John 16 - O Vatavata we Garaqa 1931 (Vanuatu)

¹ Na me vava o vavae ŋaŋ iloke mun kamiu, nan wa ge tutuag kamiu.

² Ineira te vure lue ikamiu nan o ima siwo tuwale ŋaŋ; we nun, o masao qoŋ we rasu ma, wa isei qe ge mate ikamiu te nonom si ni we gagapalag o gene we roŋo mun God.

³ Wa neira te ge o gene ŋaŋ iloke, ape neira gate gilala o Mama, si inau.

⁴ Pa na me vava tamaike mun kamiu, si aŋaisa alo we wesu o masao qoŋ apena, kamiu a nomkel ape na me gaganag veta ti mun kamiu; panava na gate gaganag o gene ŋaŋ iloke mun kamiu alo qetegiu ran ma, o manigiu na me toga amen kamiu.

⁵ Nava ilokenake nau we mule at sur i gene me vatraŋ nau ma; wa i tuamiu sei gate varus nau wa, Ka mule ivea?

⁶ Pa o lolowono me ura alo toqamiu apena, ape na me vava tamaike mun kamiu.

⁷ Panava nau we vava nun mun kamiu, ape nau we toa nan kamiu, pa te piriŋ kamiu; ape si nau qe tete toa, i Varagai tete van ma sur kamiu; nava si nau qe mule, na te vatraŋia ma sur kamiu.

⁸ Wa alo ni te van ma, ni te ge ilo vaglala o marama ape ganganor, wa ape taniniga, wa ape veveg.

⁹ Ape ganganor, ape neira gate nomtup inau.

¹⁰ Ape taniniga, ape nau we mule sur i Tamak, wa kamiu tete sagarag mulaŋ nau.

¹¹ Ape veveg, ape me veveg veta i maranaga talo marama iloke.

¹² Qale toga amen nau o gene ŋaŋ we qoqo si na gaganag mun kamiu, nava kamiu gate veverag lai tiqa.

¹³ Pa alo ineia, o Vui nun, te van ma, ni te tursalemoa kamiu ilo nun nol; ape ni tete vava matapuna; pa ni te vava o savasava ŋaŋ ni te roŋotag; wa ni te gaganag mun kamiu o gene ŋaŋ te wesu aŋaisa.

¹⁴ Ni te ge ronoga inau; ape ni te la nanok, wa te gaganag mun kamiu.

¹⁵ Napulan o Mama nol napulak; o manigiu apena na me vava wa, Ni te la nanok, wa te gaganag mun kamiu.

¹⁶ Galewora kamiu gate sagarag mulaŋ nau; wa galewora mulaŋ kamiu te ilo inau; ape nau we mule sur o Mama.

¹⁷ Wa o tuan tiŋqoro anana we varvava va, O sava iloke ni we vava munina wa, Galewora kamiu gate sagarag inau, wa galewora mulaŋ kamiu te ilo inau? wa, Ape nau we mule sur o Mama?

¹⁸ Pa neira me vava wa, O sava iloke ni we vava apena, si, Galewora? Nina gate gilala o sava ni we vava apena.

¹⁹ I Jesus we lolomaran ape neira we maros we varusia, wa ni we vava muneira wa, Kamiu we varsikesike ape ilone nau me vava wa, Galewora kamiu gate sagarag inau, wa galewora mulaŋ kamiu te ilo inau?

²⁰ We nun, we nun, nau we vava mun kamiu wa, Kamiu te taŋitaŋi wa te ruruŋtap momiu, pa o marama te malakalaka; wa ikamiu te lolowono, pa nomiu o lolowono te ris malakalaka nia.

²¹ Alo tavine we vasus, ni we lolowono ape masao qoŋina me noga; pa me vasus veta, ni gate nonom kel mulaŋ ape vivtig, o manigiu o malakalaka ape tanun me wota ma ilo marama.

²² Tamaine gina kamiu we lolowono ti ilokenake; pa na te ilo mulaŋ kamiu, wa natoqamiu te malakalaka, wa isei gate lareag nomiu o malakalaka nan kamiu.

²³ Wa alo qoŋ ilone kamiu tete varus inau ape sava. We nun, we nun, nau we vava mun kamiu wa, Kamiu ta paere o sava tea amen o Mama, ni te la at ilone mun kamiu alo sasak.

²⁴ Kamiu gate tataro tiqa ape sava tea alo sasak; tur tataro wa kamiu te la, si nomiu o malakalaka te ura.

²⁵ Nau me vava tenegag tamaike mun kamiu; nava o qoŋ we rasu ma na tete vava tenegag mulaŋ mun kamiu alolona, pa na te wawaŋ lue ran mun kamiu apen o Mama.

²⁶ Alo qoŋ ilone kam te tataro alo sasak; wa na gate vava mun kamiu was na te paere mun o Mama apen kamiu;

²⁷ ape o Mama we tape matapuna ikamiu, o manigiu kamiu me tape inau, wa kam me nomtup ape nau me van ma amen o Mama.

²⁸ Na me van lue ma amen o Mama, wa me van ma ilo marama; pa nau we toavtag o marama, wa we mule vano sur o Mama.

²⁹ Ira tiŋqoro anana we vava munia wa, Ilo, ilokenake ko we wawaŋ lue ran, wa ko gate vava tenegag ilo.

³⁰ Ilokenake kamam we gilala apeniko we gilala o savasava ŋaŋ; wa ko gate toga galtag isei te varusiko; o manigiu o ike kamam we nomtup apeniko me van lue ma amen God.

³¹ Naŋ i Jesus me valui gorora wa, Kamiu we nomtup ilokenake?

³² Ilo, o masao qoŋ we mule ma, we nun me noga veta, kamiu te salsaleŋa vaseisei ape pulamiu, wa te ukeg inau magasek; panava inau gate magasek, ape o Mama amenau.

³³ Nau me vava tamaike mun kamiu si kamiu a la o tamata alo inau. Alo marama iloke o ganawono te wonot kamiu; pa tur sov naapemiu; na me lalakete nan o marama.