O LEA WE WIA TAMA NAMON LUK ME RAVE 24 - O Vatavata we Garaqa 1931 (Vanuatu)

¹ Pa alo qoŋ tuwale talo wik alo loŋloŋe maran neira me mule ape qaraŋa, we tak ma o gene punapuna ŋaŋ neira me wurvag veta ti, wa o tuan rasei me tako ineira.

² Wa neira me ilo o vat me wil reag veta nan o qaraŋa.

³ Wa neira me mule pata alolona panava gate ilo qalo naturian i Lord Jesus.

⁴ Naŋ me ge tamaike, alo we tama mun neira apena, ilo, irasei pulrua we tira peteŋira we saru o siopa we gapilwaŋa.

⁵ Wa neira we gogolo we ate sur nanagora ilo tano, irara we vava mun neira wa, Kam we sike i gene we esu amera tamate ape sa?

⁶ Neia tagai iake, pa me tavaraka; tur lolomaran kel ape ni me gaganag veta mun kamiu ni qale toga a Galilea,

⁷ me vet si te ukeg vano ran i Nat tanun ilo panera ganganor, wa si te woso teterpania, wa si te tavaraka alo qoŋ vatoliu.

⁸ Wa nalolora qara maran kel ape mon o vavae.

⁹ Wa neira me vusiag kel nan o qaraŋa, we gaganag o gene ŋaŋ iloke nol mun o numei tuwale, wa mun ragai nol we sea.

¹⁰ Pa i Meri ta Magdala, wa i Joana, wa i Meri i raveven i James iloke: wa irarosei mulaŋ amaira me gaganag tamaike mun ra sala.

¹¹ Pa me roŋotag o vavae ŋaŋ iloke tam o lea qaqae, wa gate nomtupura.

¹² Nava i Peter ti tavaraka ti valago ape qaraŋa, ti taqalon, ti matarag ilalona, ti ilo o siopa lolos tamate we risa sea, ti vusiag kel ilo imana, we mamakei ape gene me ge.

¹³ Wa ilo, pulrua nan neira alo qoŋ ran ilone me mulemule ilo laqlaqe vanua o sasai Emaus; we asau tam o masaoi saŋavul laveatea nan o Jerusalem.

¹⁴ Wa irara we vano varvavava ape savasava iloke nol me ge ti.

¹⁵ Wa me ge tamaike, irara iloke we varvava wa we var sikesike, wa i Jesus me peteŋ rara, we mule tuwale amen rara.

¹⁶ Wa me taur goro namatarara nan wa gilala neia.

¹⁷ Naŋ ni we vet mun rara wa, O sava o vavae ŋaŋ iloke kamurua we vano vava varsarsar, wa nanagomurua we maŋitŋit apena?

¹⁸ Naŋ i tuara, nasasana i Kleopas, me valui we vet munia wa, Iniko magesema we toga galean a Jerusalem pa gate gilala o gene me ge aia alo qoŋ ŋaŋ iloke?

¹⁹ Naŋ neia munrara wa, O sava gene? Naŋ rara wa, O gene ŋaŋ qa apen i Jesus ta Nasaret, ineia o prophet we mana mun o vavae wa mun o gagapalag ŋaŋ alo nagon God, wa alo nago sul nol.

²⁰ Wa ape ra oloolo liwoa wa ira liwoa goro kamam me ukegia si a veveg qaloa, wa me woso teterpania.

²¹ Pa ikamam me nom nerei ti si ineia iloke was te tunkel ra Israel. Pa we nun mulaŋ gai, o savasava ilone me ge ti o qoŋ vatoliu ilokenake.

²² Wa mulaŋ o tuan vavine tamen kamam me ge malarowo ikamam, neira me nunuuwa ti ape qaraŋa;

²³ wa neira gate ilo qalo naturiana, wa me kel ma we vava si neira me ilo mulaŋ o taqaŋiu, o angel ŋaŋ we gaganag sin we esu.

²⁴ Wa o tuan rasei amen kamam me mule ape qaraŋa, me ilo ran tam o revavine me gaganag ti, panava gate ilo ineia.

²⁵ Naŋ ti vava mun rara wa, Ra qaqae, natoqamiu we malapusa si a nomtup o savasava nol ira prophet me vava ti we tuai.

