John 17 - O Vatavata we Garaqa 1931 (Vanuatu)

¹ Naŋ i Jesus me vava paso tamaike, ti ate kalo namatana ivunana ti vet wa, Mama, o masao qoŋ me noga; ka ge ronoga i Natuma si i Natuma a ge ronoga iniko.

² Tama ko me vasoal ma o mana munia goro o visogoi nol, sin te la o esu galava mun o savasava ŋaŋ ko me la munia.

³ Wa iloke o esu galava, si neira a lolomaran iniko God tuwale wora, wa i gene ko me vatraŋia, i Jesus Christ.

⁴ Na me ge ronoga iniko alalaŋana; na me ge qet o gagapalag ko me la ma ti munau si na ge.

⁵ Wa ilokenake, Mama, ka ge ronoga inau amaiko mun o ronoga na me la amaiko alo gate qeteg tiqa o marama.

⁶ Na me ge ŋaŋalue nasasama mun o tanun ŋaŋ ko me la ma ti munau nan o marama; ineira ira gene anama, wa ko me le ineira ma munau; wa neira me kokor mom o vavae.

⁷ Ineira we lolomaran ilokenake si o savasava ŋaŋ ko me la ma munau we rowolue ma amaiko.

⁸ Ape nau me la at muneira o vavae ŋaŋ ko me la ma ti munau; wa neira me la, wa me lolomaran nun ape nau me van lue ma amaiko, wa ineira me nomtup ape ko me vatraŋ nau ma.

⁹ Nau we paere apeneira; nau gate paere ape marama, nava ape neira ko me la ma munau, ape neira ira gene anama.

¹⁰ Wa nok o gene ŋaŋ anoma nol, wa nom o gene ŋaŋ nol anok; wa na we ronoga alo ilone ŋaŋ.

¹¹ Wa inau gate toga mulaŋ aŋaisa alo marama, wa iragai ŋaŋ iloke alo marama, wa inau we mule suriko. Mama we roŋo, ka matagisgis goro alo sasama iragai ko me la ma munau, si neira a tuwale, tama inarua tuwale.

¹² Alo inau me toga amaira, na me matagisgis goro alo sasama iragai ko me la ma ti munau; nau me tur goro neira, wa isei nan neira gate tagea, nava o nat tagea gina magesena; si o raverave te tira apena.

¹³ Pa ilokenake na we mule suriko; wa na we vava tamaike alo marama, si neira a la mora nok o malakalaka we ura ran alo lolora.

¹⁴ Nau me la at muneira nom o vavae, wa o marama me ŋustupura, ape neira gate talo marama, tama inau gate talo marama.

¹⁵ Na gate paere si ka lareag neira nan o marama, pa si ka matagisgis gorora nan o ganganor.

¹⁶ Ineira gate talo marama, tama inau gate talo marama.

¹⁷ Ka ge roŋo ineira alo nun; mom o vavae o nun.

¹⁸ Tama ko me vatraŋ nau ma ilo marama, tamaine gina nau me vatraŋ neira at ilo marama.

¹⁹ Wa nau we ge roŋo kel nau o manigiu ineira, si neira a qeteg roŋo mora alo nun.

²⁰ Pa na gate paere ape neira magesera, nava ape rasei mulaŋ we nomtup nau mun nor o vavae;

²¹ si neira nol a tuwale; tama iniko, Mama, alo inau wa inau alo iniko, si ineira a tuwale alo narua; si o marama te nomtup ape ko me vatraŋ nau ma.

²² Wa na me le muneira o leŋas ilone ko me le ma ti munau; si neira a tuwale, tama inarua tuwale;

²³ inau alo ineira, wa iniko alo inau, si neira a qeteg taurmate tuwale ran, wa si o marama a lolomaran ape ko me vatraŋ nau ma, wa me tape ineira, tama ko me tape inau.

²⁴ Mama, na we maros irasei ko me le ma munau neira toga mulaŋ mora avea nau we toga aia; si neira a sagarag naleŋasik ko me le ma munau; ape ko me tape inau alo gate map o sagere marama ma.

²⁵ Mama taniniga, o marama gate lolomaraniko, nava na me lolomaraniko, wa iloke ŋaŋ me lolomaran ape ko me vatraŋ nau ma.

²⁶ Wa na me ge ŋaŋalue nasasama muneira, wa na te qale ge ŋaŋalue; si o tapeva ko me tape inau nia ni toga alo ineira, wa inau alo ineira.