O LEA WE WIA TAMA NAMON LUK ME RAVE 17 - O Vatavata we Garaqa 1931 (Vanuatu)

¹ Naŋ ni me vava mun ra tiŋqoro anana wa, Tete nonom lai pa si o gene ge tutuag te wot ran ma, panava tur magarosa isei o manigiu apena!

² We wia ras munia si me ligo o vat galgalolo ape nenena, wa me tul savragia ilo lama, nan ni wa ge tutuag tuwale nan ra mantagai ŋaŋ iloke.

³ Tur ilo goro kamiu: i tasima ta ge tatas, ka gol vatanaua; wa ni ta nom leas, ka nomvitag napugana.

⁴ Wa ni ta ge tatas muniko vaga lavearua alo qoŋ tuwale, wa vaga lavearua ta nug kel ma suriko, we vava wa, Nau we nom leas; ko te nomvitag munia.

⁵ Naŋ ira sala me vava mun i Lord wa, Ka tuan o nomtup mun kamam.

⁶ Naŋ i Lord wa, Si o nomtup tamen kamiu tam o siv mustard, kam te vava lai mun o sukomin iloke wa, Sug raka, riv leas alo lama; wa te roŋotag lai kamiu.

⁷ Pa isei amen kamiu o rowrowovag apena we vutvut o tano si we altag goro o sheep, pa ni ta kel ma nan o tuqei, te qara vava munia wa, Togtogoa ma gai, pute siwo ape ganagana?

⁸ Pa wasi ni tete vava munia wa, Wurvag gaksa sava tea si na gana, wa ka rotig goro naturiama si a gagapalag surinau, nau gai gana wa we un paso, ko qara gana qara un moma?

⁹ Ni te varean o rowrowovag qa ilone ape ni me ge o gene ŋaŋ me vatraŋia ti apena?

¹⁰ Tamaine mulaŋ gina kamiu, kam me ge paso qet o gene ŋaŋ me vatraŋ kamiu ti apena, tur vava wa, Ikamam o rowrowovag we mawmawui sasawuara, kamam me ge matagesegese o sava namomam ran gese si a ge.

¹¹ Naŋ me ge alo nor o vanoga i Jerusalem, ni me so mot alo vatitne Samaria wa Galilea.

¹² Wa alo ni we niŋa pata ilo tuara laqlaqe vanua, o tanun saŋavul tuwale o resresmavin we varniŋa neia, we tira asau.

¹³ Naŋ neira we log eleele, we vet wa, Jesus, Vatogo, magarosa kamam.

¹⁴ Naŋ ni me ilora, ti vet wa, Tur va at, tur gaganag natarapemiu mun ra oloolo. Naŋ me tamaike, neira me van at, wa qara wenewene kel.

¹⁵ Wa i tuwale nan neira me ilo si ni me wenewene kel, ti vusiag kel, wa mun o liŋai we poa ti log ronoga God.

¹⁶ Wa ti suragia ape nagona peteŋ naraŋona, ti vareania; pa ineia o ta Samaria.

¹⁷ Naŋ i Jesus we valui ti vet wa, Ira saŋavul tuwale gate wenewene kel? pa ra laveavat, neira avea?

¹⁸ Gate ilo rasei we vusiag kel ma si a ge o ronoga mun God, pa o tawu iloke tuwale?

¹⁹ Naŋ ni me vet munia wa, Tavaraka, van at, nom o nomtup me ge esu ko.

²⁰ Naŋ ra Pharise me varusia ape marana non God si aŋaisa te mule ma, wa ni me valui gorora ti vet wa, O marana non God gate mule ma alo tanun we matmatag apena.

²¹ Wa tete vava lai wa, Ilo ma, iake! si, Ilo, iane! ape ilo, o marana non God alo lolomiu.

²² Naŋ ni me vava mun ra tiŋqoro wa, O qoŋ ŋaŋ te rasu ma, nalolomiu te toron si kamiu a ilo naqoŋin i Nat tanun ta tuwale, panava tete ilo lai.

²³ Wa neira ta vava mun kamiu wa, Ilo, iane! Ilo ma, iake! turpea mulemule at, wa turpea tatataga neira.

²⁴ Ape tam o vila ti gapilwaŋa, ti siŋa levegao tavala tuka; tamaine mulaŋ i Nat tanun alo qoŋina.

²⁵ Pa amoa ni te roŋo magav ran vagaqoqo, wa o taraŋiu iloke te gevtag ranua.

²⁶ Wa tama me ge ti alo qoŋin i Noa we tuai; te tamaine mulaŋ gina aŋaisa alo qoŋin i Nat tanun.

²⁷ Neira me ganagana, me unun, me laglag, me togatoga amairasei, gai niŋa o qoŋ ilone i Noa me kalo pata ilo aka; wa o liliv me liliv, wa me ge tagea nol neira.

²⁸ Mulaŋ tama me ge ti alo qoŋin Lot; neira me ganagana, me unun, me wolwol ma, me wolwol reag, me rivriv, me tautaur o ima;

²⁹ pa alo qoŋ ilone i Lot me toa nan o Sodom, o av wa o malauganqat me tavtete ma vunana, me gao tagea nol neira.

³⁰ Te sasarita ran apena alo qoŋ ilone i Nat tanun te ŋaŋa lue ma alolona.

³¹ Alo qoŋ nane ilone, isei ta toga vawo qatiima wa pulan o savasava lele ima, ni nipea siwo goro si a lareag ilone; wa isei ta toga alo utag, ineia mulaŋ nipea vusiag kel goro o savasava me tikula veta.

³² Tur nom kel ape rasoan i Lot.

³³ Isei qe sike sin kokor goro naatana ni te ge tagea, pa isei qe ge tagea ni te vawota we esu.

³⁴ Na we vava mun kamiu wa, Alo qoŋ ilone o tanun pulrua te risa alo tano matur tuwale; te la raka tuwale, pa te raka vitag o varuei.

³⁵ Wa o vavine pulrua te galolo tuwale; te la raka i tuwale, pa te raka vitag o varuei.

³⁶ Wa pulrua alo utag; te la raka tuwale, pa te raka vitag o varuei.

³⁷ Naŋ neira we valui, we vava munia wa, Avea, Lord? Naŋ ni we vet muneira wa, O turiai ta avea, o mala ŋaŋ te vug tuwale apena.