James 2 - O Vatavata we Garaqa 1931 (Vanuatu)

¹ Ratatasik, turpea tautaur o nomtup apen i Lord Jesus Christ we leŋas mun o lavlav nagoi.

² Ape si qe mule pata ma ilo nomiu o vug tuwale o tanun me saru goro napisuna mun o gold, wa mun o siopa terelawa; wa si qe mule pata mulaŋ o tanun masara mun o siopa we lepalepa;

³ wa si kam qe ilo mana i gene we saru o siopa terelawa, wa we vava munia wa, Iniko gai, si ka pute mantag iake ma; pa we vava mun o masara wa, Iniko gai, ka tira iane, si pute iake alalaŋe nok o tano ververesag;

⁴ si ta tamaine, kamiu gate veveg seasea alo vatitnamiu? wasi kam gate qeteg veveg mun o nonomia ŋaŋ we malkeke?

⁵ Tur roŋotag momiu, ira tatasik ra meratape; wasi God gate ilo raka ira masara talo marama iloke? pa we mere nomtup, wa amora te taur usurag mora o marana ni me ligog ti apena mun rasei we tapea.

⁶ Nava ikamiu me ge tagtageag i gene masara. Wa gate ira meresom we ge vavakae kamiu? wa gate ineira we raverave kamiu ilo tano veveg ŋaŋ?

⁷ Wasi neira gate liŋasapur o sasai we wia iloke me log ti avunamiu?

⁸ Pa si kam qe kokor taurmate o lea maranaga, tataga o raverave wa si, Ka tape i tagvanuama tama iniko kel, kam te gege mantag tamaine.

⁹ Pa si kam qe lav vires o nago tanun, kamiu we gagapalag o ganganor, wa me veveg qalo kamiu mun o lea si we tamtames.

¹⁰ Ape si isei ta kokor lai o lea nol, pa te tutuag alo sava tea, te tira munia alo lea nol si napugana apena.

¹¹ O manigiu i gene me vet si, Nipea pakapaka, ineia tuwale mulaŋ me vet si, Nipea vus nawono. Pa si ko qe tete pakapaka, nava si ko qe vus nawono, pa ko me ge veta moma si ko me tames goro o lea.

¹² Tur vavava tamaike, wa tur gagapalag momiu, tama irasei te vevegira aŋaisa mun o lea tape togara wasawasa.

¹³ Ape te veveg matawovat mun sei gate ge magarosa ilo; wa o magarosa te soua si we raka sage nan o lea veveg.

¹⁴ Ratatasik, o sava te rowo lava tea si sei qe vava si o nomtup amaia, nava si o gagapalag ŋaŋ qe tagai amaia? pa o nomtup ilone te vaesua lai tea?

¹⁵ Pa alo si o tasiu, o mereata si o tavine, qe toga mamasa, wa we valuava nan o sinaga te gana val qoŋ;

¹⁶ wa si isei amen kamiu mulaŋ qe vava mun neira was, Tur mule tamata at, tur masmasil, wa tur toqotoqo, nava sin qe tete la tea mun neira o gene te maros ran si a piriŋ natarapera; alo si qe tamaine, o sava we wia te rowo lava mun neira apena?

¹⁷ Wa o nomtup mulaŋ tamaine, si ta i tagai o gagapalag ŋaŋ apena, me mate veta alo ineia kel.

¹⁸ Nava isei wun te vava raka si, Amaiko gina o nomtup, wa amenau o gagapalag ŋaŋ: si ka gaganag lue ma, gai, nom o nomtup asau nan nom o gagapalag ŋaŋ, wa na te gaganag lue moksa muniko mun mok o gagapalag nok o nomtup mulaŋ.

¹⁹ Ko we nomtup i God si i tuwale wora; pa we wia nane; wa o vui we tatas ŋaŋ mulaŋ we nomtup, pa we sigesigeragira apena.

²⁰ Pa ko we maros we gilala moma, gai, qaqae, si o nomtup we toga mamasa nan o gagapalag ŋaŋ we toga matemate gese?

²¹ Gate nonom si i Abraham i tamanina we taniniga mun o gagapalag ŋaŋ, ape ni me map kalo mona i Isaak i natuna ivawo tano oloolo?

²² Ko we ilo vaglala moma wun si o nomtup me gagapalag sara tuwale alo mon o gagapalag ŋaŋ? wa si me ge taurmate non o nomtup mun o gagapalag ŋaŋ?

²³ Wa me ge tira ran o raverave we vet wa si, I Abraham me nomtup God, wa me vasogo munia mun liŋe taniniga; wa me tiu nasasana si pulsalan God apena.

²⁴ Wa alo ine nane kamiu we ilo momiu wun si we veveg ape tanun si we taniniga mun o nonom ape mon o gagapalag ŋaŋ, wa gate mun o nomtup mamasa.

²⁵ Wa gate sasarita mulaŋ apena si me veveg apen i Rahab o tavine pakapaka si we taniniga, mun o nonom ape gagapalag ŋaŋ? alo ni me lav vasgot ira sala, wa me ukeg luera ilo matesala we sea?

²⁶ Ape tama o turiai si qe asau nan o mapsagiu, o tamate vires nake; tamaine mulaŋ gina o nomtup si qe asau nan o gagapalag we toga matemate gese.