Vẽnegre 5 - KÃAB-PAALGÃ KOE-NOOGO

Sebre la Pe-bila

¹ La mam yãa sebr sẽn be sẽn zao-a geerã zugã nug rɩtgẽ. Sebrã pʋg ne a poorã fãa gʋlsame, la b sog-a-la ne sogds a yopoe.

² La mam yãa malɛk sẽn tar pãng sẽn zẽkd a koɛɛg n sokdẽ yaa: Ãnna n zems tɩ sok sogdsã la a lak sebrã?

³ La ned baa a yen da ka be arzãn wall tẽng zugu, wall tẽnga tẽngr sẽn dag n tõe n lak sebrã wall a ges-a ye.

⁴ La b sẽn ka yã ned baa a ye sẽn zems tɩ lak sebrã wall tɩ ges-a wã yĩnga, mam da yãbda wʋsgo.

⁵ La kãsem-dãmba ned a yen yeela maam yaa: Da yãb ye. Ad Zuda buudã gɩgemd sẽn ya a Daviid yagengã paama tõogre, n na n sok sogds a yopoe wã la a lak sebrã.

⁶ La mam yãa Pe-bil sẽn yas yĩngr geerã sʋka la bõn-vɩɩs a naasã ne kãsem-dãmba sʋka, la a yaa wa pesg b sẽn kʋ. Pe-bilã da tara yɩɩl a yopoe la nin a yopoe sẽn ya Wẽnnaam sɩɩs a yopoe wã b sẽn tʋm dũniyã tɛk fãa wã.

⁷ Pe-bilã waa n deega sebrã sẽn be sẽn zao-a geerã zugã nug rɩtgẽ wã.

⁸ Pe-bilã sẽn deeg sebrã, bõn-vɩɩs a naasã ne kãsem-dãmbã pisi la a naasã wõgemda bãmb taoore, la bãmb ned kam fãa zãada pɛndg la sãnem laag sẽn pid ne tɩdar sẽn tar yũ-noogo, sẽn ya nin-sõamyã pʋʋsgo.

⁹ La bãmb da yɩɩnda yɩɩn-paalg n yetẽ: Yãmb n zems tɩ reeg sebrã la y sogs a sogdsã, bala b ra kʋʋ yãmba, la yãmb fãaga neb buud fãa pʋgẽ, goam buud fãa pʋgẽ, tẽms fãa pʋgẽ, soolem fãa pʋgẽ ne yãmb zɩɩm tɩ b lebg Wẽnnaam neba.

¹⁰ Yãmb kɩtame tɩ bãmb lebg soolem la maan-kʋʋdb tõnd Wẽnnaamã yĩnga, la bãmb na n dɩɩ naam dũni zugu.

¹¹ Mam gesame la m wʋma malegs wʋsg sẽn gũbg geerã, ne bõn-vɩɩsã la kãsem-dãmbã koeese, la bãmb sõorã yaa tus piig naoor tus piiga, la tus naoor tusa.

¹² Bãmb da zẽkda b koees n yetẽ: Pe-bil ning b sẽn dag n kʋ wã zemsame tɩ reeg pãn-tõogo, la arzegse la yam la pãnga, la waoogre, la ziiri la pẽgre.

¹³ La mam wʋma bõn-nandsã fãa sẽn be arzãna la sẽn be tẽng zug la tẽngã tẽngre la ko-kãsenga zugu la bũmb nins fãa sẽn be be wã sẽn yet yaa: Sẽn zao-a geerã zugã la Pe-bilã n tog ne pẽgre, la waoogre, la ziiri la pãnga, zamaan o zamaane.

¹⁴ La bõn-vɩɩs a naasã yeelame yaa: Ãmina! La kãsem-dãmbã yĩgimdame n waoog-ba.