John 5 - O Vatavata we Garaqa 1931 (Vanuatu)

¹ Paso nan, o lakalaka nora ta Judea; wa i Jesus me mule kalo i Jerusalem.

² Wa o qilo a Jerusalem ape tano sheep; we log o vavae ta Hebrew apena si Bethesda, o paito tavelima apena.

³ Wa ira mageregere ŋaŋ we tar we risa alo iloke, ira matapei, wa ira qagesu, wa irasei o rurus apena, we toga nerei we ge tikotiko o pei.

⁴ Apen o angel we siwo ma ilo qilo alo tuan masao qoŋ, ti ge tikotiko o pei; paso nan, isei qe taqel moai siwo ilo pei me matikotiko ti, ni te esu nan o sava gopae tea me qaloa ti.

⁵ Wa i tuara tanun aia me mageregere ti o tau saŋavul tol o numei laveatol veta.

⁶ I Jesus me iloa we risa, pa ni we gilala ape ni me gopa tuai, ti vet munia wa, Ko we maros we esu?

⁷ Naŋ i gopae ti valuia wa, Lord, tagai o tanun amenau si a lav nau ilo qilo alo tikotiko pei; pa nau we mule, pa isei we sea we taqel moai inau siwo.

⁸ Naŋ i Jesus ti vet munia wa, Tavaraka, la raka natanoepama, mule atalia.

⁹ Wa o tanun ilone me esu gaplot, ti la raka natanoepana, ti mule. Wa o qoŋ ilone o qoŋ mapsag.

¹⁰ Naŋ ira ta Judea we vava mun i gene me esu ti wa, O qoŋ mapsag qarig, gate tira ape lea si ka la raka natanoepama.

¹¹ Pa ni me valuira wa, I vaesuk me vet munau wa, La raka natanoepama, mule atalia.

¹² Naŋ ineira we varusia wa, Isei ilone me vet tamaine muniko wa, La raka natanoepama, mule?

¹³ Pa i gene me esu ti gate gilala isei ineia; apen i Jesus me taviro, o sul alo vatine.

¹⁴ Galewora i Jesus we ilo suaria alo vatine we roŋo, ti vet munia wa, Ilo, ko me esu; pa nipea ganganor mulaŋ, nan o sava we tatas nan we tuai wa qalo ko.

¹⁵ Wa o tanun we vareag, ti gaganag mura ta Judea si i Jesus i vaesuna.

¹⁶ O manigiu ilone ira ta Judea me gege i Jesus, wa we sikesike si a ge mateia, ape ni me ge tamaine alo qoŋ mapsag.

¹⁷ Pa i Jesus me valui gorora wa, I Tamak we mawmawui gai niŋa ilokenake, wa nau we mawmawui mok.

¹⁸ O manigiu ilone ira ta Judea me sikesike aneane nan amoa si a ge mateia, ape ni gate sirigavtag gese o lea ape qoŋ mapsag, pa ni me log ran God was i tur Tamana, me ge ineia we sar apen God.

¹⁹ Naŋ i Jesus ti valuira ti vet wa, We nun, we nun, nau we vava mun kamiu wa, O Natui gate ge lai matapuna o sava, nava o gene ni we ilo o Mama we ge; ape o gene ŋaŋ ni te ge, o Natui te ge mona tamaine.

²⁰ Ape o Mama we tape o Natui, wa we gaganag munia o gene ŋaŋ nol ni we ge mona; wa ni te gaganag munia o gagapalag ŋaŋ we poa nan o ike, si kamiu a mamakei apena.

²¹ Ape tama o Mama we ge raka kel ira mate wa we ge esura, tamaine gina o Natui we ge esu rasei ni we maros.

²² Ape o Mama gate veveg mona o tanun, pa me ukeg o lea veveg nol mun o Natui:

²³ si o tanun ŋaŋ a nom mava o Natui, tama ineira we nom mava o Mama. Isei qe tete nom mava o Natui, ni gate nom mava o Mama me vatraŋia ma.

