John 11 - O Vatavata we Garaqa 1931 (Vanuatu)

¹ Naŋ o tuarasei me gopa, i Lasarus ta Bethania, talo vanuan i Meri tana tasina i Martha.

² Wa i Meri ilone me urai i Lord ti mun o urai ilone, me maŋ naraŋona mun nauluna, wa i tutuana iloke we gopa.

³ Wa ira tutuana me vatraŋ isei ni vet munia wa, Lord, ilo, i gene ko we tapea we gopa.

⁴ Pa i Jesus me roŋotag, ti vet wa, O gopae iloke tete tira ape matea, nava o manigiu naleŋasin God, si Natun God ni leŋas nia.

⁵ Wa i Jesus we tape i Martha tana i tasina ratol i Lasarus.

⁶ Wa ni me roŋotag ape ni we gopa, pa ni qale toga o qoŋ nirua alo vatine ineia aia.

⁷ Paso nan ti vet mura tiŋqoro wa, Nina mule kel i Judea.

⁸ Naŋ ira tiŋqoro we vava munia wa, Vatogo, ira ta Judea me sike rigrig ti iniko si a patuŋiko, pa ko we mule mulaŋ aia.

⁹ Naŋ i Jesus ti valuira wa, Saŋavul tuwale o numei nirua wun o masaoi alo maran tuwale? Si isei qe mulemule alo maran, ni tete tutuag, ape ni we ilo o marmararan talo marama iloke.

¹⁰ Nava si isei qe mulemule alo qoŋ, ni te tutuag, ape o marmararan tagai alo lolona.

¹¹ Ni me vava tamaike; paso nan ni qara vava muneira wa, I Lasarus i pulsalanina we matur; pa na we va at si a vavaŋovia.

¹² Naŋ ira tiŋqoro we vet munia wa, Lord, ni ta matur te esu kel.

¹³ Pa i Jesus me vava ape mateana; nava neira we nonom si ti vavava ape ni we matur mapsagia.

¹⁴ O manigiu o ine i Jesus qara vava lue muneira wa, I Lasarus me mate.

¹⁵ Wa nau we qara apen kamiu si na gate toga aia, o manigiu kam te nomtup apena; pa nava nina va at suria.

¹⁶ Naŋ i Thomas, we logia si Didimus, ti vet munra tiŋqoro ra valuna wa, Nina mulaŋ a va at si a mate tuwale amaia.

¹⁷ Wa i Jesus me niŋa at, pa ni qara gilala si ni me risa alo qaraŋa o qoŋ nivat veta.

¹⁸ Wa Bethania arivtag a Jerusalem, o masaoi tama saŋavul tuwale o numei tavelima.

¹⁹ Wa ira ta Judea we qoqo me mule veta ma sur i Martha tana i Meri si a ge masur rara ape tutuanrara.

²⁰ Wa i Martha we roŋotag apen Jesus me rasu ma, ti mule varniŋa ineia; nava i Meri qale pute alo ima.

²¹ Naŋ i Martha ti vet mun Jesus wa, Lord, ko ta iake, tutuak tete mate.

²² Wa ilokenake na we gilala apen God te le muniko o savasava ko te paere mun God apena.

²³ Naŋ i Jesus ti vet munia wa, Tutuama te tavaraka kel.

²⁴ Naŋ i Martha ti vet munia wa, Nau we gilala ape ni te tavaraka kel alo tavaraka kel alo paspasoane qoŋ.

²⁵ Naŋ i Jesus ti vet munia wa, Inau o tavaraka kel, wa o esu; isei qe nomtup inau, sin qe mate, pa ni te esu;

²⁶ Wa isei qe esu wa we nomtup inau, ni tete mate lai ti tuai. Ko we nomtup o ike?

²⁷ Naŋ ni we vava wa, We, Lord; nau me nomtup veta si iniko i Christ Natun God, i gene iloke we mule ma ilo marama.

²⁸ Ni me vava paso tamaike, ti vanreag, ti log roroŋo tasina i Meri, ti vet wa, I vatogo iake, wa ni we logiko at.

²⁹ Ni me roŋotag, pa ti tavaraka gaplot, ti mule suria.

³⁰ Wa i Jesus gate niŋa tiqa alo vanua; ni qale toga alo masaoi i Martha me varniŋa ineia ti aia.

³¹ Wa ira ta Judea we pute amaia alo ima si a ge masuria, we ilo i Meri ti tavaraka gaplot ti rowolue, we tataga ineia, we nonom si ni we mule ilo qaraŋa si a taŋi aia.

