O LEA WE WIA TAMA NAMON LUK ME RAVE 19 - O Vatavata we Garaqa 1931 (Vanuatu)

¹ Wa ni me niŋa pata veta wa we mule raveag lue o Jeriko.

² Wa ilo, i gene me log nasasana i Sakeus, neia o moe rowoagtalsom, wa ni we meresom.

³ Wa ineia iloke we sikesike sin ilo Jesus si neia isei, panava gate lai ape sul, ape neia natarapena we qatutui.

⁴ Wa ni me valago taso amoa, ti rap kalo i vawo sukamor sin iloa, ape ni te mule talavivis alo matesala ilone.

⁵ Naŋ i Jesus me niŋa o vatine, ti ate laŋ kalo, ti vet munia wa, Sakeus, siwo gaplot ma: ape namok ran si na toga qarig alo imama.

⁶ Naŋ ni me siwo gaplot, wa me lav malakalaka ineia.

⁷ Wa neira we ilo we terevaŋutŋut nol, we vava wa, Ni we mule sur i ganganor mun tawuna.

⁸ Wa i Sakeus we tira we vava mun i Lord wa, Ilo, Lord, natavala pulak na we le mun ra masara, wa si na me taur mok som ti ape tila galegale, na we la kel vagavat.

⁹ Naŋ i Jesus me vava munia wa, Qarig o esuva me sarovag ilo ima iloke, ape ineia iloke mulaŋ natun Abraham.

¹⁰ Apen i Nat tanun me mule ma sin sike wa sin vaesu o sava me tagea ti.

¹¹ Naŋ alo neira we roŋotag o ike ŋaŋ, ni we tuan mulaŋ we vava tenegag: ape ni me susurut o Jerusalem, wa ape neira we nonom si o marana non God te ŋaŋa lue gaplot ma.

¹² O manigiu ilone ni me vet wa, O tuara tanun liwoa me mule te vanua si a la mona o marana, qara kel ma.

¹³ Wa ni me suware ma suria ira rowrowovag anana saŋavul tuwale, me la muneira o pound saŋavul, ti vet mun neira wa, Tur gagagapalag nau gai kel ma.

¹⁴ Pa ira talo vanuana me ŋustupua, me vatraŋ nasalara tataga ineia, si a gaganag wa, Kamam gate maros i gene iloke si ni maranaga goro kamam.

¹⁵ Wa me ge tamaike, ni me la paso mona o marana, wa me kel ma, ni qara vatraŋ si a suware ma ira rowrowovag anana ilone, ni me la o som ti mun neira, sin gilala o sava me rowo ma mun neira ape nor o gagapalag.

¹⁶ Naŋ o moai me mule ma goroa, ti vet wa, Lord, nom o pound me ge raka tuan ma saŋavul.

¹⁷ Naŋ neia we vet munia wa, Aia, matai rowrowovag: ape me iloko we kokomag ape gene mantagai aneane, ka taur o mana goro o laqlaqe vanua ta saŋavul tuwale apena.

¹⁸ Wa o varuei me mule ma suria, ti vet wa, Lord, nom o pound me ge raka ma tavelima.

¹⁹ Naŋ ti vet mun neia mulaŋ wa, Iniko mulaŋ, ka toga liwoa goro o laqlaqe vanua ta tavelima.

²⁰ Wa o tuara mulaŋ me mule ma, ti vet wa, Lord, ilo ma, nom o pound iloke, na me taur pata, me sogon ti alo maŋmaŋ.

²¹ Ape nau me gogoloko, apeniko o tanun matawovat, ko we le kalo o sava ko gate map moma ti, wa we gorogoro o sava ko gate riv moma ti.

²² Naŋ neia we vet munia wa, Talo valama na te vevegiko, gai sokore rowrowovag: ko me gilala si nau o tanun matawovat, we le kalo o sava na gate map ti, wa we gorogoro o sava na gate riv ti.

²³ Pa o manigiu ilone ape sava ko gate le at o som iloke munragai we pute ape tano som? paso nan, na we kel ma, nau qara varus kel ape pulak, mun ilone mulaŋ me rowo lava ma ti apena.

