O LEA WE WIA TAMA NAMON LUK ME RAVE 10 - O Vatavata we Garaqa 1931 (Vanuatu)

¹ Naŋ iloke ŋaŋ me paso, i Lord me vonog raka tuan rasei we sea saŋavul lavearua, ti vatraŋira pulpul rua at ape nagona ilo val laqlaqe vanua, wa valvatiu ŋaŋ, ni te mule mona aŋaisa aia.

² Naŋ ni me vava mun neira wa, O gorogoro we poa, pa ira mawmawuitag o tapai: pa tur tataro mun i Lord i tag gorogoro, ni vatraŋ o tanun mawmawui ŋaŋ ape non o gorogoro.

³ Tur vano at: ilo ma, na we vatraŋ kamiu at tam o nat sheep ŋaŋ ilo vatitne qoe kurkur.

⁴ Turpea roaroan o taŋa som, wa nipea o tapera, nipea o sarusaru goro malekai: turpea wievavae isei a matesala.

⁵ Kam qe mule pata ilo sava ima, tur vava raka wa, O tamata mun o ima iloke.

⁶ Wa si ta nat tamata aia, o tamata anomiu te gara avunana: pa si ta tagai, o tamata anomiu te nug kel ma sur kamiu.

⁷ Tur toga alo ima ilone nane, we imaima wa we ganagana o gene ŋaŋ tamaira: apen i mawmawuitag we sar ape non o rusarusai: turpea sirsirig valuima.

⁸ Wa kam qe mule pata ilo sava laqlaqe vanua, wa neira qe lav vasgot kamiu, tur ganagana o savasava neira te sogo mun kamiu.

⁹ Wa tur ge esura we gopa aia, wa tur gaganag mun neira wa, O marana non God me susurut ma sur kamiu.

¹⁰ Pa kam qe mule pata ilo sava laqlaqe vanua, wa neira tete lav vasgot kamiu, tur rowolue ilo matesala ŋaŋ we tawela aia, tur vava wa,

¹¹ O wuwue tano iloke gai tape vanuamiu me gara ape raŋomam ikamam we maŋreag goro kamiu: panava tur lolomaran o ike, si o marana non God me susurut ma.

¹² Pa nau we vava mun kamiu wa, Te mataketake mun Sodom alo qoŋ iloneia, nava mun o laqlaqe vanua ilone tagai.

¹³ Tur magarosa iniko Korasin! tur magarosa iniko Bethsaida! ape si me ge o vasasa ŋaŋ a Tur wa a Sidon, tama me ge ti alo kamurua, irarua me nom leas we tuai veta, we putepute alo siopa nolava wa o tarowo.

¹⁴ Panava te mataketake mun Tur wa Sidon alo qoŋ veveg, nava mun kamurua tagai.

¹⁵ Pa iniko, Kapernaum, te ge rakatiko niŋa o tuka? te savragiko siwo i Panoi.

¹⁶ Isei qe roŋotag kamiu we roŋotag inau; wa isei qe gevtag kamiu we gevtag nau: pa isei qe gevtag nau we gevtag i gene me vatraŋ nau ma.

¹⁷ Naŋ ira saŋavul lavearua me vusiag malakalaka kel ma, we vava wa, Lord, o vui we tatas ŋaŋ gai me map siwo alalaŋamam alo sasama.

¹⁸ Naŋ neia wa, Na me ilo i Satan tam o vila me masu nan o vunana.

¹⁹ Ilo ma, na me le veta mun kamiu o mana si kamiu a vara valaqat o mata ŋaŋ wa o golowaŋara, wa goro o vavakae nol non o tavalalea: wa tagai o sava te ge manaras ilo kamiu.

²⁰ Pa turpea malakalaka ape ike, wa si o vui ŋaŋ me map siwo alalaŋamiu; nava tur malakalaka ape me rave veta nasasamiu avunana.

²¹ Wa alo masao qoŋ ilone ni me qaraqara mun o Vui we Roŋo, ti vava wa, Na we varean iniko, Mama, Lord goro o vunana wa o lalaŋana, ape ko me liŋarag tagea o gene ŋaŋ iloke nan ra lolomaran wa ra menaro, nava me gaganag lue munira tete ŋaŋ: we nun, Mama, ape we wia tamaine alo nagoma.

