O LEA WE WIA TAMA NAMON LUK ME RAVE 20 - O Vatavata we Garaqa 1931 (Vanuatu)

¹ Naŋ me ge tamaike, alo tuara qoŋ ni we vatogo o sul alo tinesara we roŋo, wa ti gaganag o lea we wia, ira moe oloolo tar o vatogo amaira tamaragai ŋaŋ me peteŋia.

² Wa neira me vava, we vet munia wa, Ka gaganag mun kamam; o mana ta avea ko we ge tamaike nia, wa isei me le o mana iloke muniko?

³ Naŋ ni me valui gorora, ti vet wa, Inau mulaŋ na te varus mok kamiu o vavae tuwale, pa tur gaganag mun nau:

⁴ O vasugroŋo mon John, we ta vunana ma, si ma nan o tanun?

⁵ Naŋ neira me varvava vires neira, we vet wa, Nina ta vava si, Ta vunana ma: ni te vet wa, Ape sava kamiu gate nomtupua?

⁶ Pa si nana ta vava si, Ma nan o tanun; o sul nol te patuŋ nina, ape neira me nom mot ran si i John o prophet.

⁷ Naŋ neira me valui goroa si neira gate gilala si ma avea.

⁸ Naŋ i Jesus me vet muneira wa, Pa inau mulaŋ na tete gaganag mun kamiu si mun o mana ta avea na we ge tamaike nia.

⁹ Naŋ ni me vava raka mun o sul o vava tenegag iloke: O tanun me riv o tuqe vine, me maukeg galtag munra mawmawuitag, qara mule te vanua o qoŋ we qoqo.

¹⁰ Wa alo tur tau, ni me vatraŋ o tuara rowrowovag anana munra mawmawuitag si neira a la o tuan woai talo tuqei munia; panava ira mawmawuitag me towosia, me suware savrag mamasa kelua.

¹¹ Wa ni me vatraŋ tuan o tuara rowrowovag, pa neira me towosia, me araresagia, me suware savrag mamasa kelua.

¹² Wa ni me vatraŋ tuan mulaŋ o tanun vatoliu, pa neira me virgag luea me mataqaga.

¹³ Naŋ o tag tuqe vine me vava wa, O sava na te ge? Na vatraŋ natuk o meratape, neira te apemaragai wun ineia.

¹⁴ Panava ira mawmawuitag me iloa, me varsikesike vires neira wa, Iloke i lelesiu, sowo, nina ge mateia, si o vanua usurag iloke te pulanina.

¹⁵ Wa neira me virgag luea nan o tuqei, me ge mateia. Pa o sava o tag tuqe vine te ge mun neira apena?

¹⁶ Ni te mule ma te ge mate sarapun ira mawmawuitag iloke, te maukeg o tuqe vine mun rasei we sea. Naŋ neira me roŋotag, we vava wa, Nipea ran nane.

¹⁷ Nava ni me sagaragira, ti vet wa Pa o sava iloke me rave veta ti wa, O vat ira tautaur ima me ge vitag ti, Me ge ilone mun qat vat tape sigrai?

¹⁸ Val sei qe mas avune vat iloke te niŋag latelatea; pa qe mas avunansei, te qisaŋ sasavurvur ineia.

¹⁹ Naŋ alo masao qoŋ nane ilone ira moe oloolo tara vatogo me sike si a takulua; pa neira me gogolo o sul; ape neira me ilo vaglala si ni me vava o vava tenegag iloke ape neira.

²⁰ Naŋ neira me matagisgis goroa, wa me vatraŋ irasei te pute goro palua, we galegale si we taniniga, si a la raka non o vavae, a maniriŋia ilo tano veveg wa o mana non o governor.

²¹ Naŋ neira me varusia we vet wa, Vatogo, kamam we gilala si ko we vava wa we vatogo taniniga, wa ko gate lav vires o nago tanun, wa we vatvatogo nun ape matesalan God.

²² We tira ape lea si nina vile sargag o som mun i Kaisar, si tagai?

²³ Pa ni me ilo vaglala nor o nurnurug, ti vet muneira wa, Ape sava kamiu we meregale nau?

²⁴ Gaganag ma o pene. Anonsei o totogale iloke wa o raverave apena? Naŋ neira we vet si, Anon i Kaisar.

²⁵ Naŋ neia wa, O manigiu ilone tur le kel mun i Kaisar o gene ŋaŋ non i Kaisar, wa mun God o gene ŋaŋ non God.

²⁶ Pa neira gate la raka qalo lai o vavae ilone alo nago sul, wa neira me mamakei ape non o valvalui, wa me naenae roroŋo.

²⁷ Naŋ o tuan Saduke ŋaŋ me mule ma suria, neira we leasag si o tavaraka kel tagai, me varusia we vava wa,

²⁸ Vatogo, i Moses me rave mun nina wa, Si tasinsei me lag veta, qe mate, wa si natuna tagai, si tasina te lav rasoana, te vawota o nanatui mun tasina.

²⁹ Pa o retatasiu lavearua tamaine; wa o moai me lag o vavine, me mate, wa natuna tagai;

³⁰ wa o varuei me tataga goro o vavine, me mate, natuna tagai apena;

³¹ wa o vatoliu me lavia, wa iragai lavearua tamaine me mate, wa gate matevtag tea o natmera.

³² Wa o paspasoanai o vavine me mate vunvun.

³³ Pa alo tavaraka kel ni te rasoansei apena? ape neira lavearua me lagia ti.

³⁴ Naŋ i Jesus we vet muneira wa, Ira nat marama iloke we laglag, wa we togatoga amairasei;

³⁵ panava irasei te vevegira si we sar si a niŋa suar o marama iloneia, wa o tavaraka nanra mate, gate laglag gate togatoga amairasei;

³⁶ ape ineira tete mate lai mulaŋ tea aŋaisa; ape we sasarita amaira angel, wa ineira ra natun God, ape neira ra nat tavaraka kel.

³⁷ Pa ape we ge raka kel ira mate, i Moses me gaganag lue mona apena ape Tangae qarqaruga, we log i Lord si God Abraham, wa God Isaak, wa God Jakob.

³⁸ Naŋ neia gate God nora mate, nava nora esuesu, ape tanun nol we esu suria.

³⁹ Wa o tuara vatogo me valui goroa we vava wa, Vatogo, ko me vava mantag.

⁴⁰ Ape neira gate nom mot si a varus iloa tea mulaŋ.

⁴¹ Naŋ ni me varusira wa, Neira we log tama avea i Christ si natun David?

⁴² Apen i David we vava mona alo raverave psalm wa, I Lord me vava mun i Lord inau wa, Ka pute ape matuak,

⁴³ Nau gai map siwo nom o tavalalea ŋaŋ mun tano ververesag ape raŋoma.

⁴⁴ Pa i David we logia tamaine si i Lord; pa neia i natuna gaseinia?

⁴⁵ Naŋ alo qorora sul nol ni me vet mun ra tiŋqoro anana wa,

⁴⁶ Tur ilogoro kel kamiu nan ra vatogo, we maros we mulemule kelkel alo siopa we tole, wa we toron we wievavae neira alo sare wolwol ŋaŋ, wa o moe tano putepute alo ima siwo tuwale ŋaŋ, wa o moe tanoi ŋaŋ alo lakalaka ŋaŋ;

⁴⁷ iragai nane we gana sopun naimara ro naro, wa we tataro maul o manig gale; pa ragai ŋaŋ iloke te taur mora raka sage o lea veveg apena.