²⁴ Naŋ ni me vava mun rasei we tira peteŋia wa, Tur lareag o pound nania, tur la mun i gene o pound saŋavul tuwale amaia.

²⁵ Naŋ neira we vet munia wa, Lord, o pound saŋavul tuwale veta amaia.

²⁶ Nau we vava mun kamiu wa, Te tuan mulaŋ munsei munsei me taur veta; wa isei qe tete taur mona, te lareag nania mulaŋ o gene ni we taur.

²⁷ Pa nava ira tavalalea mun nau ilone, gate maros ti si na maranaga goro neira, takira ma, a ge mateira alo nagok.

²⁸ Naŋ me vava paso o ike, ni me tira moai taso sage, we kalo i Jerusalem.

²⁹ Wa me ge tamaike, ni me rivtag o Bethphage wa o Bethania, ape tauwe we log si Olivet, ni me vatraŋ o tiŋqoro anana pulrua,

³⁰ ti vet wa, Ura van vano ilo vutre vanua we sar taniniga; pa we niŋa alolona, kamurua te ilo o nati ass me ligo vataqav, o tanun gate pute ilo tiqa avunana, ura mamasug, ura lavia ma.

³¹ Wa si isei ta varus kamurua wa, Ape sava kamurua we mamasug? kamurua te vava munia tamaike wa, I Lord we maros ranua.

³² Naŋ ra gene vatraŋ me vano at, me ilo qalo tama ni me vava ti mun rara.

³³ Naŋ rara we mamasug o nati ass, ira tagina me vava mun rara wa, Ape sava kamurua we mamasug o nati ass?

³⁴ Naŋ rara wa, I Lord we maros ranua.

³⁵ Wa irara me vanogagia sur i Jesus; me map nor o siopa vawo kulan o nati ass, wa me vapteg i Jesus avunana.

³⁶ Naŋ alo non o vanoga, neira me lilŋag nor o siopa goro o matesala.

³⁷ Wa me rivtag veta we taqel siwo a tauwe Olivet aia, o sul nol ira tiŋqoro me qeteg malakalaka wa we varean God mun o liŋai we poa ape vasasa ŋaŋ nol neira me ilo veta ti; we vava wa,

³⁸ Tur wievavae i maranaga we van ma alo sasan i Lord: o tamata vawo tuka, wa o leŋas avunana.

³⁹ Wa o tuan Pharise alo sul we vet munia wa, Vatogo, ka ŋorov goro ira tiŋqoro anama.

⁴⁰ Naŋ ni me valuira, me vet wa, Na we vava mun kamiu wa si iloke ŋaŋ ta toga roroŋo, o vat ŋaŋ te rororov raka.

⁴¹ Wa ni me rivtag, ti ilo o laqlaqe vanua, we taŋtaŋ goro,

⁴² ti vava wa, Si ko me gilala, iniko gai, alo qoŋima iloke, o gene ŋaŋ we tira ape nom o tamata! panava ilokenake me vatŋorag tagea nan namatama.

⁴³ Ape o qoŋ ŋaŋ te wesu apeniko, nom o tavalalea te tavig vutvut o geara wawaliogiko, te niniŋ goroko, te koko goroko valval,

⁴⁴ te visaragiko siwo, wa ira natuma alo loloma; wa tete tivtag alo iniko o vat avune vat; ape ko gate gilala naqoŋima we vaateviko alolona.

⁴⁵ Wa ni me mule pata ilo tinesara we roŋo, ti qeteg vurevure lue iragai we wolwol alolona;

⁴⁶ ti vet muneira wa, Me rave wa, Wa naimak mun ima tataro: nava kamiu me ge mun liara vuspal.

⁴⁷ Wa ni me vatvatogo valqoŋ alo tinesara we roŋo. Pa ira moe oloolo ŋaŋ wa ira vatogo ŋaŋ tara moai goro o sul me sike si a ge mateia:

⁴⁸ panava neira gate ilo qalo o sava neira te ge: ape o sul nol we tiŋtiŋqoroa, we sakau goro naliŋana.