John 7 - O Vatavata we Garaqa 1931 (Vanuatu)

¹ Paso nan i Jesus me mule kelkel a Galilea, ape ni gate maros we mule kelkel a Judea, apenra ta Judea me sike si a ge mateia.

² Wa o lakalaka nora ta Judea, o lakalaka paito, me noga.

³ O manigiu o ine ira tasina we vava munia wa, Vareag, mule i Judea, si ra tiŋqoro mulaŋ anama a ilo mora o gagapalag ŋaŋ ko we ge.

⁴ Ape tagai o tanun we gagapalag pata, pa we maros mona o tanun sul neira gilala ineia alo maea. Ko ta ge tamaike, ka ge ŋaŋalue ko mun o marama.

⁵ Ape ra tatasina gai gate nomtup mora neia.

⁶ O manigiu ilone i Jesus ti vet muneira wa, Naqoŋik gate wesu tiqa, nava naqoŋimiu we taurmate vagae apena.

⁷ O marama tete ŋustup lai kamiu; nava we ŋustup nau, ape nau we gaganag we tira apena si mon o gagapalag we malkeke.

⁸ Tur mule kalo momiu ape lakalaka; na tete mule kalo tiqa ape lakalaka iloke, ape qoŋik gate wesu vunvun tiqa.

⁹ Ni me vava tamaike muneira, paso nan ni qale toga a Galilea.

¹⁰ Nava ira tatasina me mule kalo veta ape lakalaka, paso nan ni qara mule kalo mona, nava ni gate mule lue pa me viro.

¹¹ O manigiu ilone ira ta Judea me sikea alo lakalaka, we vet wa, Avea ineia?

¹² Wa me terevaŋutŋut vaga qoqo alo sul ape neia; o tuaniu me vava wa, Ineia we wia: wa o tuaniu wa, Tagai, ni we ge lera o sul.

¹³ Panava isei gate wawaŋ lue ape neia, ape neira we gogolo ra ta Judea.

¹⁴ Wa alo tine lakalaka i Jesus we mule kalo ilo vatine we roŋo, ti vatvatogo.

¹⁵ Wa ira ta Judea me mamakei apena we vet wa, I gene iloke we lolomaran gasavai, pa ni gate toga ilo amen i vatogo?

¹⁶ Naŋ o manigiu ilone i Jesus ti valuira wa, Nok o lea vatogoa gate mok, nava amon i gene me vatraŋ nau ma.

¹⁷ Si isei qe maros we ge non o maros, ni te gilala ape lea vatogoa, si amon God, si nau we vava matapuk.

¹⁸ Isei we vava matapuna we sike sin ge ronoga kelua, nava isei we sike sin ge ronoga i gene me vatraŋia, ilone we nun, wa o liŋe variava gate toga alo ineia.

¹⁹ I Moses wun me la mun kamiu o lea? wa isei tuwale nan kamiu gate gagapalag qalo o lea. Ape sa kam we sike si a ge mate inau?

²⁰ O sul we valui goro, si, O vui we tatas amaiko; isei we sike si a ge mate iniko?

²¹ Naŋ i Jesus ti valui gorora we vava wa, Nau me ge o gagapalag tuwale, wa ikamiu nol me mamakei apena.

²² O manigiu iloke i Moses me le mun kamiu o teve vaglala apena; (pa gate qeteg amen Moses nava amera tupunina;) wa kamiu we teve vaglala o tanun alo qoŋ mapsag.

²³ Si o tanun qe lav mona o teve vaglala alo qoŋ mapsag, nan o lea non i Moses wa tatavaul, ape sa kam we lologagara inau ape nau teve ge esu nol o tanun alo qoŋ mapsag?

²⁴ Turpea veveg vires nagoi: tur veveg o lea veveg we taniniga gese.

²⁵ Wa o tuan ta Jerusalem me vava wa, I gene wun iloke neira we sike si a ge mateia?

²⁶ Pa ilo, ni we wawaŋ lue, wa ineira gate gatogoroa. We nun, ira vatvatraŋ me lolomaran wun ape iloke i Christ?

