O LEA WE WIA TAMA NAMON LUK ME RAVE 9 - O Vatavata we Garaqa 1931 (Vanuatu)

¹ Naŋ ni me suware tuwale ma ira numei nirua, ti le mun neira o vavakae wa o mana goro o vui we tatas nol wa si a ge tagea o gopae ŋaŋ.

² Wa ni me vatraŋira at neira maŋasag lue o marana non God, wa a ge esu ra gopae.

³ Naŋ ni me vava mun neira wa, Turpea lele momiu o sava ape vanoga, nipea o qat tigo, si o tapera, si o sinaga, si o som, wa nipea o siopa niruarua.

⁴ Wa si kamiu qe mule pata ilo sava ima, tur toga aia, wa tur rowo lue at aia.

⁵ Wa irasei ta tete lav vasgot kamiu, alo kam te rowo lue nan o laqlaqe vanua ilone, tur neneŋag savrag o wuwue tano nan naraŋomiu mun vaglala mun neira.

⁶ Naŋ neira me gisraka, we mule sir vanua we gaganag o lea we wia, we ge esura varseseg o vanua.

⁷ Wa i Herod i tetrark me roŋotag o savasava nol me ge ti; wa me tama munia, ape tuan tanun we vava was, I John me tavaraka kel nan ra mate.

⁸ Wa o tuaniu me vava was, I Elia me ŋaŋa lue ma, wa o tuaniu me vava was, I tuarasei o prophet we tuai me tavaraka kel.

⁹ Naŋ i Herod me vava wa, Nau me sal mot naqatun i John: pa isei iloke nau we roŋotag o savasava ŋaŋ tamaike ape neia? Wa ni me gege ilo sin iloa.

¹⁰ Naŋ ira sala me vusiag kel ma, me gaganag munia o savasava ŋaŋ neira me ge ti. Naŋ ti lav neira, ti sirig asau, ape laqlaqe vanua o sasai Bethsaida.

¹¹ Naŋ o sul me gilala apena, me tataga neia, wa ni me lavira, ti vava mun neira ape marana non God, wa ti vaesu ra gopae we maros ran sin tataga surira.

¹² Wa o loa me tira tapariu veta, wa ira numei nirua we mule ma suria, we vava wa, Ka vatraŋ o sul at, neira mule ilo vanua ŋaŋ we toga wawaliog, wa a tag taia ŋaŋ, si a maturu, wa si a sike gar o sinaga: ape inina iake alo vanua vanameag.

¹³ Nava ni me vet muneira wa, Tur le momiu nagara. Naŋ neira wa, Amen kamam iake o bread tavelima wora, wa o iga nirua, si kamam ta tete mule ape wol sinaga gara sul nol iloke.

¹⁴ Ape neira tama tar vaga tavelima wun. Naŋ ni me vava mun ra tiŋqoro anana wa, Tur vapteg sur neira siwo vavtig sea, neira ta saŋsaŋavul tavelima gese.

¹⁵ Naŋ neira me ge tamaike, me vapteg nol neira siwo.

¹⁶ Wa ni me la o bread tavelima ilone wa o iga nirua, ti ate laŋ kalo ivunana, ti wievavae, ti tuqe wora, ti la munra tiŋqoro neira sogo mun o sul.

¹⁷ Wa ineira me toqo qet: wa me sogon kalo o garate sinaga me tuqe ti amaira, o gete saŋavul tuwale o numei nirua.

¹⁸ Naŋ me ge tamaike, ni we tataro magesena, wa ira tiŋqoro amaia, naŋ ni me varusira wa, O sul we vava si inau isei?

¹⁹ Naŋ neira we valui we vet wa, I John i Vasugroŋo: pa o tuaniu mulaŋ we vava wa si, I Elia; wa o tuaniu wa, si tuarasei o prophet we tuai me tavaraka kel.

²⁰ Naŋ ti vet mun neira wa, Pa kamiu we vava si inau isei? Naŋ i Peter me valui goroa we vet wa, Iniko i Christ anan God.

