O LEA WE WIA TAMA NAMON LUK ME RAVE 12 - O Vatavata we Garaqa 1931 (Vanuatu)

¹ Naŋ alo masaoi nane ilone o sul tartar me vug vaqirqir tuwale we varvaravara kelkel neira, ti vava raka mun ra tiŋqoro amoa wa si, Tur ilogoro kamiu nan o leven nora Pharise, o sokoi goro nan.

² Pa itagai tea me lil goro ti, pa was te sere lue aŋaisa; wa itagai tea me vatŋorag ti, pa was te gilala lai aŋaisa.

³ O manigiu ilone o sava tea kam me vava alo silsiliga te roŋotag alo maran; wa o sava kam te vaŋut alo qoronsei alo nin te toretore avune qatiima apena.

⁴ Wa inau we vava mun kamiu rapulsalak wa, Turpea gogogolo irasei te ge mate o turiai, wa paso nan tagai amaira si neira ge lai.

⁵ Pa na te gaganag lue moai mun kamiu kam te gogolo isei. Tur gogolo i gene ilone, me ge mate veta, wa we mana we savrag ilo Geena av: we nun na we vava mun kamiu, Tur gogolo ineia.

⁶ Tete wol tea o wovile tavelima mun o qatut som nirua? Pa tete titatala si ta tuwale nan ilone ŋaŋ alo nagon God.

⁷ Pa naulumiu gai avune qatumiu me vasogo nol veta. Turpea gogogolo: kamiu we mava aneane nan o wovile we qoqo.

⁸ Wa na we vava mun kamiu wa, Val tanun te gaganag lue ape nau alo nagora tanun, i Nat tanun te gaganag lue ape neia alo nagora angel ŋaŋ non God.

⁹ Pa isei qe tala inau alo nagor o tanun ŋaŋ, inau te tala ineia alo nagor o angel ŋaŋ non God.

¹⁰ Wa val tanun qe log o vavae apen i Nat tanun, te nomvitag munia: panava isei qe liŋasapur o Vui we Roŋo tete nomvitag lai munia.

¹¹ Wa alo neira qe tak kamiu ape ima siwo tuwale ŋaŋ, wa goro ra veveg tara ragai we liwoa goro, turpea nononom teqateqa si kam te is tama avea nan kamiu, si kam te valui goro tama avea, si kam te vava o sava:

¹² ape o Vui we Roŋo te vatogo kamiu alo masao qoŋ ilone tama namomiu ran si a vava.

¹³ Naŋ isei alo sul me vava munia wa, Vatogo, ka vet mun tasik sin aseg napulan tamankara mun kara.

¹⁴ Naŋ neia wa, Gai tanun, isei me vono inau si na veveg, wa si na aseg o savasava mun kamiu?

¹⁵ Naŋ ni me vet mun neira wa, Tur ilogoro, wa tur ora goro kamiu nan o liŋe ararike nol; ape esuve tanun gate tira alo we ura sal munia nan napulana ŋaŋ.

¹⁶ Wa ni me vava tenegag mun neira, ti vet wa, Natuqen o tuara tanun meresavasava me asoa:

¹⁷ wa ni me nonom vasarig alo toqana apena, we vet wa, O sava na te ge? ape tagai amenau si na sogon gaksa o sinaga avea.

¹⁸ Naŋ neia wa, Na te ge tamaike: na te sagaro nok o qea ŋaŋ, wa te taur we poa nan, wa na te sogon tuwale gak o sinaga wa pulak o savasava ŋaŋ aia.

¹⁹ Wa na te vava mun naatak wa, Atak, pulama o gene we qoqo me risa taurmate veta ape tau tar, mapsagiko, ganagana, imaima, malakalaka apena.

²⁰ Panava God me vava munia wa, Qaqae, alo qoŋ nake iloke neira te varus tataga kel naatama naniko; wa te pulansei o savasava ŋaŋ ko me sogon taurmate ti?

²¹ Tamaine gina o tanun qe vile tuwale o moegene ŋaŋ munia kel, pa ni gate meresom sur God.

²² Naŋ ni me vava mun ra tiŋqoro anana wa, Manigiu ilone na we vava mun kamiu wa, Turpea nononom teqateqa ape esumiu, kam te gana o sava; wa nipea mulaŋ ape turiamiu, te saru goro mun o sava.

²³ Ape o esu we raka sage nan o sinaga, wa o turiai nan o siopa.

²⁴ Tur nonom nurnur ape malau ŋaŋ, si neira gate savsavur, gate gorogoro; nor o pugoro tagai wa nor o qea tagai: pa God we vaŋan neira: sa si kamiu gate mava aneane nan o malau ŋaŋ?

²⁵ Isei tamen kamiu, ni ta nonom teqateqa apena, we tuan lai natarapena mun o sogosiwo vatuwale?

²⁶ Pa si kamiu ta tete ge lai o gene mantagai aneane, ape sava kamiu we nonom teqateqa ape gene ŋaŋ we sea?

²⁷ Tur nonom nurnur ape nalnal ŋaŋ, we poapoa gasavai: gate mawmawui, gate vauvau; pa na we vava mun kamiu wa, I Solomon ilone alo leŋasina nol gate saru goro iloa tama i tuwale nan o ine ŋaŋ.

²⁸ Pa si God we saru goro tamaine o valis alo malatou, we toga qarig, wa amaran te savrag ilo um; sa si ni tete saru goro raka sage kamiu, ira nom qerqeret?

