O LEA WE WIA TAMA NAMON LUK ME RAVE 4 - O Vatavata we Garaqa 1931 (Vanuatu)

¹ Wa i Jesus ti uravag o Vui we Roŋo, ti kel ma nan Jordan, wa o Vui ti vanogagia alo vanua vanameag o qoŋ saŋavul vat,

² i Satan we gale iloa aia. Wa alo qoŋ ŋaŋ ilone ni gate gana ilo o sava, wa me paso ŋaŋ qara maliŋsala.

³ Naŋ i Satan ti vava munia wa, Si ko ta Natun God, ka vatraŋ o vat iloke ni ris bread nia.

⁴ Naŋ i Jesus we valui goroa wa, Me rave veta si, O tanun tete esu mun o bread vires, nava mun o val vavae ŋaŋ amon God.

⁵ Paso nan, ti lav kaloa avune salo tauwe, ti gaganag pit mot munia o marana ŋaŋ a marama.

⁶ Naŋ i Satan we vava munia wa, Na te le at muniko o mana nol iloke, wa o ronoga apena; ape me ukeg veta ma munau, wa na te le munsei nau qe marosia.

⁷ O manigiu ilone si ko ta vatieqau goro nanagok, te noma nol apena.

⁸ Naŋ i Jesus we valui we vet munia wa, Ka toa ape kulak, Satan, ape me rave veta wa, Ko te vatieqau goro i Lord God iniko, wa ko te mawui goroa magesena.

⁹ Paso nan ti lav sagea i Jerusalem, ti vatur ineia avune ŋorŋori ima we roŋo, ti vava munia wa, Si ko ta Natun God, ka rowo sur iake.

¹⁰ Ape me rave veta was, Ni te vatraŋ ira angel anana apeniko neira kokor goro mantagiko:

¹¹ Wa mulaŋ, Alo panera neira te sapan kalo ko, Nan ko wa tika taso wun naraŋoma ape vat.

¹² Naŋ i Jesus me valui goro we vet munia wa, Me vava veta ti, Ko tete meregale i Lord God iniko.

¹³ Naŋ i Satan me gale iloa nol paso, me toa galean nania.

¹⁴ Naŋ i Jesus me kel at i Galilea mun o mana non o Vui we Roŋo; wa narorona ti gao lue alo vanua nol ilone wawaliog.

¹⁵ Naŋ ni me vatvatogora alo ima siwo tuwale ŋaŋ tamaira, wa ineira nol me sotalia.

¹⁶ Wa ni me mule niŋa o Nasaret, me tokos poa ineia ti aia: wa ni me mule pata tama naliŋana nane ilo ima siwo tuwale alo qoŋ mapsag, wa ti tavaraka sin vasogo.

¹⁷ Wa me le munia o raverave amon Isaia o prophet. Wa ni me lil o raverave me ilo suar o masaoi me rave aia was,

¹⁸ O Vui non Lord avunak, Ape ni me urai nau si na gaganag o lea we wia mun ra masara ŋaŋ: Ni me vatraŋ nau ma si na toto vivtig nan ira toqe manoanoa, Si na maŋasag o ulsag mun ra gene wosag, wa o iloilo kel mun ra matapei, Wa si na ul kel mamasugira we pepepemera,

¹⁹ Si na maŋasag lue nataun Lord o tangemarmaros.

²⁰ Wa ni me luqe goro kel o raverave me la kel mun i gagapalag, ti pute siwo. Wa namatara nol alo ima siwo tuwale we sagsagaragia.

²¹ Naŋ ni me vava raka mun neira wa, Anaqarig o raverave iloke me rowo tira ran alo qoromiu.

²² Wa neira nol me gaganag ulul ape neia, wa we mamakei ape vave sogov ŋaŋ we rowo lue nan navalana, we vet wa, Gate natun i Joseph iloke?

