O LEA WE WIA TAMA NAMON LUK ME RAVE 23 - O Vatavata we Garaqa 1931 (Vanuatu)

¹ Naŋ neira o sul nol me tavaraka me takia ape nagon i Pilat.

² Wa neira me tila raka ineia we vava wa, Kamam me ilo suar i gene iloke we korave o sul anamam, wa we gatogorora nan wa sargag o som mun i Kaisar, we vet ape neia si i Christ o maranaga.

³ Naŋ i Pilat me varusia we vet wa, Iniko i maranaga nora ta Judea? Naŋ ni me valui goroa wa, Ko we vava.

⁴ Naŋ i Pilat me vet mura oloolo liwoa tar o sul wa, Na gate ilo qalo napugana alo tanun iloke.

⁵ Pa neira me sisgag maremare nan amoa, we vet wa, Ni we ge lakosa o sul, ti vatvatogo sir vanua nol a Judea, me qeteg raka a Galilea we niŋa ran ma iake.

⁶ Nava i Pilat me roŋotag ilone, ti varus si o tanun iloke we ta Galilea.

⁷ Naŋ ni me gilala si neia talo marana non i Herod, ti vatraŋia at sur i Herod, pa ineia mulaŋ a Jerusalem alo qoŋ ŋaŋ ilone.

⁸ Wa i Herod me ilo i Jesus, we qaraqara aneane apena, ape ni we maros tuai ma sin iloa, ape ni me roŋotag vaga qoqo ape neia, wa ni we maros we ilo o vasasa tea ni te ge.

⁹ Naŋ ni me varusia mun o vavae ŋaŋ we qoqo; panava ni gate valui goroa ran.

¹⁰ Wa ira oloolo liwoa tara vatogo we tira we tilatila warwar ineia.

¹¹ Wa i Herod tara vagvagalo anana me ge tagtageagia, wa me porporosag, we saru goroa mun o siopa we terelawa, we vatraŋ kelua sur i Pilat.

¹² Naŋ i Herod tana i Pilat rara me pulpul wia kel mulaŋ alo qoŋ ran ilone, ape rara me vartike amoa.

¹³ Wa i Pilat me suware tuwale ma ira oloolo liwoa wa ira tanun liwoa wa o sul,

¹⁴ ti vet mun neira wa, Kamiu me tak ma i gene iloke, tama isei we korave o sul, wa ilo, na me sike waririag alo nagomiu pa na gate ilo piro qalo napugana alo tanun iloke ape gene ŋaŋ kamiu me tila neia ti apena.

¹⁵ Wa i Herod mulaŋ tagai; ape ni me vatraŋ kelua ma surnina, wa ilo, ni gate ge ilo tea we tira ape matea.

¹⁶ Manigiu ilone na towos pasoa qara ukeg kelua.

¹⁷ Ape amona ran sin ukeg i tuwale mun neira alo lakalaka.

¹⁸ Nava neira me awo eleele saratuwale wa, Lareag i gene iloke, pa ka ukeg ma i Barabas mun kamam;

¹⁹ me tuqerag i gene iloke ti ilo ima rotrot, ape me rowovatur alo laqlaqe vanua wa me vus nawono.

²⁰ Wa i Pilat me vava mulaŋ mun neira, we maros we ukeg i Jesus.

²¹ Nava neira we awoawo we vet wa, Woso teterpania, woso teterpania.

²² Naŋ ni me vava vagatoliu mun neira wa, Ape sava gai, avea o ganganor i gene iloke me ge? Na gate ilo qalo o manig matea amaia; o manigiu ilone na te towosia, qara ukeg kelua.

²³ Panava neira we gagarakae mun o liŋai we poa, we paere munia si a woso teterpania; pa me tira naliŋara apena.

²⁴ Wa i Pilat me veveg lue si te ge tama neira me paere ti apena.

²⁵ Wa ni me ukeg i gene ilone me tuqeragia ti ilo ima rotrot, ape me rowovatur wa me vus nawono, neira we paere ineia ti; pa ni me vano maukeg i Jesus ape nor o maros.

²⁶ Wa we takia at, wa neira we taur varaget o tuarasei i Simon ta Kurene, we mule ma alo utag, we map o wolowolo ivunana, sin rig ape kulan Jesus.

²⁷ Wa neira we tar o sul we tatataga ineia, wa o retavine we tut navarara we ruruŋtap goro.

²⁸ Pa i Jesus me kilau ris sur neira ti vet wa, Ra retavine ra nanat Jerusalem, nipea taŋtaŋ ape nau, pa tur taŋtaŋ apen kamiu kel wa apen ra nanatumiu.

