John 8 - O Vatavata we Garaqa 1931 (Vanuatu)

¹ pa i Jesus me mule ape tauwe Olivet.

² Wa alo matava ran ni me kel ilo tinesara we roŋo, wa o sul nol me mule suria, wa ni me pute siwo, ti vatogora.

³ Wa ira vatogo tara Pharise we tak ma suria o vavine me taur alo we pakapaka; wa ineira me mapua alo vatitnai,

⁴ we vet munia wa, Vatogo, me taur o vavine iloke alo we pakapaka, alo ilone ran.

⁵ Wa i Moses me vatraŋ nina alo lea si a patuŋ isei qe ge tamaike: pa iniko, ko we vava o sava ape neia?

⁶ Neira we vava tamaike, pa we meregalea, si a tila lai ineia apena. Wa i Jesus me taqaloŋ siwo, ti raverave mun napisuna alo tano.

⁷ Wa ineira qale varusia; wa ni we totoepe, ti vet muneira wa si, Isei nan kamiu gate ganganor, ni patuŋ raka ineia.

⁸ Wa ni we taqaloŋ siwo mulaŋ, ti raverave mun napisuna alo tano.

⁹ Wa ineira we roŋotag, wa nalolora we veveg qalo kelura, pa neira we rowolue tuwatuwale, me qeteg amaira tamaragai gai niŋa ira paspasoanai: wa i Jesus qale toga magesena, wa o vavine we tira alo vatitnai.

¹⁰ Wa i Jesus we totoepe, ti sagarag o vavine magesena, ti vet munia wa, Vavine, avea ineira we gaganag si a veveg iniko; isei gate veveg qaloko?

¹¹ Naŋ neia wa, Uwe, Lord: isei tagai. Naŋ i Jesus ti vava wa, Wa inau mulaŋ na gate veveg qaloko; mule, nipea ganganor mulaŋ.]

¹² Naŋ i Jesus ti vet mulaŋ muneira wa, Inau o marmararan talo marama; isei qe tataga inau tete mulemule alo silsiliga, nava te taur o marmararan tape esu mun pulana.

¹³ Naŋ ira Pharise we vava munia wa, Ko we gaganag we tira apeniko kel; nom o vavae gaganag iloke gate nun.

¹⁴ Naŋ i Jesus ti valuira ti vet wa, Pa si na qe gaganag we tira apenau kel, pa mok o vavae gaganag we nun; ape nau we gilala ape na me van ma avea, wa nau we mule at ivea; nava kamiu gate gilala ape na me van ma avea wa nau we mule at ivea.

¹⁵ Kamiu we veveg vires visogoi; inau gate veveg isei.

¹⁶ Wa si nau qe veveg, mok o lea veveg we nun; ape nau gate magesek, pa ikara o Mama i gene me vatraŋ nau ma.

¹⁷ We nun, me rave alo nomiu o lea wa, O vavae gaganag mor o tanun nirua we nun.

¹⁸ Inau iloke we gaganag kel ape nau, wa o Mama i gene me vatraŋ nau ma we gaganag mona ape nau.

¹⁹ Naŋ ineira we vava munia wa, Avea i tamama? Naŋ i Jesus ti valuira wa, Kamiu gate gilala inau, wa ikamiu gate gilala i Tamak; si kam qe gilala inau, kam te gilala mulaŋ i Tamak.

²⁰ Ni me vava o vavae ŋaŋ iloke ape tano moegene, we vatvatogo alo tinesara we roŋo; wa isei gate tauria, ape qoŋina gate wesu tiqa.

²¹ O manigiu o ine i Jesus ti vet mulaŋ muneira wa, Nau we vanreag, wa ikamiu te sike inau, wa ikamiu te matevag napugamiu; kamiu tete mule lai ilo vatine nau we vanreag aia.

²² Naŋ ira ta Judea we varvava wa, Ni te ge mate kelua? ape ni we vava wa, Kamiu tete mule lai ilo vatine nau we vanreag aia.

²³ Naŋ ni me vava muneira wa, Kamiu we ta i siwo ma, inau ta i sage ma; kamiu talo marama iloke, inau gate talo marama iloke.

²⁴ O manigiu o ine nau me vava mun kamiu wa, kamiu te matevag napugamiu; apen kamiu te matevag napugamiu, si kam qe tete nomtup ape nau iloke.

²⁵ Naŋ ineira we vava munia wa, Iniko isei? Naŋ i Jesus muneira wa, Na qale vava mun kamiu apena tama alo qetegiu.

²⁶ O gene ŋaŋ we qoqo amenau si na vava apen kamiu wa si na veveg; nava i gene me vatraŋ nau ma we nun, wa nau we vava mun o marama o savasava ŋaŋ na me roŋotag amaia.

²⁷ Ineira gate lolomaran ape ni we vava muneira ape o Mama.

²⁸ O manigiu ilone i Jesus ti vet muneira wa, Alo kamiu te la raka i Nat tanun, kamiu te qara gilala ape nau iloke, wa ape nau gate ge matapuk o sava, nava nau we vava o gene ŋaŋ iloke tama i Tamak me vatogo inau.

²⁹ Wa i gene me vatraŋ nau ma we toga amenau; o Mama gate ukeg inau si na toga magesek; ape nau we ge vagae o gene ŋaŋ ni we maros.

