O LEA WE WIA TAMA NAMON LUK ME RAVE 14 - O Vatavata we Garaqa 1931 (Vanuatu)

¹ Naŋ me ge tamaike alo qoŋ mapsag, ni me mule pata ilo iman tuara moe Pharise si a gana o sinaga, wa neira we matagisgis goroa.

² Wa ilo, ape nagona o tuara tanun o pura apena.

³ Wa i Jesus me valui goro, we vet munra vatogo ŋaŋ tara Pharise wa, We sar ape lea si a ge esu o gopae alo qoŋ mapsag?

⁴ Pa neira me naenae roroŋo. Naŋ ni me tauria, me ge esua, wa me ukegia.

⁵ Naŋ ni me vava muneira wa, Isei nan kamiu pulan o ass si o kau me masu ilo qaraŋa, tete rave kalo gaplotua alo qoŋ mapsag?

⁶ Pa neira gate valui goroa lai mulaŋ ape gene ŋaŋ iloke.

⁷ Naŋ ni me vava tenegag mun ragai me suware ma ti, ape ni me ilo vaglala ineira we iloiloraka mora o moe tanoi, ti vet mun neira wa,

⁸ Si isei qe suware ko ma ape wosolagia, nipea putepute siwo ivune moe tano putepute: nan wa tamaike wun, te suware ma isei we liwoa naniko,

⁹ wa i gene me suware kamurua ma ti te mule ma te vava muniko wa, La tanoi ma mun i gene iloke: wa ko te qeteg lav apemaragai o tanoi paspasoanai.

¹⁰ Panava isei qe suware ko ma, ka mule ka pute alo tanoi paspasoanai, si aŋaisa i gene we mule ma me suware ko ma, ni te vet muniko wa, Pulsala, mule kalo sage ma; wa ko te ronoga tamaike apena alo nagora nol we pute siwo tuwale we ganagana amaiko.

¹¹ Ape val sei qe soua, te ge pepewua; pa isei qe ge pepewu kelua, te ge rakatia sage.

¹² Naŋ ni me vava mun i gene me suwarea ma ti wa, Ko qe ge o ganagana liwomaran, si o ganagana alo ravrav, nipea suwasuware ma rapulsalama, si ratasima, si rasogoma, si ratagvanuama o meresom, nan neira wa suware keluko, wa te varsar muniko apena.

¹³ Panava alo ko we ge o ganagana, ka suware ma ra masara, ra mut, ra qages, ra matapei;

¹⁴ wa te wievavae ko apena; ape tagai amaira si a varsar lai muniko: panava te varsar muniko alo ira taniniga te tavaraka kel.

¹⁵ Naŋ o tuarasei tamaira we gana tuwale amaia me roŋotag o ike naŋ, ti vet munia wa, Tur wia isei te ganagana o sinaga alo marana non God.

¹⁶ Nava ti vet muneira wa, O tuarasei me ge o ganagana liwoa, wa me suwarera ma we qoqo.

¹⁷ Naŋ alo masao qoŋ we gana alolona ni me vatraŋ o rowrowovag anana sin gaganag mun ragai me suwarera ma ti, was, Tur van ma, ape me ge taurmate paso o savasava.

¹⁸ Wa neira nol me vet raka si we gona nan. O moai me vava munia wa, Nau me la goro o malatou, wa na te sage lue ran si na ilo: na we paere muniko si ka ilo roroŋo inau.

¹⁹ Wa o tuara tanun me vava wa, Nau me wol o kau saŋavul tuwale, na we mule we ge iloilo neira: na we paere muniko si ka ilo roroŋo nau.

²⁰ Wa o tuara mulaŋ me vava wa, Nau me lag o vavine, o manigiu o ine na tete mule lai apena.

²¹ Naŋ o rowrowovag ilone me kel ma, me gaganag mun i tagina o gene ŋaŋ iloke. Naŋ i tagiima we lologagara, ti vet mun o rowrowovag wa, Ka va togtogoa ilo matesala liwoa ŋaŋ wa ilo manursala ŋaŋ talo laqlaqe vanua, wa vanogag ma ira masara, wa ira mut, wa ira matapei, wa ira qages.

²² Wa o rowrowovag ilone ti vet wa, Lord, ilone ko me vareg ti apena me paso veta; wa o masaoi qale toga.

²³ Naŋ i tagina me vava mun o rowrowovag wa, Rowolue ilo matesala wa ilo geara ŋaŋ, pa ge ineira neira mule pata ma, si naimak ni ura.

²⁴ Ape inau we vava mun kamiu wa, Tagtagai qalo isei nan ragai me suware ma ti te ŋit ilo mok o ganagana.

²⁵ Naŋ o sul we qoqo we gogorag tuwale amaia: naŋ ni me kilau, ti vet mun neira wa,

²⁶ Si isei qe mule ma sur nau, ni ta tete ŋustup i tamana, wa i ravevena, wa i rasoana, wa ira natuna, wa ira tasina, wa ira tutuana, we nun, wa naesuna kel mulaŋ, ni tete tiŋqoro anak lai.

²⁷ Wa isei ta tete rig non o wolowolo, wa ta tete mule tataga inau, ni tete tiŋqoro anak lai.

²⁸ Ape isei nan kamiu qe maros we taur o salo ima, wasi tete pute siwo amoa sin vasogo o som ni te vile apena, si amaia we sasarita ape we taur paso si tagai?

²⁹ Nan wa tamaike wun, me giliag paso o sagere ima wa ni gate taur paso lai, wa irasei nol qe ilo te porosag raka ineia wa,

³⁰ I gene iloke me qeteg taur, panava ni gate taur paso lai.

³¹ Si isei o maranaga we rowolue si a vagalo amen o tuara maranaga, wasi tete pute varvava apena si ineia tara o tanun anana tar vagasaŋavul tuwale te tira goro lai o tuara, tara tar vagasaŋavul rua we mule goroa ma?

³² Pa si ta tagai, o tuara qale ras, ni we vatraŋ nasalana we paere si a ul vagalo.

³³ Tamaine gina isei nan kamiu ta tete tivtag pulan o savasava, ni tete tiŋqoro anak lai.

³⁴ O nawo we wia; pa si o nawo ta tamtamelea, te tasig kel lai mun o sava?

³⁵ Gate tira ape tano wa ape masoko, pa te savrag reag. Isei naqorona apena sin roŋotag, ni roŋotag nia.