³² Wa i Meri me mule niŋa o vatine i Jesus aia, ti iloa, ti suragia ape raŋona, ti vet munia wa, Lord, ko ta iake, tutuak tete mate.

³³ Wa alo i Jesus we iloa we taŋi, wa ira ta Judea me mule tuwale ma amaia we taŋi, naatana me tatige, wa ni we lolomatikotiko;

³⁴ ti vet wa, Kamiu me saloa avea? Naŋ ineira we vet munia wa, Lord, van ma si ka ilo.

³⁵ I Jesus me taŋi.

³⁶ Naŋ ira ta Judea we vava wa, Ilo, ni me tape tama avea ineia.

³⁷ Naŋ o tuanira me vet wa, I gene iloke me ge lik namatansei me pei ti; ni gate mana wun si a kearag o matea nan o tanun mulaŋ iloke?

³⁸ Wa naatan Jesus me tatige aneane, wa ni we mule niŋa o qaraŋa. O lia ilone, wa o vat me pute apena.

³⁹ Naŋ i Jesus wa, Lareag o vat. Naŋ i Martha, tutuan i gene me mate, ti vet munia wa, Lord, ni me puna veta; ape naqoŋina me vat veta.

⁴⁰ Naŋ i Jesus ti vet munia wa, Nau gate vava muniko wa, Si ko qe nomtup, ko te ilo moma naleŋasin God?

⁴¹ Manigiu ilone neira we lareag o vatu. Wa i Jesus me ate kalo namatana, ti vet wa, Mama, nau we vareaniko apeniko me tiŋqoro inau.

⁴² Wa nau me gilala si ko we tiŋqoro vagae inau; pa na me vava o manigiu o sul we tira waliog iake, si neira a nomtup si ko me vatraŋ nau ma.

⁴³ Ni me vava tamaike, paso nan ti awoawo mun o liŋai we poa wa, Lasarus, rowolue ma.

⁴⁴ Wa o tamate me rowolue ma, me vivis goro napanena wa naraŋona mun o siopa talo qaraŋ tamate, wa me vivis goro nanagona mun o siopa maŋmaŋ. Naŋ i Jesus ti vet muneira wa, Ulia, ukegia ni mule.

⁴⁵ Wa ira ta Judea we qoqo me mule veta ti sur i Meri, we sagsagarag mora o gagapalag mon Jesus, pa we nomtupua.

⁴⁶ Nava o tuanira we mule at sur ira Pharise, we gaganag muneira ape gagapalag ŋaŋ i Jesus me ge ti.

⁴⁷ O manigiu o ine ira oloolo liwoa tara Pharise we gora tuwale o vavtig veveg, we vava wa, Nina we ge o sava, ape i gene iloke we ge o vaglala ŋaŋ we qoqo?

⁴⁸ Si nina qe ukeg mamasa ineia tamaike, o tanun nol ŋaŋ te nomtupua, wa ira ta Rom te van ma te lareag natanonina wa o sul ananina.

⁴⁹ Naŋ i tuara tamaira, i Kaiaphas i moe oloolo alo tau ilone, me vava wa, Kamiu gate gilala ran;

⁵⁰ wa kamiu gate nonom vaglala si iloke we piriŋ mantag kamiu si o tanun tuwale te mate leas o sul, wa o sul nol ananina tete tagea apena.

⁵¹ Pa ni gate vava matapuna tamaike: pa ineia i moe oloolo alo tau ilone, wa ni we ligog apen Jesus sin te mate ape sul;

⁵² wa gate ape sul ilone i tuwale, pa sin vile tuwale mulaŋ gina ira merein God me salsaleŋa ti.

⁵³ O manigiu ilone nan o qoŋ ilone neira me varsikesike si a ge mateia.

⁵⁴ O manigiu o ine i Jesus gate mule kelkel mulaŋ alo maea alo vatitnara ta Judea, pa ni me toa ilo vatine arivtag o vanua vanameag, ilo laqlaqe vanua we log si Ephraim, wa tara tiŋqoro me toga galtag aia.

⁵⁵ Wa o rowolagau nora ta Judea me rasu ma; wa ineira we tar me mule kalo i Jerusalem nan o vanua ŋaŋ, alo o rowolagau gate noga tiqa, si a ge wenewene kelura.

⁵⁶ Wa ineira me sike i Jesus, we varvava alo ineira we tira alo tinesara we roŋo wa, O sava kam we nonom? Ni tete mule ma wun ape lakalaka?

⁵⁷ Pa ira oloolo liwoa tara Pharise me vatraŋ veta si isei qe gilala si ineia avea, ni gaganag lue, si neira a tauria.