John 19 - O Vatavata we Garaqa 1931 (Vanuatu)

¹ O manigiu ilone i Pilat qara taur i Jesus, we towosia.

² Wa ira vagalo we vir o gavilvilqat mun o wolakaukau, we map vawo qatuna, we saru goroa mun o siopa we sorsoroga,

³ we mule ma suria, we vet wa, We wia, gai, Maranaga nora ta Judea! wa we wosawosa ineia.

⁴ Wa i Pilat me kalo lue mulaŋ, ti vet muneira wa, Ilo, nau we lav luea ma sur kamiu, si kamiu a gilala lai ape nau gate ilo piro qalo o pugai amaia.

⁵ Wa i Jesus me kalo lue ma, we saru o gavilvilqat o wolakaukau wa o siopa we sorsoroga. Naŋ ni me vava muneira wa, Ilo, o tanun!

⁶ Wa ira oloolo liwoa tara rowrowovag we iloa, neira we awoawo, we vet wa, Woso teterpania, woso teterpania. Naŋ i Pilat we vet muneira wa, Tur lav momiu ineia, tur woso teterpania; ape na gate ilo qalo mok o pugai amaia.

⁷ Naŋ ra ta Judea we valui goroa wa, Momam o lea apena, wa tataga o lea ilone ni te mate ran, ape ni me ge kel ape ineia si Natun God.

⁸ Wa i Pilat we roŋotag o vavae iloke, pa ni me gogolo nan amoa apena;

⁹ ti kalo pata mulaŋ ilo iman i governor, ti vet mun Jesus wa, Iniko ma avea? Nava i Jesus gate valui goro iloa.

¹⁰ Naŋ i Pilat ti vet munia wa, Ko gate vava munau? ko gate gilala ape nau we mana si a ukegiko, wa nau we mana si a woso teterpaniko?

¹¹ Naŋ i Jesus ti valuia wa, Tete mana ilo amaiko si a ge inau, ta tete la at muniko nan o vunana; o manigiu o ine i gene me maniriŋ nau muniko, napugana we poa sal.

¹² Alo ilone i Pilat me sike si a ukegia apena; nava ira ta Judea me awoawo we vet wa, Ko ta ukeg o tanun iloke, ko gate pulsalan i Kaisar; isei qe ge kel ape neia sin maranaga we vavag qalo i Kaisar.

¹³ I Pilat we roŋotag o vavae iloke, wa ni we lav lue i Jesus ma, ti pute alo tanopute veveg alo vatine me log si, O wosogoro mun o vat, wa me log alo vava ta Hebrew, si, Gabatha.

¹⁴ Wa o gismamate ilone ape rowolagau, wa tama me masao qoŋ laveteai: naŋ ni me vava munra ta Judea wa, Tur ilo, i Maranaga nomiu!

¹⁵ Pa neira me awoawo lue wa, Lareagia, lareagia, woso teterpania! Naŋ i Pilat we vet muneira wa, Na te woso teterpan i Maranaga nomiu? Ira oloolo liwoa we valui goroa wa, Tagai o maranaga amen kamam, pa i Kaisar i tuwale.

¹⁶ O manigiu ilone ni me suegia muneira si a woso teterpania. Wa ineira we taur i Jesus we lavreagia.

¹⁷ Naŋ ni we rowolue at we rig mona non o wolowolo, we niŋa o vatine me log si O tano qat tamate, wa me log alo vava ta Hebrew si, Golgotha.

¹⁸ Wa neira we woso teterpania aia, wa o tanun pulrua amaia tavalrua a tavala kikina, wa i Jesus alo vatitnai.

¹⁹ Wa i Pilat me rave o vaglala, ti map kalo vawo wolowolo; pa me rave wa, I JESUS TA NASARET I MARANAGA NORA TA JUDEA.

²⁰ Wa ira ta Judea we tar me vasogo o vaglala iloke me rave ti; ape o vatine neira me woso teterpan i Jesus aia arivtag o vanua; wa me rave mun o vava ta Hebrew, wa ta Grik, wa ta Rom.