²⁹ Wa mulaŋ turpea sikesike o sava kam te gana, wa kam te ima, wa turpea nononom sagelaŋalaŋa apena.

³⁰ Ape o sul ŋaŋ we sea a marama we sike o ine ŋaŋ; nava i Tamamiu we gilala ape kamiu we maros ran o ine ŋaŋ.

³¹ Panava tur sikesike o marana non God, wa te tuan mun kamiu o gene ŋaŋ iloke.

³² Turpea gogogolo, vavtig sheep mantagai; ape i Tamamiu we lolowia si a le mun kamiu o marana.

³³ Tur ŋarag reag pulamiu o savasava, wa tur lele aleŋa at; tur ge momiu o taŋa som tete mosiu lai, o moegene vawo tuka tete rowo mot lai, o tanun pal tete peteŋ aia, wa o rupe tete gana mosiu.

³⁴ Ape nomiu o moegene qe avea, natoqamiu te toga mulaŋ aia.

³⁵ Naweremiu neira rotig goro, wa nomiu o pul we lawalawa.

³⁶ Wa i kamiu tama o tanun we nare i lord ineira te kel ma nan o wosolagia; si ni te niŋa ma, te niŋniŋ, wa neira te waka gaplot munia.

³⁷ Tur wia ira rowrowovag ilone, i lord te mule ma we ilora we mamata goro: we nun na we vava mun kamiu, ni te rotig goro natoqana, te vapteg neira ape ganagana, te rowo lue ma we tataga surira.

³⁸ Wa si ni ta mule ma alo masao mamamata o varuei, si alo vatoliu, wa te ilora tamaike, tur wia o rowrowovag ŋaŋ ilone.

³⁹ Nava tur gilala momiu iloke, si i tagiima me gilala alo masao qoŋ tama avea o tanun pal te mule ma, ni me mamata goro, wa gate ukeg naimana si a tike sau.

⁴⁰ Wa ikamiu mulaŋ gai tur toga taurmate; ape alo masao qoŋ kamiu gate nonom apena i Nat tanun te mule ma alolona.

⁴¹ Naŋ i Peter wa, Lord, ko we vava tenegag tamaike mun kamam vires, si mun o sul nol mulaŋ?

⁴² Naŋ i Lord we vet wa, Isei gai i ilogoro ilone we kokomag wa we menaro, i tagina te vonogia avunara talo imana, si a tiratirag gar o sinaga muneira alo tur qoŋira?

⁴³ Tur wia i rowrowovag ilone, i tagina te mule ma te iloa we gagapalag tamaike.

⁴⁴ Nau we vava nun mun kamiu wa, ni te vonogia avune pulana ŋaŋ.

⁴⁵ Panava si i rowrowovag ilone te vava alo toqana wa, I Lord inau we maul nan wa kel ma; wa ni te towos raka ira lumagav wa iraro malamala, te ganagana, wa te unun, te maleslesu nia;

⁴⁶ i tagin o rowrowovag ilone te kel ma alo qoŋ ni gate nereia alolona, wa alo masao qoŋ ni gate gilala apena, wa te sal wora ineia, wa te map natakelena amen ragai gate kokomag.

⁴⁷ Wa i rowrowovag ilone me gilala i lord neia we maros o sava, pa ni gate ge taurmate, wa ni gate ge tataga non o maros, te towosia vaga qoqo.

⁴⁸ Panava isei gate gilala wa me ge sasarita ape te towosia, tete towos vagapuratia. Qe le ti munsei we qoqo, te sike kel we qoqo nania; wa qe sueg we qoqo munsei, te varus tataga kel we qoqo sal munia.

⁴⁹ Na me mule ma si na savrag o av ilo marama; pa na we maros tea o sava, si me tiu veta?

⁵⁰ Panava o vasugroŋo amen nau te vasugroŋo inau nia; wa we niniŋ goro tama avea nalolok gai ge paso ran!

⁵¹ Kamiu we nonom si nau me mule ma si na la ma o tamata alo marama? Nau we vava mun kamiu wasi, Tagai, pa o vile wora.

⁵² Pa nan ilokenake pul tavelima alo ima tuwale te vile wora, nitol nan pulrua, wa nirua nan pultol.

⁵³ Te vilewora neira, o mama nan natuna, wa o natui nan tamana; wa o veve nan natuna o vavine, wa o natui o vavine nan ravevena: wa ro qaliga nan ro qaligana.

⁵⁴ Naŋ ni me vava mun o sul wa, Si kamiu qe ilo o maligo qe sigag ape tano tulne loa, kamiu we vava mot was, O wena ti garu ma; wa ti tamaine.

⁵⁵ Wa kamiu qe ilo o togalau qe sawu ma, we vava was, O tutunsag apena; wa ti tamaine.

⁵⁶ Ira sokoi goro, kamiu we gilala we gaganag vaglala ape nago tuka wa ape nago tano: pa ape sava kamiu gate gilala we gaganag vaglala ape masaoi iloke?

⁵⁷ Wa ape sava kamiu gate veveg matapumiu ape liŋai we taniniga?

⁵⁸ Ape si kamurua tama o tavalalea qe mulemule sur i liwoa goro, ka ge iloilo maremare a matesala si a ukeg keluko nania; nan ni wa van raverave ko wun sur i veveg, wa i veveg we suegiko mun i gagapalag, wa i gagapalag we tuqeragiko ilo ima rotrot.

⁵⁹ Nau we vava muniko wa, Ko tete rowolue ilo nan, ko gai wono qet ran o namei qatutui.