O LEA WE WIA TAMA NAMON LUK ME RAVE 15 - O Vatavata we Garaqa 1931 (Vanuatu)

¹ Naŋ ira rowoagtalsom nol tara ganganor we petpeteŋia si a roŋotagia.

² Wa ira Pharise tara vatogo me wutoto apena we vava wa, I gene ilone we lav ira ganganor, wa we ganagana tuwale amaira.

³ Naŋ ni me vava tenegag tamaike mun neira, ti vet wa,

⁴ Isei amen kamiu pulan o sheep melnol, o melnol anai ta tagea nania, ni tete taŋovtag o sheep saŋavul laveavat o numei laveavat alo vanua vanameag, ti van goro ilone me tagea ti, ni gai ilo suar?

⁵ Wa me ilo paso, ti rig kalo, we malakalaka apena.

⁶ Wa me niŋa naimana, ti suware ma rapulsalana tara tagvanuana, ti vet wa, Tur malakalaka tuwale amenau; ape nau me ilo suar kel pulak o sheep me tagea ti nan nau.

⁷ Na we vava mun kamiu wa, Te malakalaka gina tamaine alo tuka apen i ganganor tuwale we nom leas, nan apen ra taniniga saŋavul laveavat o numei laveavat, o manig nomleas tagai amaira.

⁸ Si rosei mulaŋ o vavine pulan o som saŋavul amaia, o saŋavului ta tagea nania, tete tiu o pul, tete werasa naimana, we sike vagorgor ni gai ilo suar?

⁹ Wa me ilo suar paso ti suware ma raro pulsalana wa iraro tagvanuana, ti vet wa, Tur malakalaka tuwale amenau; ape na me ilo suar kel pulak o som me tagea ti nan nau.

¹⁰ Tamaine gina, nau we vava mun kamiu wa, Te malakalaka ape nagora angel anan God apen i ganganor tuwale we nom leas kel.

¹¹ Naŋ neia wa, Ranatunsei pulrua apena:

¹² wa o tawurmera me vava mun tamana wa, Mama, ka le ma mun nau natakele pulama we tira ape nau. Wa i tamana me aseg valrara napulana.

¹³ Wa o qoŋ gate purat me paso o tawurmera me vile nol tuwale, ti sirig ras ilo vanua we sea, ti ge garugaru viteg vanameag napulana ape togara kiskislag.

¹⁴ Wa me ganvun nol paso nania, o maro lawalawa qara ge lolovag o vanua ilone; wa ni me masmasawora raka apena.

¹⁵ Wa ni me mule we kata amen o tuara tagvanua talo vanua ilone; wa ni me vatraŋia at ilo utagina ape vaŋan qoe.

¹⁶ Wa ni me maros we gan toqo mun o wo tangae nagara qoe; pa isei gate la qalo munia.

¹⁷ Wa naliŋana me ŋaŋarag kel ma, ti vava wa, Nivisa ra rowrowovag we qil amen tamak we gana matila o sinaga, pa inau iloke we uro mate!

¹⁸ Na te tavaraka na te mule kel sur tamak, na te vet munia wa, Mama, na me ganganor goro vunana, wa alo nagoma,

¹⁹ wa na gate sar si a log natuma inau: ka ge inau tama o tuara rowrowovag anama me qil.

²⁰ Wa ni me tavaraka, ti van sir tamana. Pa ni qale ras i tamana me iloa, ti lolo magarosa neia, ti valago, ti suragia avune nenena, ti roromtagia.

²¹ Naŋ natuna me vet munia wa, Mama, na me ganganor goro vunana, wa alo nagoma, wa na gate sar si a log natuma inau.

²² Wa i tamana me vava mun ra rowrowovag wa, Tur la lue gaplot ma o moe siopa, tur saru goroa nia, wa saru goro napisuna mun o lala, wa saru goro namalekana;

²³ wa le lue ma o nat kau we wuras, tur vus mate, wa nina ganagana, nina malakalaka.

²⁴ Ape natuk iloke me mate ti, pa me esu kel; me tagea ti, pa me ilo suaria. Wa neira me malakalaka raka.

²⁵ Pa o moemera alo utag; wa alo we kel ma, we peteŋ o ima, ti roŋotag o vigo wa o sawai;

²⁶ wa ni me log tuara lumagav ma, ti varusia si o sava nane.

²⁷ Naŋ ti vet mun neia wa, I tasima me kel ma; wa i tamama me vus gan o nat kau we wuras, ape ni me lav esu kelua ma.

²⁸ Pa ni me lologagara, wa ni gate maros we mule pata. Pa i tamana me rowo lue we tiasia ma.

²⁹ Nava ni me valui we vava mun tamana wa, Ilo, o tau we qoqo tamaike nau me mawmawui muniko, wa na gate tames tea naliŋama, pa ko gate le tea mun nau o nat goat, si tak rapulsalak a malakalaka tuwale apena.

³⁰ Nava natuma iloke me kel ma, me ge ganvun ti napulama ape vavine pakapaka ŋaŋ, ko qara vus mate gan o nat kau we wuras.

³¹ Naŋ neia munia wa, Natuk, ko we gogae ran ma amen nau, wa napulak o savasava napulama;

³² nina malakalaka, nina qaraqara we wia nan, ape tasima iloke me mate ti, pa me esu kel; me tagea ti, pa me ilo suaria.