James 3 - O Vatavata we Garaqa 1931 (Vanuatu)

¹ Turpea qetqeteg vatvatogo we qoqo, ratatasik, ape kamiu we gilala si nina te la monina raka sage o lea veveg apena.

² Wa o manigiu ape nina nol we tutuag vaga qoqo. Pa si sei qe tete tutuag alo vavae, o tanun taurmate gina ilone, wa we mana si a rave risris mulaŋ naturiana nol.

³ Ilo, nina we map o talai ilo ŋus horse ŋaŋ si neira a roŋotag nina, wa nina we ave risris lai natarapera nol.

⁴ Ilo mulaŋ o aka ŋaŋ we poapoa tam o sava, wa o laŋ netenete ŋaŋ we vasuratira, pa we ave kelkel ineira mun o turwose mantagai aneane ivea ivea, tama i gene we taur o turwose qe maros tinegaro tamaine.

⁵ Wa tamaine mulaŋ o garameai o soasoai mantagai, pa we sotal we liwoa. Ilo, o av o natiu te tiu lai o vavtig lito we poa tam o sava;

⁶ wa o garameai o av nane; o marama variava vires. Tamaine gina o garameai we toga alo soesoenina, o gene qa we nunurvag natarapenina nol, wa we gao serlawalawa o matev ronronotar, wa o geena me tiu nane sin lawalawa mona.

⁷ Ape val matev qoe ŋaŋ, wa o manu ŋaŋ, wa o gene ŋaŋ we kalokalo wa talo lama, te ge mamaru ran, wa me mamaru veta mun o matev tanun;

⁸ nava o garameai isei tuwale o tanun tete ge mamaru lai; o mala gene nane we kitakita, we uravag o vaŋan pal te ge mate.

⁹ Wa munia gina nina we wievavae God o Mama, wa munia mulaŋ nina we vivnag o tanun ŋaŋ, me tiŋira ti tataga namakalin God.

¹⁰ Nan o valai tuwale ti roworowolue o wievavae wa o vivnag. Pa gate wia nane, ratatasik, o ine ŋaŋ we toga tamaine.

¹¹ Sa si o qeteg pei te wora savrag nan o matai tuwale o pei malea wa o pei gogona?

¹² O fig mulaŋ, ratatasik, te uwa lai o wo oliv, si o vine o wo fig? Wa tamaine gina o nawo tete ukeg lai o pei malea.

¹³ Isei amen kamiu we lolomaran wa we menaro? ni gaganag mon o gagapalag ŋaŋ alo non o togara we wia, mun o matev aperig we tira ape lolomaran.

¹⁴ Nava si o loloanu we gogona wa o varleasag alo toqamiu; turpea sotal kel kamiu, wa turpea gale goro o liŋe nun.

¹⁵ Gate iloke o lolomaran we siwo ma avunana; nava iloke we talo tano, talo esu visogoi, talo vui we tatas.

¹⁶ Ape o loloanu wa o varleasag ta avea, o togara we matikotiko wa o val gagapalag malkeke te toga aia.

¹⁷ Nava o lolomaran ta vunana ma we wenewene amoa, paso nan we tapeto, we lolo malumlum, we lolomasur, we uravag o magarosa wa o woai ŋaŋ we wia, gate iloilo raka gap, wa gate sokoi goro.

¹⁸ Pa o wo togara taniniga te riv siwo mun o tamata, mun rasei we ge mora sin tamata.