O LEA WE WIA TAMA NAMON LUK ME RAVE 18 - O Vatavata we Garaqa 1931 (Vanuatu)

¹ Wa ni me vava tenegag mun neira, si o tanun ŋaŋ a tataro vagae ran, wa nipea naapera we motmot, ti vet wa,

² Alo tuara laqlaqe vanua o veveg apena, pa ni gate momogo God, wa naapena gate maragai o tanun.

³ Wa alo laqlaqe vanua ilone o naro; wa ni me mulemule vagaqoqo ma suria, ti vet wa, Ka sar mun o tavalalea ape nau.

⁴ Pa galewora ni gate maros: paso nan ni me vava roroŋo wa, Naapek gate momogo God, wa gate maragai mulaŋ o tanun;

⁵ panava ape naro iloke we vavagaile nau, na te sar ape neia, wa rarakut nau ni te mulemule galava ma.

⁶ Naŋ i Lord me vava wa, Tur tiŋqoro o sava i veveg variava me vava.

⁷ Pa wasi God tete sar ape tanun iloraka ŋaŋ anana we logia valqoŋ wa valmaran, pa ni we lolo malumlum ape neira?

⁸ Na we vava mun kamiu wa, Ni te sar ape neira gaplot; panava i Nat tanun te mule ma aŋaisa pa wasi ni te van suar tea o nomtup a marama?

⁹ Wa ni me vava tenegag mulaŋ tamaike mun o tuanrasei we sov avunara kel si we taniniga, wa we surtagtageag o sul nol we sea:

¹⁰ Irasei pul rua me mule sage ilo tinesara we roŋo si a tataro; tuwale o Pharise wa o varuei o rowoagtalsom.

¹¹ Wa o Pharise me tira we tataro vires neia wa, God, na we varean iniko, ape nau gate tama o tanun ŋaŋ o sul, neira we wosawosag, we variava, we pakapaka, si tama o rowoagtalsom iloke.

¹² Nau we garagara mamasa vagarua val wik, na we le o saŋavului nan nok o val tuvatuvag.

¹³ Nava o rowoagtalsom we tira arasu, gate maros we vawerei vires namatana ivunana, panava me tut navarana, ti vet wa, God, magarosa inau i ganganor.

¹⁴ Na we vava mun kamiu wa, I gene iloke me kel siwo ilo imana me veveg taniniga raka sage ineia nan o tuara; ape val sei qe soua, te ge pepewua; pa isei qe ge pepewu kelua, te ge rakatia sage.

¹⁵ Naŋ neira me tak ira tete ma suria, sin taŋovira; pa ira tiŋqoro me ilo qara ŋorov gorora.

¹⁶ Nava i Jesus me logira ma suria, ti vet wa, Tur ukeg ira natmera neira van ma surinau, wa turpea gogoroira, ape o marana non God norasei we tamaine.

¹⁷ We nun na we vava mun kamiu wa, Isei ta tete la mona o marana non God tama o natmera, ni tete mule pata lai tea ilolona.

¹⁸ Wa o tuara tanun liwoa me varusia, ti vet wa, Vatogo we wia, na ge o sava si na taur usurag mok o esu galava?

¹⁹ Naŋ i Jesus me vava munia, Ape sava ko we log nau si nau we wia? Itagai isei we wia, nava i tuwale ran, i God nane.

²⁰ Ko we gilala o lea vatraŋ ŋaŋ was, Nipea pakapaka, Nipea vus nawono, Nipea palpal, Nipea tila galegale, Ka nom mava i tamama tana ravevema.

²¹ Naŋ neia wa, Na me matagisgis goro ran ma alo reremera o gene ŋaŋ iloke.

²² Wa i Jesus me roŋotag o ike ŋaŋ, ti vet munia wa, Pa i tuwale ti tagai amaiko, ka ŋarag reag pulam o savasava nol, ka tirag valval munra masara, wa ko te taur moma o moegene avune tuka; wa mule ma, tataga inau.

²³ Naŋ ni me roŋotag o ike, ni me lolowono aneane; ape neia o tur mere savasava.

²⁴ Wa i Jesus we ilo si ni we lolowono aneane, ti vet wa, We gona tama avea gai munsei napulana we qoqo sin kalo pata ilo marana non God.

²⁵ Ape we toga wora si o kamel a kalo raveag lue o mate nidel, nan si o meresom a kalo pata ilo marana non God.

²⁶ Wa iragai me roŋotag we vet wa, Gai, isei te esu lai?

²⁷ Naŋ neia wa, O gene ŋaŋ amaira tanun tete lai, nava amen God te lai ran.

²⁸ Naŋ i Peter me vava wa, Ilo, ikamam me toavtag qet napulamam o savasava ŋaŋ wa me tataga iniko.

²⁹ Naŋ ni we vet muneira wa, We nun na we vava mun kamiu wa, Itagai tea o tanun me toavtag naimana, si rasoana, si ra tasina, si i tamana tana ravevena, si ra natuna, ape marana non God,

³⁰ pa wasi ni tete taur sal vagaqoqo alo masaoi nake iloke, wa o esu galava alo marama te rasu ma.

³¹ Naŋ ni me vile sea ma ira numei nirua, ti vava mun neira wa, Tur ilo ma, inina we mule kalo i Jerusalem, wa o gene nol amora prophet me rave ti apen i Nat tanun te tira ran.

³² Ape te ukeg kalo ineia mun o sul ŋaŋ we sea, wa te poroporosagia, wa te lalalamasagia, wa te anus avunana,

³³ wa neira te towosia wa te ge mateia, wa alo qoŋ vatoliu ni te tavaraka kel.

³⁴ Wa nalolora gate maran ilo tea ape gene ŋaŋ iloke, wa o vavae ilone me liŋarag nan neira, wa neira gate gilala tea o sava ŋaŋ me vava ti apena.

³⁵ Naŋ me ge tamaike, ni we mule peteŋ o Jeriko, o tuara matapei we pute pan matesala, ti valapaere.

³⁶ Wa ni me roŋotag o sul we mule talavivis, ti varus si o sava me ge.

³⁷ Naŋ neira me gaganag munia si i Jesus ta Nasaret we mule tal ma.

³⁸ Naŋ ti vava eleele, ti vet wa, Jesus, natun David, ka magarosa inau.

³⁹ Wa ira moesala me ŋorov goroa, sin toga roroŋo: panava ni me awo gagarakae nan amoa wa, Natun David, ka magarosa inau.

⁴⁰ Naŋ i Jesus me tira late, ti vatraŋira si a lavia ma suria; naŋ ni me rivtagia ti varusia wa,

⁴¹ O sava ko we maros si na ge muniko? Naŋ neia wa, Lord, si na ilo kel.

⁴² Naŋ i Jesus me vava munia wa, Ka iloilo kel mu laŋ, nom o nomtup me vaesuko.

⁴³ Naŋ ni me iloilo kel gaplot mulaŋ, ti tatataga ineia, ti loglog ronoga God, wa o sul nol we ilo, qara varean God.