O LEA WE WIA TAMA NAMON LUK ME RAVE 5 - O Vatavata we Garaqa 1931 (Vanuatu)

¹ Naŋ me ge tamaike, o sul we va pipipiŋia si a roŋotag o vavae non God, wa ni we tur a pan qilo Genesaret.

² Wa ni me ilo o aka nirua we pute a pan qilo, pa ira vaŋvaŋona me siwo sur ti nan, we asa wurvag nor o gape ŋaŋ.

³ Wa ni me vega kalo ivune tuara aka, naakan Simon, ti paere munia sin la raka rowo mantagai o aka nan o salilina; ni qara pute siwo ti vatogo o sul ma vawo aka.

⁴ Naŋ me vava mot paso, ti vava mun i Simon wa, Ka la ras rowo o aka ilo roro qilo, tur tul nomiu o gape ŋaŋ ape saosao iga.

⁵ Naŋ i Simon ti valuia ti vet wa, Vatogo, o qoŋ nol kamam me mawmawui veta, wa gate sao ilo tea; panava na te tul kel o gape ape liŋama.

⁶ Wa neira me ge ran tamaine, wa me kokos o vavtig iga tar, wa o gape te tavsare ti apena.

⁷ Wa neira me tul naqatura munra pulsalara alo tuara aka, si neira a mule ma a piriŋ neira. Wa neira me mule ma, we sogon ura o aka tatarua, wa o aka ŋaŋ qara qeteg tultul apena.

⁸ Naŋ i Simon Peter me ilo, ti rowo taqa ape qaun Jesus, ti vava wa, Vareag nan nau, ape nau i ganganor, Lord.

⁹ Ape mamakei ti ge aneanea tara ragai nol amaia, ape vavtig iga iloke neira me sao kalo ti.

¹⁰ Wa tamaine mulaŋ i James tana i John ranatun i Sebede rapulsalan i Simon. Naŋ i Jesus we vava mun i Simon wa, Nipea gogogolo, wa iloke raka nake ko te saosao kalo o tanun.

¹¹ Wa neira me rave kalo paso naakara i salilina, we totoa vitag nor o savasava ŋaŋ, qara tataga neia.

¹² Naŋ me ge tamaike, ni me toga alo tuara laqlaqe vanua o tanun aia natarapena we lolog resresmavin vires. Naŋ ni me ilo i Jesus, ti suragia ape nagona, ti paere munia wa, Lord, si ko ta maros ko we mana si a ge wenewene kel inau.

¹³ Naŋ ni me kaka napanena, ti taŋoa, ti vava wa, Nau we maros, ka wenewene kel: wa o resresmavin me saru gaplot nania.

¹⁴ Naŋ ni me gatogoroa sin wa gaganag munsei: pa wasi, Vano, gaganag natarapema mun i oloolo, wa ka oloolo ape me ge weneweneko, tama i Moses me vatraŋ ti apena, mun vaglala mun neira.

¹⁵ Nava narorona ti gao aneane nan amoa apena, wa o sul we qoqo me gogorag tuwale ma si a roŋotagia, wa si a ge esura nan o gopae ŋaŋ.

¹⁶ Wa ni me rowovitagira ilo vanua vanameag, ti tataro aia.

¹⁷ Wa me ge si alo tuara qoŋ ni we vatogo; wa o tuan Pharise tara vatvatogo ape lea we pute peteŋ, me mule val vutre vanua veta ma a Galilea, wa a Judea, wa a Jerusalem: wa o mana non i Lord amaia si a ge esura.

¹⁸ Wa ilo, irasei we sasa ma o tanun vawo tano risarisa, o mawea, wa neira we sike o tano vanoga si a sasa pata ineia, a mapua goro nanagona.

¹⁹ Wa neira gate ilo lai si neira lav pata neia ma tama avea o manigiu o sul, pa me vara kalo i vawo ima, me varoro sur o tanun raveaglue o tano siŋ mun non o tano risarisa alo vatitnara ape nagon Jesus.

