievavae neira.

¹⁷ Naŋ ni me rowolue ilo matesala, wa o tuara tanun me valago ma suria, we vatieqau goroa, we varusia wa, Vatogo we wia, o sava na te ge si na taur usurag mok o esu galava?

¹⁸ Naŋ i Jesus me vet munia wa, Ape sava ko we log nau si nau we wia? Itagai isei we wia, nava i tuwale ran, i God nane.

¹⁹ Ko we gilala o lea vatraŋ ŋaŋ wa si, Nipea pakapaka, Nipea vus nawono, Nipea palpal, Nipea tila galegale, Nipea gogoroi napulansei, Ka nom mava i tamama tana ravevema.

²⁰ Pa ni me valui goroa, ti vet wa, Vatogo, na me matagisgis goro veta o ine ŋaŋ nol alo reremera ma.

²¹ Naŋ i Jesus we sagaragia, we marosia, wa ti vet munia wa, Pa i tuwale te qale valuava muniko, mule at, wolreag napulama ŋaŋ, wa ka tirag munra masara, wa ko te taur moma o tar valeŋaleŋa avunana; wa ka mule ma, taur kalo nom o wolowolo, tataga inau.

²² Wa nanagona me maŋitŋit ape vavae ilone, wa ni me toa kel mun o lolowono; ape napulana we qoqo amaia.

²³ Naŋ i Jesus we ateate kelkel, ti vet munra tiŋqoro anana wa, We gona tam avea munra meresavasava si neira kalo pata lai ilo marana non God!

²⁴ Wa ira tiŋqoro me mamakei aneane ape non o vavae. Naŋ i Jesus we valui mulaŋ, we vet muneira wa si, Ra nanatuk, we gona gai tam avea mun rasei we sov ape pular o savasava si a kalo pata ilo marana non God.

²⁵ We togawora si o kamel a kalo raveaglue o mate nidel, nan si o meresom a kalo pata ilo marana non God.

²⁶ Pa neira we mamakei raka sage, we varvava vires neira, wa si, Pa te vaesu lai isei?

²⁷ Nava i Jesus me sagaragira we vet si, Amen o tanun tete lai ran, nava amen God te lai; ape o savasava ŋaŋ te lai ran amen God.

²⁸ Naŋ i Peter me vava raka munia si, Ilo, kamam me toavtag veta momam o savasava ŋaŋ, wa me tataga iniko.

²⁹ Wa i Jesus me valui goro we vava wa, We nun na we vava mun kamiu si, Itagai qalo o tanun me toavtag o ima, si o retatasiu, si o retutuai, si o mama, si o veve, si o rasoai, si o nanatui, si o utag, o manigiu inau wa o lea we wia,

³⁰ pa ni te taur sal mona vaga melnol iloke nake alo masaoi nake iloke, o ima ŋaŋ, wa o retatasiu, wa o retutuai, wa o raveve, wa nanatui ŋaŋ, wa o utag, pa mun o kos gap mulaŋ ineia, wa o esu galava alo marama te rasu ma.

³¹ Nava we qoqo me moai ti te tagir aŋaisa, wa me tagir ti pa te moai.

³² Naŋ neira me mulemule a matesala we kalo i Jerusalem; wa i Jesus we tira moai neira, wa neira we mamakei raka, wa we tataga gogogolo ineia. Wa ni me lav asau mulaŋ ira numei nirua, we qeteg gaganag muneira o gene ŋaŋ te wesu ma aŋaisa suria,

³³ wa si, Ilo, nina we mule kalo i Jerusalem, wa te ukeg vano i Nat tanun munra oloolo liwoa tara vatvatago, wa neira te veveg qaloa, wa te ukeg vanoa mun o sul ŋaŋ we sea;

³⁴ wa neira te porosagia, wa te anus avunana, wa te towosia, wa te ge mateia; wa alo qoŋ vatoliu ni te tavaraka kel.

³⁵ Naŋ i James tana i John, ira natun i Sebede, we va niŋa ineia we vet si, Vatogo, kara we maros si ka ge mun kara o gene tea ikara ta paere muniko apena.

³⁶ Naŋ ni me vet munrara wa, Pa kamurua we maros si na ge o sava mun kamurua?

³⁷ Naŋ rara me vava munia wa si, Ka la mun kara si kara a pute, i tuwale ape matuama, wa i tuara ape galaoma, alo leŋasima.

³⁸ Pa i Jesus me vet munrara wa, Kamurua gate gilala kamurua we paere o sava. Kamurua we ima lai o lasa na we ima maksa? wa we la momiu lai o vasugroŋo te vasugroŋo nau nia?

³⁹ Naŋ rara munia wa, We lai ran. Wa i Jesus me vet munrara wa, O lasa na we ima maksa kamurua te ima mamurua aŋaisa: wa o vasugroŋo we vasugroŋo inau nia kamurua te la momurua aŋaisa;

⁴⁰ nava si a pute ape matuak si ape galaok gate amok si na la at, nava munrasei me ge taurmate veta ti muneira.

⁴¹ Naŋ ira saŋavul tuwale me roŋotag mora apena, wa me qeteg loloanuanu apen i James tana i John.

⁴² Nava i Jesus me suware neira ma suria, ti vet muneira wa, Kamiu we gilala si rasei we nonom si we moai goro o veve sul ŋaŋ we toga maranaga gorora; wa irasei we liwoa amaira we mana gorora.

⁴³ Nava tete tamaine amen kamiu; nava isei ta maros we qeteg liwoa amen kamiu, ni te rowrowovag mun kamiu.

⁴⁴ Wa isei ta maros we moai amen kamiu, ni te mawmawuitag mun kamiu nol.

⁴⁵ O manigiu i Nat tanun gina gate mule ma si rasei a rowrowovag munia, nava sin rowrowovag muneira, wa sin ukeg naesuna o tapetape goro tanun tar.

⁴⁶ Naŋ neira we niŋa siwo i Jeriko; wa alo ni we rowolue nan o Jeriko, tara tiŋqoro anana wa o sul we qoqo, i natun Timeus, i Bartimeus, o matapei, we pute pan matesala, ti valapaere.

⁴⁷ Naŋ ni me roŋotag si i Jesus ta Nasaret iloke, wa ti qeteg awoawo, ti vava si, Natun David, Jesus, ka magarosa inau.

⁴⁸ Naŋ neira we qoqo me ŋorov goroa sin toga roroŋo; nava ni me awoawo raka sage nan amoa si, Natun David, ka magarosa inau.

⁴⁹ Naŋ i Jesus me tira late me vet si a logia ma; wa neira we loglog i matapei ma, we vava munia wa, Ka sov naapema; tavaraka gai, ni we loglogiko.

⁵⁰ Wa ni me savrag non o vioviog, me tira raka, me mule sur i Jesus.

⁵¹ Naŋ i Jesus ti vet munia wa, O sava ko we maros si na ge muniko? Naŋ i matapei me vet munia wa si, Raboni, si na ilo kel.

⁵² Wa i Jesus me vet munia wa, Mule at, nom o nomtup me vaesuko. Naŋ ni me ilo kel gaplot, wa qara tataga i Jesus alo matesala.