James 4 - O Vatavata we Garaqa 1931 (Vanuatu)

¹ O vagvagalo mavea wa o varkesa ŋaŋ alo vatitnamiu? pa gate wasi nan nomiu o maros ŋaŋ talo visogoi ma we mulemule gona ma alo soesoemiu?

² Kamiu we tortoron pa gate taur momiu; kamiu we vusvus nawono wa we loloanuanu, pa gate niŋa qalo lai apena; kamiu we varkesa we vagvagalo, pa gate taur momiu, ape kamiu gate paere apena;

³ kamiu we paepaere wa gate lav momiu, ape kamiu we paere ava, si kamiu a ge ganvun alo nomiu o tortoron ŋaŋ talo visogoi.

⁴ Ragai, ira pakapaka, wa kamiu iraro pakapaka, kamiu gate gilala momiu si we toga pulpul amen o marama te toga tavalalea mun God? O manigiu si isei qe maros we pulpul amen o marama, ni te qeteg tavalalea mun God apena.

⁵ Sa si kamiu we nonom si o raverave we vava matila si, O nonomia we togatoga alo inina wasi we tortoron gese si a lolotatas?

⁶ Nava ni we vasoal ma o sogov we poa sage; o manigiu ti vet si, God we vatriv goro rasei we nom rekereke kelura, nava we vasoal o sogov mun rasei we nom pepewu kelura.

⁷ O manigiu ilone tur map kel kamiu sur siwo mun God; tur tira goro i Satan, wa ni te toa kel nan kamiu;

⁸ tur susurut momiu sur God, wa ni te susurut ma sur kamiu. Tur ge wenewene napanemiu, ira ganganor, wa tur ge matartoga natoqamiu, ira lolovaruarua.

⁹ Tur togatoga lopsag, wa tur lolowono, wa tur taŋtaŋ momiu; nomiu o maraeva ni ris lolowono nia, wa nomiu o malakalaka ni ris sasakariga nia.

¹⁰ Tur nom pepewu kel kamiu goro nanagon God, wa ni te lav raka kel kamiu sage.

¹¹ Turpea vava tatas kel kamiu, ratatasik; isei qe vava tatas i tasina, wa we veveg qalo i tasina, ni we vava tatas o lea, wa we veveg qalo o lea. Pa si ko qe veveg qalo o lea, ko gate i gene we gagapalag o lea, nava we veveg.

¹² I tuwale ran i qeteg lea wa i veveg; ineia ilone we mana si a vaesu wa we ge tagea; wa iniko isei nane te veveg lai o tagvanua?

¹³ Ewe, ragai we vava si, Qarig wa maran kamam te mule pata ilo laqlaqe vanua iloke, wa we gagapalag aia o tau te tuwale, wa te tuvatuvag, wa te taur raka momam o som apena;

¹⁴ pa kamiu gate lolomaran ilo o gene tea ta tavala maran. Naesumiu tam o sava qa? O marav nake te ŋaŋalue galean, wa paso nan te tagea kel.

¹⁵ Pa amomiu si a vava leas wa, Si i Lord qe maros, kamam te qara esuesu, wa kamam te qara ge tamaike si tamaine.

¹⁶ Nava ilokenake kamiu we sotal kel kamiu alo nomiu o vava vaketeag ŋaŋ, wa o liŋe sotal nol tamaike o malkeke.

¹⁷ Wa o manigiu o ine, alo isei we gilala we gagapalag mantag, nava gate gagapalag, amen i gene iloke o ganganor apena.