²³ Naŋ ni me vava mun neira wa, Pa kam te vava ran mun nau o vavae tenegag iloke wa, Gismana, ka ge esu kelu ko: o savasava ŋaŋ kamam me roŋotag si me ge veta ti a Kapernaum, ka ge mulaŋ gai iake alo tur vanuama.

²⁴ Naŋ ni me vet wa, We nun inau we vava mun kamiu wa, Tete lavlav vasgot tea o prophet alo tur vanuana.

²⁵ Nava we nun nau we vava mun kamiu wa, O naro we qoqo amaira Israel alo qoŋin i Elia, alo me pala goro o tuka o tau nitol wa o vula laveatea, wa o maro liwoa we ge lolovag o vanua.

²⁶ Wa gate suware i Elia sur sei tuwale amaira, nava i Sarepta alo vanua Sidon sur o tavine aia o naro.

²⁷ Wa o resresmavin we qoqo amaira Israel alo taun i Elisa o prophet: pa gate mawo ran i tuwale amaira, panava i Naaman ta Suria magesena.

²⁸ Naŋ neira nol alo ima siwo tuwale me roŋotag ape ine, we toqosag o lologagara;

²⁹ wa me tavaraka, me vure savragia nan o laqlaqe vanua, me vanogagia i mate nua, me taur navanuara ti aia, si neira a sargag valiliugia.

³⁰ Pa ni me rowo lue alo vatitnara, me vano.

³¹ Wa ni me taqel siwo i Kapernaum o laqlaqe vanua takele Galilea. Wa ni we vatogora alo qoŋ mapsag.

³² Wa neira me mamakei ape lea vatogoa anona, ape non o vavae we mana.

³³ Naŋ alo ima siwo tuwale ilone o tanun aia o vui gagavu amaia, wa ni we awo raka mun o liŋai we poa,

³⁴ ti vet wa; Awo, o sava amen kamam wa amaiko, Jesus ta Nasaret? ko me mule ma si a ge tagea kamam? Inau we gilala iniko isei, i Roŋo anan God.

³⁵ Wa i Jesus me ŋorov goroa, ti vet wa, Toga roroŋo, rowolue nania. Wa o vui ilone me virgagia alo vatitnara, me rowolue nania, gate ge tatasia.

³⁶ Wa o mamakei me ge aneanera, wa neira we varvava vires neira wa, O sava vavae gai iloke, ape mun o liŋe liwoa goro wa o mana ni we vatraŋ o vui gagavu ŋaŋ, wa neira we rowolue.

³⁷ Wa narorona me gao lue alo val vanua wawaliog.

³⁸ Wa ni me tavaraka, ti rowolue nan o ima siwo tuwale, ti kalo pata lele iman Simon. Wa iro qalgan Simon o gopae tutunsag we poa me qaloa; naŋ neira me paere munia ape neia.

³⁹ Wa ni me tira peteŋ avunana, ti gatogoro o gopae tutunsag, wa me saru nania; wa ni me tavaraka gaplot, ti lapasag muneira.

⁴⁰ Wa alo loa ti rororo, ineira nol ira val gopae we seasea amaira we takira ma suria, wa ni me taŋov valval neira, ti ge esura.

⁴¹ Wa o vui we tatas ŋaŋ me rowo lue nan neira we qoqo, ti awo eleele, ti vava wa, Iniko gai i Christ, Natun God. Wa ni me ŋorov gorora, gate maukegira si a vava, ape neira we gilala veta si neia i Christ.

⁴² Wa me maran ni me va lue, ti mule ilo masao vanua vanameag, wa o sul me sike tataga ineia, wa me mule niŋa ineia, we taqtaqar goroa sin wa toavtag neira.

⁴³ Nava ni we vet mun neira wa, Namok ran si na gaganag o lea we wia ape marana non God alo laqlaqe vanua ŋaŋ we sea mulaŋ, ape me vatraŋ nau ma o manigiu ilone.

⁴⁴ Wa ni me toretore goro segao alo ima siwo tuwale ŋaŋ a Galilea.