²⁰ Wa ni me ilo nor o nomtup, ti vava munia wa, Tanun, me nomvitag muniko napugama.

²¹ Naŋ ira vatogo tara Pharise me varsikesike raka, we vava wa, Isei gai iloke we vava nawono tamaike? Isei we mana we nomvitag o pugai nava God tuwale magasena?

²² Naŋ i Jesus me gilala nor o varsikesike, ti valuira ti vet muneira wa, Ape sava kam we varsikesike alo toqamiu?

²³ Avea we toga wora? si qe vava, Me nomvitag napugama muniko; si qe vava, Tavaraka, mule atalia?

²⁴ Pa si kamiu a gilala si amen i Nat tanun o mana iake a marama sin nomvitag o pugai, ni qara vava mun o mawea wa, Inau we vava muniko wa, Tavaraka, le kalo nom o tano risarisa, ka mule ilo imama.

²⁵ Wa gaplot ni me tavaraka alo nagora, ti la raka o gene ni me risa ti avunana, ti vanreag ilo imana, ti log ronoga God.

²⁶ Wa o mamakei liwoa me ge nol neira, wa neira we log ronoga God, wa we uravag o gogolo, we vava wa, Inina me ilo o vasasa anaqarig.

²⁷ Paso nan ni qara kalo lue, ti ilo o rowoagtalsom, nasasana i Levi, we pute ape tano lele som, ti vava munia wa, Ka tataga inau.

²⁸ Naŋ ni me toavitag qet non o savasava, ti tavaraka, ti tataga ineia.

²⁹ Naŋ i Levi me ge o ganagana liwoa munia alo imana, wa o rowoagtalsom o sul we qoqo aia wa o tuan rasei ŋaŋ mulaŋ me pute tuwale amaira.

³⁰ Wa ira Pharise tara vatogo ŋaŋ tamaira me wutoto goro ra tiŋqoro ŋaŋ, we vava wa, Ape sava kamiu we gana wa we ima tuwale amera rowoagtalsom tara ganganor?

³¹ Naŋ i Jesus me valuira ti vet mun neira wa, Iragai qale esu gate maros o gismana, nava iragai we gopa.

³² Na gate mule ma si na suware ma ira taniniga nava ira ganganor ape nomleas.

³³ Naŋ neira me vava munia wa, Ape sava ira tiŋqoro anan i John we garagara mamasa vaga qoqo, wa we tataga ape liŋe tataro, tara ragai ananra Pharise we sasarita; nava ra anama we ganagana we unun?

³⁴ Naŋ i Jesus me vet muneira wa, Kam te ge garagara mamasa lai ira nanat ima wosolagia, alo i lag qale toga amaira?

³⁵ Panava o qoŋ ŋaŋ te wesu aŋaisa, wa te lareag i lag nan neira, wa neira qara garagara mamasa alo qoŋ ŋaŋ ilone.

³⁶ Naŋ ni me vava tenegag mulaŋ mun neira wa, Isei tete sare nan o siopa we garaqa, wa we susur tuan ape siopa we tuai: si ta tamaine, ni te sare o siopa we garaqa ilone; wa mulaŋ, o masare siopa we garaqa ilone tete sasarita lai ape siopa we tuai.

³⁷ Wa isei tete vaniŋ o wine we garaqa ilo wetov vinqoe ŋaŋ we tuai; si ta tamaine, o wine we garaqa ti sis wora o wetov, wa te sale qega ilone, wa o wetov ti pea ran.

³⁸ Nava te vaniŋ ran o wine we garaqa ilo wetov vinqoe we garaqa, wa tatarua te toga tatapuga.

³⁹ Wa isei me un veta o wine we tuai gate maros we un goro mun o wine we garaqa, ape ni we vet wa, O wine we tuai we wia ras.