²² Wa ni me kilau we vava mun ra tiŋqoro wa, I Tamak me le nol ran ma mun nau o savasava ŋaŋ: wa tagtagai qalo o tanun we gilala isei o Natui, nava o Mama; wa tagtagai qalo o tanun we gilala isei o Mama, nava o Natui we gilala, tana sei mulaŋ o Natui we maros we gaganag lue ineia munia.

²³ Wa ni me kilau mun ra tiŋqoro ti vava vires mun neira wa, Tur wia o matai ŋaŋ we ilo o gene ŋaŋ kam we ilo.

²⁴ Ape na we vava mun kamiu wa, Ira prophet tara maranaga ŋaŋ we qoqo me maros ti si a ilo o gene ŋaŋ kamiu we ilo, nava gate ilo; wa si a roŋotag o gene ŋaŋ kamiu we roŋotag, nava gate roŋotag.

²⁵ Wa ilo, o tuara vatogo me tavaraka we meregalea, ti vava wa, Vatogo, o sava na te ge si na taur usurag mok o esu galava?

²⁶ Naŋ ni we valui wa, O sava me rave veta alo lea? ko we vasogo tama avea?

²⁷ Naŋ neia we valuia wa, Ka tape i Lord God iniko mun natoqama nol, wa mun naatama nol, wa mun nom o tinegaro nol, wa mun nom o nonomia nol: wa i tagvanuama tama iniko kel.

²⁸ Naŋ ni we vet munia wa, Ko me valui taniniga: ka ge tamaine wa ko te esu.

²⁹ Wa ni we maros we ge tintin naapena, ti vava mun i Jesus wa, Pa isei i tagvanuak?

³⁰ Naŋ i Jesus me valui goroa wa, O tuarasei me taqel sur siwo nan o Jerusalem i Jeriko, pa me roro ilo tanun vus pal, wa neira me saru reag non o siopa, me towosia, me rowo vitagia, mantagai ti e te mate.

³¹ Wa o tuara oloolo me taqel gap siwo alo matesala ilone, wa me iloa, me mule sispara.

³² Wa tamaine mulaŋ gina o tuara ta Levi me niŋa o vatine, ti iloa, ti mule sispara.

³³ Nava o tuara ta Samaria, alo non o vanoga me niŋa ineia, me iloa, ti lolo magarosa ineia,

³⁴ ti van ma suria, ti rot goro o mate mataqa, ti liŋ o nimiu wa o wine apena, ti vaptegia avune pulan o ass, ti takia ilo ima tawu, ti tataga suria.

³⁵ Wa alo matava sin mule, ti raun lue o som nirua, we la at mun o tagiima, ti vet wa, Ka tataga suria; wa o sava ko ta la sal ape neia, nau we kel mulaŋ ma, wa na te wono pug muniko apena.

³⁶ Ko we nonom isei nan ratol me qeteg tagvanua mun o tanun me roro ti ilo tanun vus pal?

³⁷ Naŋ neia wa, I gene me gagapalag magarosa munia. Naŋ i Jesus ti vet munia wa, Ka van, ka ge moma tamaine.

³⁸ Naŋ alo vanoga ni me mule pata ilo tuara vanua: wa o tuara vavine nasasana i Martha me lav vasgotia ilo imana.

³⁹ Wa i tasina apena nasasana i Meri; wa ineia iloke me pute rivtag naraŋon i Lord, ti roŋroŋotag naliŋana.

⁴⁰ Naŋ me valeŋai i Martha sin lapasag vagaqoqo: wa ni me peteŋia ma, ti vava wa, Lord, ko gate nonom apen tasik me tivtag nau na lapasag magesek? Ka vet munia apena sin piriŋ nau.

⁴¹ Naŋ i Jesus me valui goro we vet munia wa, Martha, Martha, ko we nom teqateqa ape gene we qoqo, wa natoqama we matikotiko.

⁴² Pa o gene tuwale turwia matamot: wa i Meri me ilo sur anona o tavaliu we wia iloke, wa tete lareag ran nania.