²¹ Naŋ ni me ŋorov gorora we gatogoro nan wa gaganag munsei apena,

²² ti vava wa, Tete ava lai pa si i Nat tanun te roŋo vivtig vagaqoqo ran; wa ira tamaragai, wa ira moe oloolo, wa ira vatogo te gevtagia, wa te ge mateia, wa alo qoŋ vatoliu ni te tavaraka kel.

²³ Naŋ ni me vava mun neira nol wa, Isei qe maros we mule tataga nau, ni leasag kelua, ni la raka non o wolowolo val qoŋ, qara tataga inau.

²⁴ Apensei qe maros we vaesu naatana, te ge tagea: wa isei qe ge tagea naatana o manigiu nau, te vaesu kelua.

²⁵ Ape o sava we wia te rowo lue tea ma mun o tanun si ni qe taur raka nol o marama, pa te ge tagea kelua, si naatana te rowo qet nania?

²⁶ Ape isei qe apekiria ape nau wa ape mok o vavae ŋaŋ, i Nat tanun te apekiria ape neia aŋaisa ni te mule ma mun naleŋasin rara i Tamana, wa ira angel we roŋo.

²⁷ Wa nau we vava nun mun kamiu wa, O tuanira we tira iake tete nam ilo o matea, neira gai ilo mora o marana non God.

²⁸ Naŋ me vava paso o vavae ŋaŋ iloke, tama o qoŋ laveatol, ni me lav raka i Peter tana i John, ratol i James, ti kalo ivune tauwe sin tataro.

²⁹ Naŋ alo we tataro, natarape nagona ti sea nan amoa, wa non o siopa ti aqaga ti gapilwaŋa.

³⁰ Wa ilo, o tanun nirua we varvava amaia, i Moses nane tana i Elia.

³¹ Wa irarua me ŋaŋa lue mun o leŋas, we vava ape non o muleva ni te ge paso rigrig a Jerusalem.

³² Naŋ o matiriva me mavat iratol i Peter, pa me mamata veta ratol qara ilo naleŋasina, wa irara ilone we tiratira tuwale amaia.

³³ Naŋ me ge tamaike, alo irara we vareag nania, i Peter me vava mun Jesus wa, Vatogo, we wia mun nina si a toga iake; katol a tape paito ta tol, muniko tuwale, wa mun i Moses tuwale, wa tuwale mun i Elia: pa ni gate gilala o sava ni we vava.

³⁴ Naŋ alo ni we vava tamaike, o maligo me siwo we malumalu goro iratol, wa ragetol ilone me mule ilo maligo, wa ratol iloke we gogolo apena.

³⁵ Wa o liŋai me rowo ma alo maligo, we vet wa, Iloke Natuk o meratape: tur roŋotagia.

³⁶ Wa alo liŋai ti rowo ma paso, qara ilo i Jesus magesena. Naŋ ratol me monog roroŋo, wa gate av lue tea mun sei alo qoŋ ŋaŋ ilone o sava ratol me ilo ti.

³⁷ Wa tavala maran me ge tamaike, ineira me taqel sur siwo nan o tauwe, wa o sul we qoqo we varniŋa neia.

³⁸ Naŋ ilo, isei alo sul we awo, we vava eleele munia wa, Vatogo, na we paere muniko, ka ate nanagoma ma ape natuk: ape neia o wotuwale.

³⁹ Wa ilo, o vui we lavia, ni we awo gaplot apena; wa ti sare worawora ineia, o usa ti lavia apena, wa ti toa viviris nania, ti pura puapuaga neia.

⁴⁰ Wa nau me paere mun ra tiŋqoro anama si neira vasaug reagia; panava gate lai.

⁴¹ Naŋ i Jesus we valui we vet wa, Gate taraŋiu we nom qerqeret we valvalil; na te togag vanua gai niŋa aŋaisa amen kamiu, wa te roŋo maul apen kamiu? Lav natuma ma iake.