²¹ Naŋ ira oloolo liwoa amenra ta Judea me vava mun i Pilat wa, Nipea raverave si, I Maranaga nora ta Judea; panava ni me vet kel si, Inau i Maranaga nora ta Judea.

²² Naŋ i Pilat ti valuira wa, O vavae nau me rave, nau me rave.

²³ Wa ira soldier me woso teterpan paso i Jesus, qara la non o siopa, we ge o tavaliu nivat, mun val soldier o tavaliu, wa non o siopa sarusaru mulaŋ; wa non o siopa sarusaru ilone gate susur, me vau qet siwo.

²⁴ Naŋ neira me varvava wa, Inina nipea saresare, pa nina map o vaglala apena si nonsei; si a vatira o vavae me rave ti wa, Neira we tirag nok o siopa, Neira we map nor o vaglala ape nok o moe siopa. Wa ira soldier me ge tamaine.

²⁵ Pa i raveven Jesus tana tasin ravevena, i Meri rasoan Klopas, iratol i Meri ta Magdala, we tira ape wolowolo.

²⁶ Wa i Jesus we ilo i ravevena, tana tiŋqoro meratape we tira arivtag, ti vet mun ravevena wa, Veve, ka ilo, i natuma!

²⁷ Paso nan, ni me vet mun i tiŋqoro wa, Ka ilo, i ravevema! Wa i tiŋqoro ilone me lavia ilo imana alo masao qoŋ ilone.

²⁸ Paso nan, i Jesus we gilala ape gene ŋaŋ me wesu qet veta, ti vet wa, Inau o marou; ape we ge tira o raverave.

²⁹ Wa o wetov we pute aia we uravag o vinegar; wa ineira we ge ura o maŋmaŋ pul mun o vinegar, we sisgag ape wote hisop, we vereg ape valana.

³⁰ Wa i Jesus we la paso o vinegar, ti vet wa, Me paso; wa ti matueg naqatuna, wa ni we ukeg naatana.

³¹ O manigiu o ine ira ta Judea we paere mun Pilat, ni vatraŋ irasei si a ge late naraŋonratol, wa si a lavreag ratol, nan naturiaratol wa toga vawo wolowolo alo qoŋ mapsag; ape neira we ge taurmate o rowolagau, wa o qoŋ mapsag ilone we liwoa aneane.

³² Wa ira soldier we niŋa, we ge late naraŋon o moai, wa naraŋon o varuei me woso teterpania ti amaia.

³³ Wa alo ineira we niŋa i Jesus, neira we iloa me mate veta, pa neira gate ge late naraŋona.

³⁴ Nava o tuara soldier me as nalalana mun o isar, wa o nara wa o pei ti vinvinrag lue gaplot.

³⁵ Wa i gene me ilo me gaganag, wa mon o vavae gaganag we nun; wa ni we gilala ape ni we vava nun, si kamiu mulaŋ a nomtup apena.

³⁶ Ape o gene ŋaŋ ilone me wesu, si a ge tira o raverave wa, Natakele surina tete malate.

³⁷ Wa o varue raverave we vava wa, Ineira te sagarag i gene ineira me asia.

³⁸ Paso nan i Joseph o ta Arimathea i tiŋqoro anan i Jesus, nava ni me tiŋqoro pata, ape ni me gogolo ira ta Judea, me vatapar i Pilat sin lavreag naturian Jesus; wa i Pilat me mawui apena. Wa ni me mule, ti lavreag naturian Jesus.

³⁹ Wa i Nikodemus me mule mulaŋ at, i gene ilone me mule totowo ti sur Jesus alo qoŋ, we vile ma o mur wa o aloe me lor, we mava tama o pound melnol.

⁴⁰ Wa rara me taur naturian Jesus, me lolos alo siopa mun o wotangae punapuna, tama ira ta Judea we ge ape tavtavig.

⁴¹ Wa o tuqei alo vatine neira me woso teterpania aia; wa alo tuqei o qaraŋ tamate we garaqa aia, pa gate map taqai tiqa o tamate alolona.

⁴² Wa rara me map i Jesus aia, ape naqoŋira ta Judea ilone o gismamate, wa o qaraŋa arivtag.