O LEA WE WIA TAMA NAMON LUK ME RAVE 7 - O Vatavata we Garaqa 1931 (Vanuatu)

¹ Naŋ we vava paso nol mon o vavae ŋaŋ alo qoro sul, ti mule pata siwo i Kapernaum.

² Wa o rowrowovag anan o tuara liwoa goro soldier melnol we gopa te mate, ni we nonom aneane ape neia.

³ Wa ni me roŋotag apen i Jesus, ti vatraŋ o tuan tamatua ta Judea suria, ti paere munia ni mule ma ni ge esu o rowrowovag anana iloke.

⁴ Naŋ neira me va niŋa i Jesus, we paere togtogoa munia, we vava wa, Ni we sar ape gene ko te ge munia.

⁵ Ape ni we tape o sul ananina, wa ni me taur mona veta o ima siwo tuwale mun kamam.

⁶ Naŋ i Jesus ti gis raka tuwale amaira. Wa ni me niŋa veta gate aras nan o ima, o tanun liwoa goro soldier melnol ti vatraŋ o tuan pulsalana suria, ti vava munia wa, Lord, nipea anumagiko, ape na gate sar si ka kalo pata ma lele imak.

⁷ Wa o manigiu o ine na gate nonom si na we sar si na mule suriko anaqarig; nava ka log o vavae, wa o reremera anak te esu apena.

⁸ Ape inau mulaŋ o tanun me map sur siwo inau munra liwoa goro, wa amenau o tuan soldier we sur siwo mun nau; wa na we vava mun tuara, Ka van at, pa ti van; wa mun tuara, Van ma, wa ti van ma; wa mun o rowrowovag anak, Ka ge tamaike, wa ti ge.

⁹ Naŋ i Jesus me roŋotag iloke, we mamakei ape ineia, ti kilau ris ti vet mun o sul we tataga ineia, ti vet wa, Nau we vava mun kamiu wa, Na gate ilo suar qalo o nomtup we poa tamaike amaira Israel.

¹⁰ Wa ira gene vatraŋ we vusiag kel ilo imana, we ilo o rowrowovag ilone me gopa ti we esu.

¹¹ Naŋ tuara qoŋ rowo ni me vano ilo laqlaqe vanua we log si Nain, wa ira tiŋqoro anana me goara tuwale amaia, wa o sul we qoqo.

¹² Naŋ ni me rivtag o mategeare vanua, ilo, we sasa lue o tamate, natun ravevena o wotuwale, wa ro gene ilone o naro, wa o tanun talo vanua ilone o sul amaia.

¹³ Naŋ i Lord me iloa ti magarosa ineia, ti vava munia wa, Nipea taŋtaŋ.

¹⁴ Wa ni me peteŋ, ti taŋo o tanosasasa, wa iragai we sasa we tira late. Naŋ neia wa, Lumagav, nau we vava muniko, Tavaraka ma.

¹⁵ Naŋ o tamate ti pute raka, ti qeteg vavava. Wa ni me ukegia mun ravevena.

¹⁶ Wa o gogolo me lavira nol, wa neira we log ronoga God, we vet wa, O prophet liwoa me wot ma amen nina, wa God me vaatev ma o sul anana.

¹⁷ Wa o roro ike ape neia me gao nol a Judea, wa alo vanua nol we toga wawaliog.

¹⁸ Wa ira tiŋqoro anan John me gaganag munia ape savasava ŋaŋ iloke.

¹⁹ Wa ni me suware ma o tuan tiŋqoro anana pulrua, we vatraŋ rara sur i Lord, ti vava wa, Iniko i gene wasi te mule ma, si kamam te qale nerei isei we sea?

²⁰ Wa irara ilone me va niŋa ineia we vava wa, I John i Vasugroŋo me vatraŋ i kara ma suriko, was, Iniko i gene wasi te mule ma, si kamam te qale nerei isei we sea?

²¹ Naŋ alo masao qoŋ ilone nane ni me ge esura we qoqo nan o gopae, wa nan o vivtig, wa nan o vui we tatas, wa ni me vasoal mun o matapei we qoqo si neira iloilo.

²² Naŋ ni we valui goro rara we vet wa, Ura mule, ura gaganag kel mun John o sava ŋaŋ kamurua me ilo veta wa me roŋotag, was o matapei ŋaŋ we lik kel, wa o qages we mule kelkel, wa o resresmavin we wenewene kel, wa o qorowono we roŋotag, wa ira mate we tavaraka kel, wa we gaganag o lea we wia mun ra masara ŋaŋ.

²³ Wa turwia isei qe tete tutuag ape nau.

²⁴ Wa ira sala anan i John me vanreag, i Jesus we vava raka mun o sul apen i John wa, Kamiu me rowolue ilo vanua vanameag si a ilo o sava? O togo we magmagoa ape laŋ?

