John 10 - O Vatavata we Garaqa 1931 (Vanuatu)

¹ We nun, we nun, nau we vava mun kamiu wa, Isei qe tete van pata ilo geara sheep ape mategeara, pa we kalo we sea ilolona, ineia i palu wa i vuspalu.

² Panava isei we vanpata ape mategeara ineia i altag goro o sheep ŋaŋ.

³ I ilo goro mategeara ti waka munia; wa o sheep ŋaŋ we tiŋqoro naliŋana; wa ni we log valval sase sheep pulana, wa ni we takira i varea.

⁴ Wa alo ni we vure lue pulan o sheep, ni we tursalemoa ineira; wa o sheep ŋaŋ we tataga ineia, o manigiu neira we gilala naliŋana.

⁵ Nava neira gate tataga o salavano, pa neira te toa nania: o manigiu neira gate gilala naliŋara salavano.

⁶ I Jesus me vava muneira o vavae tenegag iloke; nava neira gate lolomaran o sava ni me vet muneira.

⁷ O manigiu o ine i Jesus ti vet mulaŋ muneira wa, We nun, we nun, nau we vava mun kamiu wa, Inau o mategeare sheep.

⁸ Irasei nol me van moai inau ineira ira palu wa ira vuspalu; nava o sheep ŋaŋ gate tiŋqoro ineira.

⁹ Inau o mategeara; isei we van pata alo inau ni te esu apena, wa te van pata wa te van lue, wa te ilo suar o valis.

¹⁰ I palu we van gese ma si a palu, wa si a vus, wa si a ge mate: na me van ma si neira a taur mora o esu, wa si neira a taur tuan.

¹¹ Inau i altag goro we wia; i altag goro we wia we map siwo naesuna o manig sheep ŋaŋ.

¹² Nava i gene rusag, ineia gate i tur altag goro, wa o sheep ŋaŋ gate pulana, pa ni ta ilo o qoe kurkur we mule ma, ni te ukeg o sheep, pa ti toa, wa o qoe kurkur te takul ineira, te ge saleŋa o sheep ŋaŋ.

¹³ I gene rusag we toa, ape neia i gene rusag, wa ni gate nonom aneane ape sheep ŋaŋ.

¹⁴ Inau i altag goro we wia; wa na we lolomaran ira gene anak, wa ira gene anak we lolomaran nau,

¹⁵ tama o Mama we lolomaran nau, wa nau we lolomaran o Mama; wa nau we map siwo naesuk o manig sheep ŋaŋ.

¹⁶ Wa pulak o tuan sheep mulaŋ pa gate talo geara iloke; namok ran si na takira mulaŋ ma, wa neira te roŋotag naliŋak; wa te vavtig sheep tuwale wa i altag goro i tuwale.

¹⁷ O manigiu iloke i Tamak we tape inau, ape nau we map siwo naesuk si na la kalo mulaŋ.

¹⁸ Isei gate lareag nan nau, pa nau we map matapuk siwo. Inau we mana si na map siwo, wa nau we mana si na la kalo mulaŋ. Na me la o lea vatraŋ iloke amen Tamak.

¹⁹ Naŋ me qeteg raka mulaŋ o vile wora amaira ta Judea o manigiu o vavae ŋaŋ iloke.

²⁰ Ra tuanira we qoqo we vava wa, O vui we tatas amaia, wa ni we lelera; ape sa kam we tiŋqoroa?

²¹ Naŋ o tuaniu wa, O vavae ŋaŋ iloke gate mon o tanun o vui we tatas we gege ineia; o vui we tatas te ge lik lai namatara matapei?

²² Wa o lakalaka ape we varoŋo o ima me wesu a Jerusalem, pa o rara.

²³ Wa i Jesus me mule kelkel alo vatine we roŋo, alo malmaluima me log non Solomon.

²⁴ Wa ira ta Judea we sasalev waliogia, we vava munia wa, O qoŋ ti nivisa ko te ge ikamam a nom varuarua? Ko ta i Christ, ka wawaŋ lue mun kamam apena.

²⁵ Naŋ i Jesus ti valuira wa, Na me gaganag veta ti mun kamiu, wa ikamiu gate nomtup; o gagapalag ŋaŋ nau we ge alo sasan Tamak, iloke ŋaŋ gina we gaganag we tira apenau.

²⁶ Pa kamiu gate nomtup; apen kamiu gate talo sheep napulak, tama na me vava veta ti mun kamiu.

²⁷ Pulak o sheep ŋaŋ we tiŋqoro naliŋak, wa nau we gilala ineira, wa neira we tataga inau:

²⁸ wa nau we la muneira o esu galava; wa neira tete mate tagea ti tuai ti tuai, wa isei tete wosag lai neira nan napanek.

²⁹ I Tamak qa me sogov neira ma munau, ni we liwoa nan ra gene nol, wa isei tete wosag lai neira nan napanen Tamak.

³⁰ Ikara i Tamak i tuwale.

³¹ Wa ira ta Judea me la kalo mulaŋ o vat si a patuŋia.

³² Naŋ i Jesus ti valuira wa, Na me la lue mun kamiu o gagapalag we wia we qoqo nan o Mama; pa o sava gagapalag kam we patuŋ nau apena?

³³ Naŋ ira ta Judea me valui goroa wa, Kamam gate patuŋiko ape gagapalag we wia, nava ape ko we liŋasapur, wa apeniko o tanun we ge keluko si God.

³⁴ Naŋ i Jesus ti valuira wa, Gate rave alo nomiu o lea wa, Na me vava was, Kamiu ira god ŋaŋ?

³⁵ Ni ta log god iragai o vavae mon God me rowolue surira, (wa tete ul savrag lai o raverave),

³⁶ kamiu we vava apen i gene God me varoŋo ineia wa me vatraŋia ma ilo marama was, Ko we liŋasapur; ape nau me vava wa, Inau Natun God?

³⁷ Na ta tete ge o gagapalag mon Tamak, turpea nomtup nau.

³⁸ Pa si na we gege ran, si kam qe tete nomtup inau, tur nomtup o gagapalag ŋaŋ; si kamiu a gilala wa we lolomaran si o Mama alo inau wa inau alo Mama.

³⁹ O manigiu ilone neira me sike mulaŋ si a tauria, wa ni me vanreag nan napanera.

⁴⁰ Wa ni me mule mulaŋ at tavala Jordan ilo vatine i John me vasugroŋo moai ti aia, wa ni me togatoga aia.

⁴¹ Wa o tanun ŋaŋ we tar me mule suria, we vava wa, I John gate ge ilo o vaglala, pa o gene ŋaŋ i John me vava apen i gene iloke we nun.

⁴² Wa we qoqo me nomtupua aia.