John 9 - O Vatavata we Garaqa 1931 (Vanuatu)

¹ Wa alo ni me mule sispara, ni we ilo o tuara tanun, o matapei alo wotava ran ma.

² Naŋ ira tiŋqoro we varusia wa, Vatogo, isei me ganganor, i gene iloke, si i tamana tana ravevena, pa ni me wota matapei apena?

³ Naŋ i Jesus me valui goro wa, I gene iloke gate ganganor, wa gate i tamana tana ravevena; pa o manigiu o gagapalag mon God te ŋaŋa lue alo ineia.

⁴ Namonina ran si nina gagapalag o gagapalag mon i gene me vatraŋ nau ma alo qale maran; o qoŋ we rasu ma isei tete gagapalag lai alolona.

⁵ Alo inau qale toga alo marama, inau o marmararan talo marama.

⁶ Ni we vava tamaike, pa ti anus siwo ilo tano, ti ge sin puaka mun o anus, ti nonon namatan i gene matapei mun o puaka ilone,

⁷ ti vet munia wa, Mule, aqo alo qilo Siloam (we vava leas si, I gene vatraŋ). Wa ni me mule, ti aqo, ti kel ma, we iloilo.

⁸ Wa ira tagvanuana wa irasei me iloiloa ti we tuai si ni we valapaere, we vava wa, Iloke wun i gene me putepute ti we paepaere?

⁹ Naŋ o tuaniu wa, Ineia; naŋ o tuaniu mulaŋ wa, Tagai, pa tama ineia; naŋ neia wa, Inau.

¹⁰ Naŋ neira we vava munia wa, Namatama me lik gasavai?

¹¹ Naŋ ni me valui goro wa, I gene nasasana i Jesus me ge o puaka, ti nonon namatak nia, ti vet munau wa, Mule i Siloam, wa ka aqo; wa na me mule, me aqo, pa me iloilo.

¹² Naŋ neira munia wa, Avea ineia? Naŋ neia wa, Esi, na gate gilala.

¹³ Wa neira we tak i gene me matapei ti we tuai sur ira Pharise.

¹⁴ Wa o qoŋ mapsag ilone i Jesus me ge o puaka, me ge lik namatana alolona.

¹⁵ O manigiu o ine mulaŋ ira Pharise we varusia ni me iloilo gasavai. Naŋ neia wa, Ni me map o puaka vawo matak, wa nau me aqo, wa we ilo.

¹⁶ Wa o tuan Pharise me vava wa, I gene iloke gate van ma amen God, ape ni gate matagisgis goro o lea ape qoŋ mapsag. Naŋ o tuaniu wa, I gene ganganor te ge gasei lai o vaglala ŋaŋ tamaine? Wa me qeteg vilewora amaira.

¹⁷ Naŋ neira we vava mulaŋ mun i matapei wa, O sava ko we vava apen i gene ilone me ge lik namatama? Naŋ ni we vava wa, Ineia o prophet.

¹⁸ O manigiu ilone ira ta Judea gate nomtup ape neia si namatana me pei ti, wa me lik; neira gai log ma i tamana tana raveven i gene me ilo ti;

¹⁹ we varus rarua wa, Natumurua iloke kamurua we vava si ni me wota matapei? pa ni we ilo ilokenake gasavai?

²⁰ I tamana tana ravevena we valui gorora wa, Kara we gilala ape natun kara iloke, wa ape ni me wota matapei.

²¹ Pa ni we ilo gasavai ilokenake kara gate gilala apena; wa isei me ge lik namatana kara gate gilala; tur varusia; ni me tamatua veta; ni te vava matapuna.

²² I tamana tana ravevena we vava tamaine, ape rara we gogolo ira ta Judea; ape neira ta Judea me sora veta si a vure lue nan o ima siwo tuwale isei qe gaganag lue si neia i Christ.

²³ O manigiu o ine i tamana tana ravevena me vava wa, Ni me tamatua veta; tur varusia.

²⁴ Wa ineira we log vagaruei ma i gene me matapei ti, we vet munia wa, Ka log ronoga God; kamam we gilala apen i gene ilone si neia i ganganor.

²⁵ Naŋ ni we valui gorora wa, Si neia i ganganor si tagai nau gate gilala; o gene tuwale nau we gilala, ape nau me matapei ti wa ilokenake nau we ilo.

²⁶ Naŋ neira we vava mulaŋ munia wa, Ni me ge o sava muniko? ni me ge lik namatama gasavai?

²⁷ Naŋ ni me valuira wa, Na qara vava paso mun kamiu apena, wa kamiu gate roŋotag; ape sava kamiu we maros we roŋotag mulaŋ? kamiu mulaŋ we maros we qeteg tiŋqoro anana?

²⁸ Ineira we liŋasapuria, we vet wa, Iniko i tiŋqoro anana; wa ikamam ira tiŋqoro anan Moses.

²⁹ Kamam we gilala apen God me vava mun Moses; pa i gene iloke, kamam gate gilala si neia ma avea.

³⁰ O tanun ilone we valuira ti vet wa, Alova, pa iloke o vasasa, si kamiu gate gilala si neia ma avea, pa ni me ge lik namatak.

³¹ Inina we gilala apen God gate roŋotag ira ganganor; pa si isei qe momogo God, wa we tataga non o maros, ni te roŋotag ineia.

³² Alo qeteg marama ran ma gate roŋotag tiqa apensei me ge lik namatan o tanun me wota matapei.

³³ Si i gene iloke ta tete van ma amen God, ni tete ge lai o sava.

³⁴ Neira we valuia we vet wa, Ko me wotavag o ganganor gegese, pa ko we vatogo ikamam? Wa neira me vure luea.

³⁵ I Jesus we roŋotag ape neira me vure luea; wa ni me ilo suaria, ti vet munia wa, Ko we nomtup i Natun God?

³⁶ Naŋ ni me valuia ti vet wa, Pa isei ineia, Lord, si na nomtupua?

³⁷ Naŋ i Jesus ti vet munia wa, Ko me iloa, wa iloke we vava muniko nake.

³⁸ Naŋ ineia wa, Lord, nau we nomtup; wa ni me vatieqau goroa.

³⁹ Naŋ i Jesus me vet wa, Na me van ma ilo marama iloke ape veveg, si rasei gate ilo a ilo mora, wa si rasei we ilo a qeteg matapei.

⁴⁰ Wa ira tuan Pharise ilone we toga amaia me roŋotag o vavae iloke, we vet munia wa, Ikamam mulaŋ o matapei?

⁴¹ Naŋ i Jesus ti vet muneira wa, Si kam qe matapei tete ganganor amen kamiu; nava ilokenake kamiu we vava wa, Kamam we ilo; o manigiu o ine nomiu o ganganor qale toga apena.