O LEA WE WIA TAMA NAMON LUK ME RAVE 6 - O Vatavata we Garaqa 1931 (Vanuatu)

¹ Naŋ me ge alo tuara qoŋ mapsag ti van lue alo tuqei ŋaŋ; wa ira tiŋqoro anana we tawotawo o wut korn wa we gana, we asaasa alo panera.

² Wa o tuan ra Pharise me vava wa, Ape sava kamiu we ge o gene gate tira ape lea si a ge alo qoŋ mapsag?

³ Naŋ i Jesus me valui gorora we vet wa, Kamiu gate vasogo tiqa iloke i David me ge tuai ti, alo ni we maliŋsala, ineia tara ragai ŋaŋ amaia?

⁴ ape ni me kalo pata qa ilo iman God, ti la o bread we mapmap lue ti gana, ti la valval mun ragai amaia, pa gate tira ape lea si rasei te gana, panava ira oloolo magasera.

⁵ Naŋ ni me vet muneira wa, I Nat tanun gai i Lord goro o qoŋ mapsag.

⁶ Naŋ me ge alo tuara qoŋ mapsag, si ni me mule pata ilo ima siwo tuwale ti vatogo; wa o tanun aia o rurus me ge o pane matua.

⁷ Wa ira vatogo tara Pharise me matagisgis goroa ni te ge esu o tanun alo qoŋ mapsag si tagai, si neira a ilo o manigiu te tila ineia apena.

⁸ Pa ni me gilala nor o nonomia, ti vet mun o tanun o rurus me ge napanena wa, Tavaraka, tira lue ma ilo vatitnai. Wa ni me tavaraka, me tira lue.

⁹ Naŋ i Jesus me vet mun neira wa, Nau te varus kamiu; Avea we tira ape lea, si a ge wia alo qoŋ mapsag, si a ge tatas? si a ge esu, si a ge mate?

¹⁰ Wa ni me tatalai ivunara nol, ti vet mun o tanun wa, Ka sigag napanema. Wa ni me sigag: wa napanena me rip kel tam o tavaliu.

¹¹ Wa ineira me leleravag o lologagara, wa me varvava si a ge o sava mun Jesus.

¹² Naŋ me ge alo qoŋ ŋaŋ ilone ni me van at ivune tauwe sin tataro, wa ni me goara maran alo tataro mun God.

¹³ Naŋ me maran ti log ma suria ira tiŋqoro anana ŋaŋ; wa ti ilo raka nan neira o tanun saŋavul tuwale o numei nirua, wa ti log mulaŋ o sasai muneira si ra sala.

¹⁴ I Simon, ni me log mulaŋ nasasana i Peter, tana i Andrew i tasina, i James tana i John, i Philip tana i Bartholomew,

¹⁵ i Mathew tana i Thomas, i James natun i Alpheus tana i Simon we logia i Selotes,

¹⁶ i Juda tasin i James, tana i Judas Iskariot i gene me maniriŋia.

¹⁷ Wa ni me taqel tuwale ma amaira me tira alo rata, tara tiŋqoro anana o sul we qoqo, wa o sul tar ma a Judea nol wa a Jerusalem, wa ta panpanlau ta Tur wa ta Sidon, me mule ma ti si a roŋotagia, wa sin ge esura nan o gopae ŋaŋ;

¹⁸ wa ni me vaesu rasei o vui gagavu we anumagira.

¹⁹ Wa o sul nol me sike si a taŋoa, ape o mana we rowo lue nania, we ge esura nol.

²⁰ Wa ni me ate laŋ sur ira tiŋqoro anana, ti vet wa, Kamiu ira gene vawia ra masara, ape nomiu o marana non God.

²¹ Kamiu ira gene vawia we maliŋsala ilokenake, ape kamiu te toqo aŋaisa. Kamiu ira gene vawia we taŋtaŋ ilokenake, ape kamiu te marae aŋaisa.

²² Kamiu ira gene vawia alo tanun ŋaŋ te ŋustup kamiu, wa te vile sea kamiu, wa te liŋasapur kamiu, te vasigtag nasasamiu tama we tatas, manigiu i Nat tanun.

²³ Tur qaraqara alo qoŋ ilone, tur rowo leklekir, ape ilo, o sarsar kamiu we poa avunana, ape ra tamara me ge veta ti tamaine mun ra prophet ŋaŋ.

²⁴ Panava kamiu we tur magarosa ra meresom; ape kamiu me le veta momiu o masur.

²⁵ Kamiu we tur magarosa we toqo ilokenake, ape kamiu te maliŋsala aŋaisa. Kamiu we tur magarosa we marmarae ilokenake, ape kamiu te lolowono wa te taŋtaŋ aŋaisa.