³⁰ Alo ni we vava tamaike, we tar me nomtupua.

³¹ O manigiu o ine i Jesus ti vet munra ta Judea we nomtupua wa, Kam ta qale goara alo mok o vavae, kam te tur tiŋqoro anak;

³² wa kam te gilala o nun, wa o nun te ge wasawasa ikamiu.

³³ Naŋ neira we valui goroa wa, Ikamam ira tupun i Abraham, kamam gate toga rot tiqa amenra sei: ko we vava tama avea si, Te ge wasawasa ikamiu?

³⁴ Naŋ i Jesus ti valuira wa, We nun, we nun, nau we vava mun kamiu wa, Isei qe ge o ganganor, ineia i gene rot anan o ganganor.

³⁵ Wa i gene rot tete toga galava alo ima, nava o natui we toga galava.

³⁶ O manigiu o ine si o Natui qe ge wasawasa ikamiu, kam te tur toga wasawasa.

³⁷ Nau we gilala apen kamiu ira tupun i Abraham; panava kamiu we sike si a ge mate inau, ape mok o vavae gate gao taso lai alo ikamiu.

³⁸ Nau we vava o sava na me ilo ti amen Tamak; wa ikamiu mulaŋ we ge o sava kam me roŋotag ti amen tamamiu.

³⁹ Naŋ neira we valui goroa we vet wa, I tupumam i Abraham. Naŋ i Jesus ti vet muneira wa, Kamiu ta ra natun Abraham, kam te ge o gagapalag ŋaŋ mon i Abraham.

⁴⁰ Nava ilokenake kam we sike we ge mate inau, inau qa o tanun nau we vava mun kamiu o nun na me roŋotag amen God: i Abraham gate ge tamaine.

⁴¹ Kamiu we ge o gagapalag mon tamamiu. Naŋ neira we vava munia wa, Kamam gate wota pakapaka; i tamamam ituwale, i God nane.

⁴² Naŋ i Jesus ti vet muneira wa, God ta Tamamiu, kam te tape inau; ape nau me rowolue ma wa nau me van ma amen God; ape nau gate van matapuk ma, nava ni me vatraŋ nau ma.

⁴³ Ape sa kamiu gate lolomaran naliŋak? apen kamiu gate tiŋqoro lai mok o vavae.

⁴⁴ Ikamiu tamen i tamamiu i Satan, wa ikamiu we maros we ge o tortoron kiskislag non tamamiu. Ineia i manvus alo qetegiu ran ma, wa ni gate tira alo nun, ape o nun tagai alo ineia. Alo ni we vava galegale ni we vava matapuna, ape neia i galegale wa i taman o galegale.

⁴⁵ Nava ikamiu gate nomtup inau, ape nau we vava nun.

⁴⁶ Isei nan kamiu we veveg qalo lai inau ape ganganor? Si nau qe vava nun, ape sa kamiu gate nomtup nau?

⁴⁷ Isei qe wot ma amen God ni te tiŋqoro o vavae ŋaŋ mon God; o manigiu o ine kamiu gate tiŋqoro, apen kamiu gate wot ma amen God.

⁴⁸ Naŋ ira ta Judea me valuia, me vet wa, Kamam we vava mantag wun was, Iniko ta Samaria, wa o vui we tatas amaiko?

⁴⁹ Naŋ i Jesus ti valuira wa, O vui we tatas tagai amenau; pa nau we nom mava i Tamak, wa ikamiu we nom tagtageag inau.

⁵⁰ Pa na gate sike we ge ronoga kel inau; apena we sike wa we veveg.

⁵¹ We nun, we nun, nau we vava mun kamiu wa, Si o tanun ta taur mok o vavae, ni tete ilo mona o matea ti tuai ti tuai.

⁵² Naŋ ira ta Judea we vet munia wa, Ilokenake kamam we gilala mantag momam si o vui we tatas amaiko: i Abraham me mate tara prophet ŋaŋ me mate: pa ko we vava wa, Si isei qe taur mok o vavae, ni tete nam ilo o matea ti tuai ti tuai.

⁵³ Ko we liwoa wun nan i tamanina i Abraham me mate ti, tara prophet ŋaŋ me mate? pa ko we ge iniko si sei?

⁵⁴ Naŋ i Jesus ti valui gorora wa, Si na qe log ronoga kel nau, nok o ronoga itagai; nava i Tamak we log ronoga inau, wa kamiu we vava ape neia wa si ineia God kamiu;

⁵⁵ pa kam gate gilala ineia, nava nau we gilala ineia; pa si na qe vava wasi na gate gilala ineia, na te tama ikamiu, i galegale; pa nau we gilala ineia, wa nau we taur mon o vavae.

⁵⁶ I tamamiu i Abraham me malakalaka si a ilo naqoŋik; wa me ilo mona, wa me qara apena.

⁵⁷ Naŋ ira ta Judea we vava munia wa, Natauma gate saŋavul tavelima tiqa, pa ko me ilo i Abraham?

⁵⁸ Naŋ i Jesus ti vet muneira wa, We nun, we nun, nau we vava mun kamiu wa, I Abraham gate wota tiqa na qale toga ran ma.

⁵⁹ Wa neira me taur kalo o wovat si a patuŋia; pa i Jesus me taviro pata, ti sere raveaglue alo vatitnara nan o tinesara we roŋo, ti mule sispara.