²⁴ We nun, we nun, nau we vava mun kamiu wa, Isei qe tiŋqoro mok o vavae, wa we nomtup i gene me vatraŋ nau ma, me taur veta o esu galava, wa tete niŋa lai ape lea veveg, pa me lagau lue veta nan o matea ilo esu.

²⁵ We nun, we nun, nau we vava mun kamiu wa, O masao qoŋ we rasu ma, wa me wesu veta, wa ira mate te roŋotag naliŋan Natun God, wa irasei we roŋotag te esu.

²⁶ Ape tama amen o Mama o esu alo ineia kel, tamaine mulaŋ gina ni me vasoal mun o Natui si o esu amaia alo ineia kel.

²⁷ Wa ni me vasoal munia o mana si amona te veveg, ape neia i Nat tanun.

²⁸ Tur pea mamamakei ape gene iloke; ape o masao qoŋ we rasu ma wa ineira nol alo qaraŋa ŋaŋ te roŋotag naliŋana,

²⁹ wa te rowolue ma; irasei me gagapalag we wia ilo tavaraka esu, wa irasei me gagapalag ganganor ilo tavaraka veveg.

³⁰ Na tete ge lai matapuk o sava: nau we veveg tama nau we roŋotag; wa mok o lea veveg we taniniga; ape na gate sikesike o gene nau we maros, nava o sava i gene me vatraŋ nau ma we maros.

³¹ Si na qe gaganag kel we tira ape nau, mok o vavae gaganag ilone gate nun.

³² I gene we sea we gaganag we tira ape nau; wa nau we gilala ape vavae ni we gaganag we tira ape nau si we nun.

³³ Kamiu me vatraŋ rasei sur i John, wa ni me gaganag we tira ape nun.

³⁴ Nava o vavae gaganag nau we lav mok gate amon o tanun; pa nava nau we vava tamaike si kamiu a esu apena.

³⁵ Ineia o pul we lawalawa, we siŋasiŋa; wa ikamiu me maros we toga malakalaka wia o tuan qoŋ alo non o marmararan.

³⁶ Nava o gene we gaganag we tira amenau we poa nan o vavae non i John, ape o gagapalag ŋaŋ o Mama me vatraŋ nau si na ge paso, o gagapalag ŋaŋ nake nau we ge, iloke ŋaŋ we gaganag we tira apenau si o Mama me vatraŋ nau ma.

³⁷ Wa o Mama me vatraŋ nau ma, ni me gaganag mona we tira ape nau. Kamiu gate roŋotag naliŋana ran ma, wa kamiu gate ilo natarapena.

³⁸ Wa ikamiu gate taur mon o vavae we goara alo ikamiu, apen kamiu gate nomtup i gene ni me vatraŋ ma.

³⁹ Kamiu we sikesike waririag alo raverave ŋaŋ, apen kamiu we nonom si kamiu we la o esu galava alo ilone ŋaŋ; wa ilone ŋaŋ nane we gaganag we tira ape nau.

⁴⁰ Wa kamiu gate maros we mule ma sur nau si kamiu a la momiu o esu.

⁴¹ Nau gate lav mok o ronoga amen o tanun.

⁴² Nava nau we gilala ikamiu si tagai amen kamiu o tapeva mon God alo lolomiu.

⁴³ Na me van ma alo sasan Mama, wa kam gate lav vasgot nau; si isei we sea qe van matapuna ma alo tur sasana, kam te lav vasgot ineia.

⁴⁴ Kamiu te nomtup lai gasavai, we varlavlav o ronoga amen valval kamiu, wa ikamiu gate sikesike o ronoga amen God ma i tuwale wora.

⁴⁵ Turpea nononom si na te tila kamiu mun o Mama; i gene apena we tila, i Moses nake, kamiu we sov ape neia.

⁴⁶ Ape si kam qe nomtup i Moses, kam te nomtup nau, ape ni me rave ape nau.

⁴⁷ Nava si kam qe tete nomtup mon o raverave, te nomtup gasavai mok o vavae?