²⁹ Ape ilo, o qoŋ te roworowo ti, te vava alolona wa, Tur wia iraro kelo, wa o toqai gate vasvasus, wa o sus gate susus.

³⁰ Alo ine nane neira te vava raka mun o tauwe ŋaŋ wa, Tur tanu goro kamam, wa mun o ware vutvut ŋaŋ wa, Tur liŋarag kamam.

³¹ Ape si neira qe ge tamaike alo tangae we qaro, te ge o sava gai alo tangae we kor?

³² Pa me tak tuwale amaia o tanun pul rua o malagagapalag si a ge mate irara.

³³ Wa me niŋa o masaoi we log si Kranion neira me woso teterpania aia, wa irara o malagagapalag mulaŋ, tuwale ape pane matua, wa o varuei ape galao.

³⁴ Naŋ i Jesus me vava wa, Mama, ka nomvitag neira, ape neira gate gilala o sava neira we ge. Wa neira we tirag non o siopa valvalura, we map o vaglala apena.

³⁵ Wa o sul we tira we matagia. Wa ira liwoa amaira mulaŋ we vasiria, we vava wa, Ni me vaesu iragai we sea; pa ni vaesu kelua ta i Christ non God iloke, i gene ilo raka anana.

³⁶ Wa ira soldier mulaŋ me porosagia, we mule suria, we sueg o vinegar munia,

³⁷ we vava wa, Iniko ta i maranaga nora ta Judea, ka vaesu keluko.

³⁸ Wa o raverave vaglala mulaŋ avunana mun o letas ta Grik, ta Rom, ta Hebrew, wa si, ILOKE O MARANAGA NORA TA JUDEA.

³⁹ Wa i tuara malagagapalag me vatakaua ti we liŋasapuria, ti vet wa, Ko gate i Christ? ka vaesu natol.

⁴⁰ Nava o varuei me valui, we ŋorov goroa, ti vet wa, Ko gate momogo i God, pa iniko nake alo lea veveg tuwale iloke?

⁴¹ Pa we sar taniniga gina mun nara, ape nara we la we sasarita ape mon nara o gagapalag, pa i gene iloke me roŋo maslailai wora.

⁴² Wa ni me vava mun Jesus wa, Lord, ka nonom kel ape nau aŋaisa ko te mule ma alo nom o marana.

⁴³ Naŋ neia munia wa, We nun na we vava muniko, Qarig nara te toga tuwale a Paradis.

⁴⁴ Wa tama o masao qoŋ laveteai nake iloke, wa o silsiliga me gara goro o vanua nol gai niŋa ape masao qoŋ lavevatiu.

⁴⁵ Wa o loa me silsiliga goro, wa o siopa nin goro o ima we roŋo me masare tavalala.

⁴⁶ Wa i Jesus me awoawo mun o liŋai we poa, qara vava wa, Mama, na we sakarag naatak ilo panema; wa me vava paso tamaike ti mapsag mot.

⁴⁷ Wa i liwoa goro soldier melnol me ilo o sava me ge, ti log ronoga God ti vet wa, We nun ran, o tanun taniniga iloke!

⁴⁸ Naŋ o sul nol me sasalev ma ti ape iloke, we ilo o savasava ŋaŋ me ge, we vareag kel we wosawosa navarara.

⁴⁹ Wa iragai nol we gilala ineia, wa o revavine me tataga tuwale ineia ma ti a Galilea, we tira aras, we iloilo mora o gene ŋaŋ iloke.

⁵⁰ Wa ilo, o tanun nasasana i Joseph, ineia tuwale tape vavtig veveg, o matai tanun wa we taniniga.

⁵¹ I gene iloke gate mawui goro o gene neira me varvava ti wa me gagapalag apena, ineia o ta Arimathea o tuara laqlaqe vanuara ta Judea, wa we toga nerei mona o marana non God.

⁵² Ineia iloke ti mule sur i Pilat, ti paere naturian i Jesus.

⁵³ Naŋ ti la sur siwo, ti lolos goro mun o siopa we aqaga, ti map alo qaraŋa me tit ti alo vat, isei gate risa taqai tiqa alolona.

⁵⁴ Wa o qoŋ gismamate, wa o qoŋ mapsag me noga.

⁵⁵ Wa o revavine me mule tuwale ma ti amaia a Galilea we tataga, we ilo o qaraŋa, wa me salo gasei naturiana.

⁵⁶ Naŋ neira me vusiag kel, me wurvag o gene punapuna ŋaŋ wa o urai. Wa alo qoŋ mapsag neira me mapsagira tataga o lea vatraŋ.