James 5 - O Vatavata we Garaqa 1931 (Vanuatu)

¹ Ewe, ragai ira meresom, tur taŋtaŋ uloulo ape momiu o val togara lopsag te rowo ma sur kamiu.

² Nomiu o tarvaleŋaleŋa me naru veta, wa nomiu o siopa ŋaŋ o rupe me gan tagea veta;

³ nomiu o gold wa o silver me wal veta, wa o waliu tapena te tira lue mun vaglala mun kamiu, wa te gan navisogomiu tam o av. Kamiu me sogon tuwale veta momiu o moe gene ŋaŋ alo qoŋ ŋaŋ a tagir.

⁴ Ilo, o rusarusai nor o mawmawuitag me salsal o korn ti alo tuqemiu, pa amomiu me gogoroi galegale nan neira, we rararao raka; wa o awoawo nora gorogoro me niŋa pata veta ilo qoron i Lord Sabaoth.

⁵ Kamiu me togatoga mansinaga avawo tano wa we nanalŋara kamiu me wuras natoqamiu tama alo qoŋ te vuvuvus

⁶ Kamiu me veveg mate, me vus nawono i taniniga ni gate vatriv goro kamiu.

⁷ O manigiu o ine, ra tatasik, tur roŋo malapusa momiu niŋa o ŋaŋalue ma non i Lord. Ilo, i tag tuqe te nernerei o sinaga talo tano o gene tun, wa te roŋo malapusa apena, ni gai lav mona o wena amoa wa a tagir mulaŋ.

⁸ Wa kamiu mulaŋ tur roŋo malapusa momiu, tur vatogar natoqamiu ape ŋaŋalue mon i Lord me rasu veta ma.

⁹ Turpea var ŋirŋir goro kamiu, nan wa veveg kamiu apena: ilo, i veveg me tira goro veta o mateima.

¹⁰ Tur lav momiu, ratatasik, o makaliu ape we roŋo malumuaga wa ape roŋo malapusa, ira prophet nane me vavava ti alo sasan Lord.

¹¹ Ilo, nina we wievavae irasei we roŋo virig. Kamiu me roŋotag ape liŋan Job we roŋo virig, wa kamiu me ilo momiu naulusin Lord; wa si i Lord we lolowia vaga qoqo, wa we lolomagarosa.

¹² Nava iloke, ratatasik, o moe gene ran, si nipea vava vagogonag si mun o tuka si mun o tano, wa nipea mun o vava vagogonag we sea tea. Pa momiu o vavae si We, ni we, wa Tagai, ni tagai; nan kamiu qa wa masu ilo lea veveg apena.

¹³ Isei amen kamiu qe toga lopsag? ni tataro apena; isei we masekeseke? ni sur o as varean.

¹⁴ Isei amen kamiu we gopa? ni log tuwale ma ira tamtamaragai talo loglue, wa neira a tataro avunana, we uraia mun o lig oliv alo sasan Lord.

¹⁵ Pa o tataro tape nomtup te ge esu i gopae, wa i Lord te la rakatia; wa si ni me gege tatas ti, te nomvitag munia.

¹⁶ Tur varvavaul val kamiu nomiu o tames ŋaŋ; wa tur tataro valsei apen sei, si kamiu a mauka lai. O tataro lalaktera mon i taniniga we gagapalag mana vaga qoqo.

¹⁷ I Elia nane o tanun namatevuna tuwale ape matevunina, pa mun o tataro ni me tataro mona nan wa wena; wa gate wena ran vawo tano o tau nitol wa o vula laveatea.

¹⁸ Wa mulaŋ ni me tataro, wa o tuka we maukeg ma o wena, wa o tano me uwa non o wo sinaga ŋaŋ apena.

¹⁹ Ratatasik, si sei alo vatitnamiu qe sipa nan o liŋe nun, wa si sei qe ge vusiag kelua,

²⁰ ni lolomaran o ike, wasi i gene we ge vusiag kel o tanun ganganor nan o lerava tape matesalana, i gene ilone te vaesu o atai nan o matea, wa te liŋarag o vavtig ganganor.