O LEA WE WIA TAMA NAMON LUK ME RAVE 13 - O Vatavata we Garaqa 1931 (Vanuatu)

¹ Naŋ o tuaniu aia alo qoŋ nane ilone we gaganag munia ape ra ta Galilea, i Pilat me lor tuwale nanarara mun nor o gene oloolo.

² Naŋ i Jesus me valuira, we vet wa, Kamiu we nonom si ra ta Galilea ilone me ganganor sal ra ta Galilea nol, ape neira me roŋovivtig tamaine?

³ Na we vava mun kamiu wa, Tagai nan: pa si kam ta tete nom leas, kamiu nol te tagea ran gese tamaine.

⁴ Si o tanun ilone saŋavul tuwale o numei laveatol, o saloima a Siloam me masu avunara, me qisaŋ matemate neira, kamiu we nonom si o pug avunara sal o tanun nol we toga a Jerusalem?

⁵ Na we vava mun kamiu wa, Tagai nan: pa si kam ta tete nomleas, kamiu nol te tagea ran gese tamaine.

⁶ Wa ni me vava tenegag tamaike; Pulan o tuara tanun o fig me riv ti alo non o tuqe vine; wa ni me mule ma sin sike o woai apena, panava gate sike suar.

⁷ Naŋ ni me vava mun i gene we ilogoro vine wa, Ilo, o tau nitol nake nau me mule ma we sikesike o woai ape fig iloke, panava na gate ilo qalo; tara savrag reag: ape sa mulaŋ we ge o tano sin maraŋ?

⁸ Naŋ neia we valuia wa, Lord, ni toga galtag alo tau iloke mulaŋ, nau gai gil waliog wa we tavig peteŋ mun o masoko.

⁹ Wa ta uwa apena aŋaisa, we wia: pa si ta tagai, ko qara tara savrag reag.

¹⁰ Wa ni me vatogo alo tuara ima siwo tuwale alo qoŋ mapsag.

¹¹ Wa ilo, o vavine aia o vui ge mageregere amaia, o tau saŋavul tuwale o numei laveatol veta, we ser taqataqa, wa gate tototoepe tea.

¹² Naŋ i Jesus me iloa, me logia ma, we vava munia wa, Vavine, me mamasug veta iniko nan nom o mageregere.

¹³ Wa ni me taŋovia: wa ni me totoepe gaplot kel, wa ni me log ronoga God.

¹⁴ Wa o moe tanun goro o ima siwo tuwale me valui goro, me lologagara ti apen i Jesus teve ge esu alo qoŋ mapsag, ti vet mun o sul wa, O qoŋ laveatea apena te gagapalag lai alolona, alo qoŋ ŋaŋ ilone tur mule ma si a ge esu kamiu, panava turpea alo qoŋ mapsag.

¹⁵ Nava i Lord me valui goroa, ti vet wa, Ra sokoi goro, valsei amen kamiu gate ul pulan o kau si pulan o ass nan o tano ganagana alo qoŋ mapsag, gate lavia at ilo pei?

¹⁶ Pa o tavine iloke, natun Abraham, i Satan me rotia, ilo, o tau saŋavul tuwale o numei laveatol veta, gate wia si a ul o garotrot iloke nania alo qoŋ mapsag?

¹⁷ Wa alo we vava tamaike ira tavtavalina ŋaŋ naapera me maragai: wa o sul nol we malakalaka ape gene ŋaŋ we ronoga ni me ge.

¹⁸ Pa naŋ ni me vava wa, O marana non God we sasarita ape sava? wa na te tenegag apena si o sava?

¹⁹ We tam o siv mustard o tanun me la, me riv alo tuqena; naŋ me totou, me qeteg tangae liwoa, wa o manu talo maea we anig pata alo waŋwaŋarana.

²⁰ Wa ni me vava mulaŋ wa, Na te tenegag ape marana non God si o sava?

²¹ We tam o leven, o tavine me le, me vatŋorag alo wumeto flour nitol, gai lolog leven nia.

²² Naŋ alo non o vanoga ni me sir vanua val vutre vanua, we vatvatogo we kalokalo taso i Jerusalem.

²³ Wa o tuarasei me vava munia wa, Lord, iragai te esu aŋaisa, neira o tapai? Naŋ ni we vet muneira wa,

²⁴ Tur gagapalag lalaktera si a kalo pata ilo mategeara mantagai: ape na we vava mun kamiu wa, We qoqo te sike si a kalo pata, pa tete lai.

²⁵ Alo masaoi o tagiima qe tavaraka, wa qe tipag goro o mateima, wa kamiu we tira raka avarea, we niŋniŋ ape mateima, we vava wa, Lord, Lord, ka waka mun kamam; naŋ ni te valui te vet wa, Nau gate gilala kamiu mavea.

²⁶ Naŋ alo ilone ikamiu te vava raka wa si, Kamam me ganagana me imaima ape nagoma, wa ko me vatvatogo alo matesalamam.

²⁷ Pa ni te vava wa, Nau we gaganag mun kamiu wa, Na gate gilala kamiu mavea; tur toa reag nan nau ragai nol we gagapalag ganganor.

²⁸ O areare aia wa o garagara ŋiŋiŋ, alo kam we ilo i Abraham tana Isaak, ratol Jakob, tara o vavtig prophet nol, alo marana non God, pa we tuqerag lue kamiu ivarea.

²⁹ Wa neira te mule ma ape tano rowone loa, ape tano tulne loa, wa i vano, wa i sage, wa neira te pute siwo alo marana non God.

³⁰ Wa, ilo ma, o tuan rasei a tagir pa te moai aŋaisa, wa o tuan rasei me moai ti pa te tagir aŋaisa.

³¹ Naŋ alo masao qoŋ nane ilone o tuan Pharise me mule ma, we vava munia wa, Rowo lue reag, van at nan o vatuke: apen i Herod we maros we ge mateiko.

³² Naŋ ni me vava mun neira wa, Tur va at momiu, tur gaganag mun o fox ilone wa, Ilo ma, na te vasaug ti o vui we tatas ŋaŋ, na te ge esu ti ira gopae a qarig a maran, wa alo qoŋ vatoliu te ge taurmate vunvun inau.

³³ Panava, a qarig, a maran, a risa, namok ran si na qale mulemule: o manigiu o prophet tete mate asau lai nan o Jerusalem.

³⁴ Gai Jerusalem, Jerusalem, we ge matemate ira prophet ŋaŋ, wa we patpatuŋ irasei me vatraŋ ma ti suria! vagavisa, gai, na me maros mok si na vile tuwale ira mermereima, tama o toa ra tur nanatuna alalaŋe panena, pa kamiu gate maros!

³⁵ Ilo ma, me tivtag mun kamiu naimamiu we wou; wa na we vava mun kamiu wa, Kamiu tete ilo mulaŋ nau, kamiu gai vava si, Tur wievavae i gene we mule ma alo sasan Lord.