⁴² Wa alo ni te mulemule ma ti, o vui ilone me visarag suria, me sare aneanea. Nava i Jesus me ŋorov goro o vui we tatas ilone, wa me ge esu o reremera, wa me le kelua mun tamana.

⁴³ Wa me niŋagira nol apen God i tur liwoa. Nava alo ineira we mamakei nol ape savasava ŋaŋ ni me ge ti, ni me vava mun ra tiŋqoro wa,

⁴⁴ O vavae ŋaŋ iloke neira roro siwo ilo qoromiu; ape te ukeg kalo i Nat tanun ilo panera tanun.

⁴⁵ Panava nalolora me qoŋ ape vavae ilone, wa me liŋarag nan neira, nan neira wa ilo vaglala apena: wa neira me gogolo si a varusia ape vavae nane ilone.

⁴⁶ Naŋ o varleasag me sug raka amaira si isei nan neira te liwoa raka sage.

⁴⁷ Naŋ i Jesus ti ilo o varleasag alo toqara, ti lav o natmera, ti vatur peteŋia,

⁴⁸ ti vava mun neira wa, Isei qe lav vasgot o natmera iloke alo sasak we lav vasgot nau: wa isei qe lav vasgot nau we lav vasgot i gene ilone me vatraŋ nau ma: ape isei qe mano mantagai amen kamiu, ineia ilone te liwoa.

⁴⁹ Naŋ i John me valui goroa wa, Vatogo, ikamam me ilo isei we vasaug o vui we tatas ŋaŋ mun nasasama; wa ikamam me gatogoroa, ape ni gate mule pulpul amenina.

⁵⁰ Nava i Jesus we vet munia wa, Nipea gatogoro: ape isei ta tete tavaliu mun kamiu ti piriŋ kamiu.

⁵¹ Naŋ me ge tamaike, o qoŋ te lav kaloa me wesu arivtag ma, ti ti maremare nanagona ape Jerusalem,

⁵² wa ni me vatraŋ moai at nasalana: naŋ neira me taka o vanoga, wa me mule pata ilo tuara laqlaqe vanuara ta Samaria, si a ge taur mate munia.

⁵³ Wa neira gate lav vasgotia, ape nanagona tama ape Jerusalem.

⁵⁴ Naŋ o tiŋqoro anana i James tana i John me ilo, we vava si, Lord, ko we maros kamam a vet ape av sin siwo ma avunana, si a gao mate qet neira, tama i Elia me ge veta ti?

⁵⁵ Nava ni me kilau, ti norov goro rara, ti vet wa, Kamurua gate gilala si o loloi we savai kamurua we toga apena.

⁵⁶ Ape i Nat tanun gina gate mule ma sin ge tagea naesura tanun, nava sin ge esu. Naŋ neira me mule ilo vanua we sea.

⁵⁷ Naŋ me ge alo neira qale mulemule, o tuarasei me vava munia a matesala wa, Lord, na te tako ususuriko ivea ko we mulemule aia.

⁵⁸ Naŋ i Jesus wa, O fox naqaraŋira apena, wa o manu tavunana nanigira apena, nava i Nat tanun natanona tagai ni iliŋa naqatuna aia.

⁵⁹ Naŋ ni me vava mun o tuara tanun wa, Ka tataga nau. Nava ni me vet wa, Lord, ka ukeg nau na mule amoa na tavig tamak.

⁶⁰ Nava ti vet munia wa, Tivtag ira mate si neira tavig o tamate ŋaŋ amaira: pa iniko, ka van at, ka maŋasag moma o marana non God.

⁶¹ Naŋ o tanun we sea mulaŋ me vava munia wa, Na te tataga iniko, Lord; pa ka ukeg nau amoa na vava vatulag mun ragai alo imak.

⁶² Nava i Jesus me vet munia wa, I tagai qalo o tanun me kaka lue veta napanena ape tangil vutvut, wa we ate kilau, wasi we sasarita ape marana non God.