²⁶ Kamiu we tur magarosa, alo tanun nol te vava wia kamiu, ape ira tamara me ge ti tamaike mun ra prophet soŋsoŋ.

²⁷ Panava nau we vava mun kamiu we roŋotag nau wa, Tur tape nomiu o tavalalea ŋaŋ, tur ge wia mun rasei ŋaŋ we ŋustup kamiu;

²⁸ tur wievavae irasei qe vivnag kamiu, tur tataro apen rasei qe ge visarag kamiu.

²⁹ Isei qe wosa napalasama, ka ate ris munia natavala palasama; isei qe lareag nom o vioviog naniko, nipea gogoroi o siopa sarusaru nania.

³⁰ Ka maukeg mun valsei we paere naniko, wa isei qe lareag napulama nipea paere kel nania.

³¹ Wa tama ikamiu we maros o tanun ŋaŋ neira a ge mun kamiu tur ge mulaŋ tamaine mun neira.

³² Pa si kamiu qe tape kel irasei qe tape kamiu, te varean kamiu tama avea apena? ape ra ganganor gai we tape kel rasei we tape ineira.

³³ Wa si kamiu qe ge wia mun rasei we ge wia mun kamiu, te varean kamiu tama avea apena? ape ra ganganor gai we ge tamaine.

³⁴ Wa si kam qe le galtag mun rasei kamiu we maros nerei we lav kel amaira, te varean kamiu tama avea apena? ira ganganor gai we le galtag mun ra ganganor, si a lav kel mulaŋ we sasarita.

³⁵ Panava tur tape ra tavalalea, tur gege wia, tur lala galtag, tur pea motmot ilo o nom nerei, wa o sarsar mun kamiu te poa, wa ikamiu te ranat i Eleele, ape ni we aleŋa mun ragai gate lolowia kel, wa mun ra tatas.

³⁶ Namatevumiu ni magarosa, tama namatevun Tamamiu we magarosa.

³⁷ Wa turpea veveveg, wa tete veveg kamiu; turpea veveg qalo wa tete veveg qalo kamiu: tur ukeg wasawasa, wa te ukeg wasawasa mun kamiu:

³⁸ tur le, wa te le mun kamiu, o tano towotowo we wia ras, me qeret siwo, me noŋerag, we tapalworag te le alo varamiu, wa mun o qat towotowo kamiu we towotowo nia, te towo kel mun kamiu mun ilone.

³⁹ Naŋ ni me vava tenegag mulaŋ mun neira wa, O matapei te sapan lai o matapei? pa tete mas tatarua ilo qaraŋa?

⁴⁰ I tiŋqoro gate raka sage nan i vatogo neia, pa me vatogo taurmate paso valsei, ni te qara tama i vatogo neia.

⁴¹ Wa ape sava ko we ilo o naenaeai alo matan tasima, nava gate nonom qalo o vat tangae alo matama kel?

⁴² Si ko te vava gasei lai mun i tasima wa, Tasik, si na sipe savrag gai o naenaeai nan namatama; panava ko gate ilo moma o vat tangae ti alo matama kel? I sokoi goro, ka savrag amoa o vat tangae nan namatama kel, paso nan ko qara ilo vaglala we sipe savrag o naenaeai nan namatan tasima.

⁴³ Ape itagai o matai tangae we uwauwa lai o sokore woai; wa itagai mulaŋ o sokore tangae we uwauwa lai o matai woai.

⁴⁴ Ape te gilala o val tangae mun naturwoana. Ape o tanun gate tawotawo lai o fig nan o sou, wa gate is o wo vine nan o wolakaukau.

⁴⁵ O matai tanun we sese lue o matai gene nan o matai gene ŋaŋ me sogon ti alo toqana; wa o mala tanun we sese lue o mala gene nan o mala gene ŋaŋ me sogon; ape navalana we vava lue gese o gene ŋaŋ natoqana me uravag ti nia.

⁴⁶ Wa ape sava kam we log inau wa, Lord, Lord, panava kamiu gate gagapalag o gene ŋaŋ nau we vava apena?

⁴⁷ Val tanun qe mule ma sur inau, wa qe roŋotag mok o vavae ŋaŋ, wa qe ge tataga, na te gaganag lue mun kamiu ineia tama isei.

⁴⁸ Ineia tama o tanun we taur o ima; wa iloke me giliag roro, wa me map o sagere ima avune vat; wa o liliv me liliv, wa o rere me malate ape ima ilone, pa gate riŋov lai, ape me map nasagerana avune vat.

⁴⁹ Nava i gene qe roŋotag naliŋak, pa gate ge tataga, ineia iloke tama o tanun me taur o ima avune tano vires, nasagerana tagai apena, wa o rere me malate ape ima ilone, wa me masu gaplot, wa o ima ilone me tavalala wora we poa aneane.