²⁷ Nava i tagai; apen kamam we gilala ape iloke ma avea; nava i Christ ta van ma, isei tete gilala ape neia ma avea.

²⁸ O manigiu o ine i Jesus me vava eleele alo vatine we roŋo, we vatvatogo ti vet wa, Kamiu we gilala inau, wa kamiu we gilala ape nau ma avea; wa na gate van matapuk ma, nava i gene me vatraŋ nau ma we nun, kamiu gate gilala ineia.

²⁹ Nau we gilala ineia, ape na me van ma amaia, wa ni me vatraŋ nau ma.

³⁰ O manigiu o ine ineira me sike si a takulia; nava isei gate map napanena avunana, ape qoŋina gate wesu tiqa.

³¹ Wa o tanun ŋaŋ we qoqo amaira me nomtupua, we vet wa, I Christ ta van ma aŋaisa, pa ni te ge o vaglala we qoqo nan o vaglala ŋaŋ i gene iloke me ge ti?

³² Ira Pharise we roŋotag o sul we terevaŋutŋut tamaike ape neia; wa ira oloolo liwoa wa ira Pharise me vatraŋ o tuan gagapalag si a takulia.

³³ O manigiu o ine i Jesus ti vet wa, O qoŋ gate purat ti na te qale toga amen kamiu, wa na te mule sur i gene me vatraŋ nau ma.

³⁴ Kamiu te sike inau, wa ikamiu tete ilo suar; wa ikamiu tete mule lai ilo vatine na we toga aia.

³⁵ Ira ta Judea we varvava apena wa, I gene iloke te va ivea wa inina tete ilo suaria? Ni te mule surira salsaleŋa amera ta Grekia, si a vatogo ira ta Grekia?

³⁶ O sava vavae iloke ni we vava wa, Kamiu te sike nau, wa ikamiu tete ilo suar inau; wa, Kamiu tete mule lai ilo vatine nau we toga aia?

³⁷ Naŋ alo paspasoane qoŋ, o qoŋ we poa tape lakalaka, i Jesus me tira, ti vet wa, Si isei qe marou, ni van ma surinau, ni ima.

³⁸ Isei qe nomtup inau, o pei lava ŋaŋ te tiqar lue nan natoqana, o pei maur, tama me rave ti.

³⁹ Wa ni me vava ape Vui ira sei te nomtupua te la; ape tagai tiqa o Vui we Roŋo, ape gate ge ronoga tiqa i Jesus.

⁴⁰ Wa o tuan sul we roŋotag mon o vavae ŋaŋ iloke, we vet wa, We nun i gene iloke o prophet.

⁴¹ Naŋ rasei we sea wa, Iloke i Christ. Naŋ o tuaniu wa, I Christ te rowo lue ma a Galilea?

⁴² O raverave gate vava si i Christ we van ma nan o veve i David, wa nan Bethlehem o vanua i David me toga ti aia?

⁴³ Wa me qeteg raka tamaine o vilewora amaira sul.

⁴⁴ Naŋ o tuaniu we maros we takulia; nava isei gate map napanena avunana.

⁴⁵ Wa ira gene vatraŋ me kel surira oloolo liwoa tara Pharise. Naŋ neira wa, Apesava kamiu gate lavia ma?

⁴⁶ Naŋ ira gene vatraŋ we valui gorora wa, O tanun gate vava we tuai tama i gene iloke.

⁴⁷ Naŋ ira Pharise we valui gorora wa, Me valera mulaŋ kamiu?

⁴⁸ Isei nanra moe tanun, si isei nanra Pharise, me nomtupua?

⁴⁹ Pa o sul iloke we loloqoŋ o lea, o sul vivnag.

⁵⁰ Naŋ i Nikodemus ti vet muneira wa (i gene me mule ti suria amoa, ineia ituwale nan neira),

⁵¹ Nonina o lea si nina a veveg gap o tanun, wa gate roŋotag amoa ineia, wa gate gilala ape sava ni we ge?

⁵² Naŋ ineira we valuia we vet munia wa, Iniko mulaŋ we ta Galilea? Ka sike waririag, ko qara ilo si o prophet gate wot ma a Galilea.

⁵³ [Wa ineira we mule tuwatuwale ilo imara: