John 15 - O Vatavata we Garaqa 1931 (Vanuatu)

¹ Inau o vine we nun, wa i Tamak i mawmawui tuqei.

² O val waŋarai alo inau ta tete uwa ni te save reag; wa o val waŋarai ta uwa, ni te wurvag sin uwa liŋliŋ nan amoa.

³ Me wurvag wenewene veta ikamiu o manigiu o vavae na me vava mun kamiu.

⁴ Tur goara alo inau, wa inau alo ikamiu. Tama o waŋarai tete uwa matapuna lai ta tete goara alo vine, tamaine gina kamiu tagai mulaŋ, kamiu ta tete goara alo inau.

⁵ Inau o vine, kamiu o waŋarai ŋaŋ. Isei qe goara alo inau wa inau alo ineia, ni te uwa liŋliŋ; ape asasau nan nau kamiu tete ge lai o sava.

⁶ Si isei qe tete goara alo inau, me savrag reag veta ineia tam o waŋarai, wa me kor, wa irasei te vile tuwale ineira, te savrag ilo avi pa we gao.

⁷ Si kam qe goara alo inau wa mok o vavae ŋaŋ qe goara alo ikamiu, tur paere ape savasava ŋaŋ kam we maros, wa te lai ran mun kamiu.

⁸ Iloke o gene i Tamak we ronoga apena, si kam qe uwa liŋliŋ; wa kamiu te qeteg tiŋqoro anak tamaine.

⁹ Tama i Tamak me tape inau, tamaine na me tape ikamiu; tur goara alo tapeva namok.

¹⁰ Si kam qe kokor mok o lea vatraŋ ŋaŋ, kam te goara alo mok tapeva; tama inau me kokor o lea vatraŋ ŋaŋ mon Tamak, wa na we goara alo tapeva namona.

¹¹ Nau me vava o vavae ŋaŋ iloke mun kamiu, si nok o malakalaka ni goara alo ikamiu, wa si nomiu o malakalaka ni wesu ran.

¹² Iloke mok o lea vatraŋ, si kamiu a vartape kamiu, tama inau me tape kamiu.

¹³ Tete tapeva amensei we poa nan iloke, si sei te map naesuna siwo o manigiu ra pulsalana.

¹⁴ Kamiu ira pulsalak, si kam qe ge tataga o savasava ŋaŋ nau we vatraŋ kamiu apena.

¹⁵ Nan ilokenake na gate log kamiu si ira rowrowovag, apen i rowrowovag gate gilala ape savasava i tagina te ge; nava inau me log kamiu si ira pulsalak, ape nau me ge ŋaŋalue mun kamiu o savasava ŋaŋ nau me roŋotag amen Tamak.

¹⁶ Kamiu gate ilo raka inau, nava na me ilo raka kamiu, wa na me map kamiu si a tira taso wa a uwa, wa si nomiu o woai a goara; wa si i Tamak ni la at mun kamiu o savasava ŋaŋ kam we paere apena alo sasak.

¹⁷ Nau we vatraŋ kamiu tamaike si kamiu a vartape ikamiu.

¹⁸ O marama ta ŋustup kamiu, kam we lolomaran ape me ŋustup moai inau nan kamiu.

¹⁹ Si kamiu qe talo marama, o marama te tape ira anana; nava o manigiu kamiu gate talo marama, pa na me ilo raka ikamiu nan o marama, o manigiu ilone o marama we ŋustup kamiu.

²⁰ Tur nom kel ape vavae na me vava veta ti mun kamiu wa, I rowrowovag gate liwoa nan i tagina. Si neira me gege inau, neira te gege mulaŋ ikamiu; si neira me kokor mok o vavae, neira te kokor mulaŋ nanomiu.

²¹ Wa neira te ge o gene ŋaŋ iloke mun kamiu o manigiu nasasak, ape neira gate gilala i gene me vatraŋ nau ma.

²² Na ta tete van ma, ta tete vava muneira, gate pugara; nava ilokenake itagai amaira si neira gale goro lai napugara nia.

²³ Isei qe ŋustup nau, we ŋustup mulaŋ i Tamak.

²⁴ Si na gate ge alo vatitnara o gagapalag ŋaŋ gate monsei we sea me ge, gate pugara; nava ilokenake neira me ilo wa neira me ŋustup kara tak Tamak.

²⁵ Panava neira me ge tamaine si o vavae me rave ti alo nor o lea ni wesu wa, Neira me ŋustup nau wa o manigiu tagai.

²⁶ Wa alo i Varagai te van ma, na te vatraŋia at mun kamiu nan o Mama, o Vui nun, we rowolue amen o Mama, ni te gaganag we tira ape nau.

²⁷ Wa kamiu mulaŋ te gaganag momiu, apen kamiu we toga amenau alo qetegiu ran ma.