²⁵ Pa kamiu me rowolue si a ilo o sava? O tanun we saru o siopa malumlum? Ilo, iragai we saru o siopa valeleas wa we gana vagae o tur sinaga we toga alo imara maranaga.

²⁶ Pa kamiu me rowolue si a ilo a sava? O prophet? We nun nau we vava mun kamiu, wa raka sage nan o prophet.

²⁷ Pa ineia iloke me rave ti we tuai apena wa, Ilo, na we suware nasalak at goro nanagoma, Wa ni te wurvag moai ko namatesalama.

²⁸ Pa nau we vava mun kamiu wa, Amaira nol me wota veta ma amen o vavine isei tea gate liwoa nan i John i Vasugroŋo, panava isei qe mano mantagai alo marana non God we liwoa nania.

²⁹ Wa o sul nol me roŋotagia, wa ira rowoagtalsom me vet apen God si we taniniga, me la veta mora ti o vasugroŋo amon John.

³⁰ Panava ira Pharise tara vatogo ŋaŋ me sirigavtag mora o lea God me vonog vasarig apena, gate la mora gina o vasugroŋo amona.

³¹ Naŋ i Lord me vava wa, O manigiu o ine, na te tenegag o tanun talo taraŋiu iloke ape sa? wa neira we sasarita ape sava?

³² Neira we sasarita ape reremera ŋaŋ we pute alo tinesara, wa we varloglogira, we vava wa, Ikamam me ge o vigo mun kamiu, panava kamiu gate laka goro; ikamam me ruruŋtap mun kamiu, pa kamiu gate taŋtaŋ tataga.

³³ Apen i John i Vasugroŋo me mule ma gate ganagana o bread gate unun o wine, wa ikamiu we vava wa, O vui we tatas amaia.

³⁴ Pa i Nat tanun me mule ma we ganagana we unun, wa i kamiu we vava wa, Ilo, iloke o mansinaga o manuima, rapulsalana ira rowoagtalsom ŋaŋ tara ganganor.

³⁵ Wa ira nat lolomaran we veveg taniniga o lolomaran.

³⁶ Naŋ o tuara Pharise me paere munia sin ganagana tuwale amaia. Naŋ ni me mule pata ilo iman o Pharise ilone, we risa ape ganagana aia.

³⁷ Pa alo vanua ilone o tuara vavine i ganganor we gilala si ni we pute ape ganagana alo iman o Pharise ilone, ti le ma o wetov matevat o urai alolona,

³⁸ ti tira peteŋ naraŋona ape kulana, ti taŋtaŋ, ti qeteg vasug naraŋona mun nasurmatana, ti maŋ mamasa mun nauluna, wa ti nimnim naraŋona, ti nonon mun o urai ilone.

³⁹ Wa o Pharise ilone me suware i Jesus ma ti me ilo, ti vava alo toqana wa, Iloke si ta prophet te gilala ape vavine ilone we savai we taŋoa, ape neia i ganganor.

⁴⁰ Naŋ i Jesus me valui goroa we vet wa, Simon, na we vet mok o gene muniko. Naŋ neia wa, Vatogo, si ka vava.

⁴¹ O tuara tag pug mon o pug avune tanun nirua. Avunan i tuwale o pug o pene melnol vaga tavelima, avunan o varuei saŋavul tavelima.

⁴² Pa tagai amenrara si rara wono pug nia, wa ni me nomvitag mamasa munrara rua. Isei nan rara te tape raka sage ineia apena?

⁴³ Naŋ i Simon me valui, we vet wa, Nau we nonom si ineia wun me nomvitag raka sage ti munia. Naŋ ti vet munia wa, Ko me veveg taniniga ran.

⁴⁴ Naŋ ni we kilau ape vavine ilone, ti vet mun Simon wa. Ko we ilo o vavine iloke? Na me kalo pata ma ilele imama, wa ko gate le munau o pei ape raŋok, panava iro gene iloke me vasug naraŋok mun nasurmatana, me maŋ mamasa mun nauluna.

⁴⁵ Ko gate nimnim ilo nau, panava na me kalo pata ma wa ineia iloke gate mot ran ma we nimnim naraŋok.

⁴⁶ Ko gate urai naqatuk mun o ligiu, panava ineia me nonon naraŋok mun o urai.

⁴⁷ O manigiu o ine na we vava muniko wa, Napugana we qoqo, pa me nomvitag veta; ape ni me tape aneane: pa ta nomvitag mantagai munsei, ni te tape mantagai.

⁴⁸ Naŋ ni me vava munia wa, Me nomvitag napugama ŋaŋ.

⁴⁹ Wa iragai we risa tuwale amaia ape ganagana we varvava raka wa, Isei gai iloke we nomvitag mulaŋ o pugai?

⁵⁰ Naŋ neia we vet mun o vavine wa, Nom o nomtup me vaesuko; mule tamata at.