John 2 - O Vatavata we Garaqa 1931 (Vanuatu)

¹ Wa alo qoŋ vatoliu o wosolagia a Kana takele Galilea, wa raveven Jesus aia.

² Wa neira me suware i Jesus mulaŋ ma tara tiŋqoro ŋaŋ anana ape wosolagia.

³ Wa o wine gate tira ape neira, wa raveven Jesus ti vava munia wa, O wine tagai amaira.

⁴ Naŋ i Jesus ti vet munia wa, Veve, o sava amenau wa amaiko? namasaoqoŋik gate gogoi tiqa.

⁵ Wa i ravevena ti vet munra gagapalag wa, O sava ni te vareg kamiu apena, tur ge.

⁶ Wa o tano pei laveatea o vat we pute aia, tataga naliŋara ta Judea ape ge wenewene, tuwale wun te tira ape pue nirua si nitol.

⁷ Naŋ i Jesus ti vet mun neira wa, Tav ura o tanopei ŋaŋ mun o pei; wa neira me tav ura matalesles.

⁸ Naŋ ti vava mulaŋ mun neira wa, Tur tavreag ilokenake, tur vanogag mun i moai goro o ganagana. Wa neire ma vanogag.

⁹ Wa i moai goro me nimnim ilo paso o pei me ris wine nia, pa ni gate gilala si ma avea, nava ra gagapalag me tav o pei ti we gilala, wa i moai goro ilone me log o tanun qara lag ti,

¹⁰ ti vet munia wa, O val tanun we sogo moai o wine we wia, wa o tanun ŋaŋ me un vulera, ni qara sogo gate wia mantag, pa ko me taur viroag ti o wine we wia, ko qara sogo ilokenake.

¹¹ I Jesus me ge o qeteg vaglala iloke a Kana takele Galilea, wa ni me ge ŋaŋalue naleŋasina, wa ira tiŋqoro anana me nomtupua.

¹² Paso nan, ni me taqel siwo i Kapernaum, ineia wa i ravevena, tara tasina wa ira tiŋqoro anana; wa neira me toga aia o qoŋ gate purat.

¹³ Wa o rowolagau nora ta Judea me rasu ma, wa i Jesus me kalo sage i Jerusalem.

¹⁴ Wa ni me ilo suar alo vatine we roŋo ira wolwol kau wa sheep wa qona ŋaŋ, wa ira valvalete som we pute.

¹⁵ Wa ni me ge o nat gae mun ga‐towos, wa ni me vure lue nol nan o vatine we roŋo, o sheep wa o kau ŋaŋ, wa me saru savrag o som pulara valvalete, wa we wil tapeliŋ nor o tano som;

¹⁶ ti vet mura wolwol qona wa, Lareag o gene ŋaŋ iloke; turpea gege naiman Tamak si mun ima wolwol.

¹⁷ Wa ira tiŋqoro me nonom kel ape me rave ti wa, Nok o nom tinegaro ape imama we ravis nau.

¹⁸ O manigiu iloke ira ta Judea we valuia, we vava munia wa, O sava o vaglala ko te la lue mun kamam, ape ko we ge tamaike?

¹⁹ Naŋ i Jesus ti valuira wa, Tur sese o ima we roŋo iloke, wa na te taur raka mulaŋ alo qoŋ nitol.

²⁰ Naŋ ira ta Judea we vet apena wa, O tau saŋavul vat o numei laveatea neira me tautaur o ima we roŋo iloke, pa ko te taur raka alo qoŋ nitol?

²¹ Panava ni me vava ape ima we roŋo naturiana nane.

²² Wa o manigiu iloke, ni me tavaraka veta nan ra mate, ira tiŋqoro anana me nomkel ape ni me vava tamaike; wa neira me nomtup o raverave, wa o vavae i Jesus me vava ti.

²³ Wa ineia a Jerusalem alo rowolagau, alo lakalaka, wa ineira we qoqo me nomtup nasasana, we sagsagarag o vaglala ŋaŋ ni we ge.

²⁴ Nava i Jesus gate ukeg kelua sin pul amaira, ape ni me lolomaran o tanun ŋaŋ,

²⁵ wa ni gate toga galtag si isei te gaganag we tira munia ape tanun; ape ni me lolomaran matapuna si o sava alo lolon o tanun.