²⁶ Gate tira apena si i Christ te roŋo vivtig tamaike, wa te mule pata ilo leŋasina?

²⁷ Naŋ ni me qeteg raka apen Moses wa apenra prophet ŋaŋ, we gaganag tavaul o savasava me rave nol ti alo raverave nol ape neia.

²⁸ Wa ratol me peteŋ o laqlaqe vanua rara we mule aia; wa ineia me ge sin tira taso.

²⁹ Wa irara me vasur goroa, we vet wa, Toga galtag amen kara, ape malurav me noga, wa o loa me tira tapariu veta. Naŋ ni me mule pata sin toga amen rara.

³⁰ Naŋ me ge tamaike, ni me pute tuwale veta amenrara ape ganagana, pa we taur o bread, ti wievavae apena, ti tuqe, ti sogo valrara.

³¹ Wa namatarara me lik kel, wa me ilo vaglala ineia; pa ni me tatavun nan namatarara.

³² Naŋ irara me varvava wa, Natoqanara gate lolowo alo lolonara ni we vava mun nara a matesala, wa we waka mun nara o raverave ŋaŋ?

³³ Wa irara me tavaraka alo masao qoŋ ran ilone, we vusiag kel i Jerusalem, wa we ilo suar o numei tuwale me vug tuwale, wa irasei mulaŋ amaira,

³⁴ we vava wa, I Lord me tavaraka nun, wa me sere lue mun i Simon.

³⁵ Naŋ irara ilone me gaganag ulul o sava me ge ti a matesala, wa me ilo vaglala gasavaia alo ni we tuqe o bread.

³⁶ Wa alo neira we vavava tamaike, ineia i Jesus nane we tira alo vatitnara, ti vet mun neira wa, O tamata ni toga amen kamiu.

³⁷ Naŋ neira me sus malukluk apena, wa we gogolo aneane, we nonom si neira we ilo o tamate.

³⁸ Naŋ ni we vet mun neira wa, Natoqamiu we matikotiko apesa? wa ape sava o nonomia we sug raka alo lolomiu?

³⁹ Tur ilo momiu napanek wa naraŋok, was inau ran; tur tatataŋo ape nau, tur ilo momiu, ape o tamate o visogoi wa o surui tagai apena, tama kamiu we ilo ape nau.

⁴⁰ Wa me vava paso tamaike ti gaganag lue mun neira napanena wa naraŋona.

⁴¹ Wa alo neira qale nom qerqeret ape qaraqara, wa qale mamakei, ti vet mun neira wa, O sava tea iake si a gana?

⁴² Naŋ neira me la munia o garate iga we raŋai.

⁴³ Wa ni me taur, ti gana alo nagora.

⁴⁴ Naŋ ni me vet mun neira wa, Iloke ŋaŋ mok o vavae na me vava veta mun kamiu, na qale toga amen kamiu, wa si te tira ran o savasava nol me rave ti alo lea mon Moses, wa alo prophet ŋaŋ, wa alo psalm ŋaŋ ape nau.

⁴⁵ Naŋ ti waka nor o nonomia si neira a lolomaran lai ape raverave ŋaŋ.

⁴⁶ Ti vet wa, Me rave ti we tuai tamaike, wa si i Christ te roŋo vivtig ran, wa te tavaraka nan ra mate alo qoŋ vatoliu,

⁴⁷ wa si te maŋasag o nom leas wa o nom vitag pugai alo sasana mun o val sul ŋaŋ, we qeteg raka a Jerusalem.

⁴⁸ Pa ikamiu ira gaganag we tur ape ike.

⁴⁹ Wa tur ilo ma, na we vatraŋ avunamiu o ligoligog non Tamak; pa tur toga galean alo laqlaqe vanua, gai saru goro kamiu mun o mana tavunana.

⁵⁰ Wa ni me tursalemoa lue neira gai sar taniniga ape Bethania; wa ti sigag kalo napanena ti wievavae ineira.

⁵¹ Wa me ge tamaike, ti wievavae neira, ti tira sea nan neira, qara sau kaloa ivunana.

⁵² Wa neira me taqaloŋ goroa, wa me vusiag kel mun o qara liwoa i Jerusalem.

⁵³ Wa we toga vagae alo tinesara we roŋo, wa varean wa we wievavae God.