Ezéchiel 48 - Ma Zhiklè

Nzlembaɗ verzi ndohai, a herkeda ta

¹ Na haha nzlembaɗ verzi ndohai: Dan: herkeda tengaʼa te man a géɗèʼa dra, a hinè a ma iyam mbiaʼa, ha ndè Hethlon, a Hamath, a Hatsar-Enon, tʼherkeda Damas te man a géɗèʼa, a ma kuma Hamath. A hinè te kuma te civèɗ mvèng pats, ha ndè a kuma te civèɗ nkèl pats: Dan, dak 1.

² A tsagi herkeda Dan: Asser, dak 1. A hinè te civèɗ mvèng pats, ha ndè a civèɗ nkèl pats.

³ A tsagi herkeda Asser: Nephthali, dak 1. A hinè te civèɗ mvèng pats, ha ndè a civèɗ nkèl pats.

⁴ A tsagi herkeda Nephthali: Manassé, dak 1. A hinè te civèɗ mvèng pats, ha ndè a civèɗ nkèl pats.

⁵ A tsagi herkeda Manassé: Ephraim, dak 1. A hinè te civèɗ mvèng pats, ha ndè a civèɗ nkèl pats.

⁶ A tsagi herkeda Ephraim: Ruben, dak 1. A hinè te civèɗ mvèng pats, ha ndè a civèɗ nkèl pats.

⁷ A tsagi herkeda Ruben: Juda, dak 1. A hinè te civèɗ mvèng pats, ha ndè a civèɗ nkèl pats.

⁸ A tsagi herkeda Juda, te civèɗ mvèng pats, ha ndè a civèɗ nkèl pats, da nza a herkeda nkezlaʼa man kin ckoɗauda: nguzlohaʼa 12km, lèmèlèmè ara dak man ndohi te verzi staɗ ta ngotso, a hinè te civèɗ mvèng pats ha ndè a civèɗ nkèl pats. Herkeda nkezlaʼa da nza te ndevaʼa.

⁹ Sam nkezlaʼa man kin ckoɗauda a kin va na Ndo nzi pèc pècèk, da gu 12 km te civèɗ ngurèʼa, 10 km te civèɗ nguzlohaʼa.

¹⁰ Sam nkezlaʼa haha va-va ta ndohi aranta: A ndohi mvi skwi a Zhiklè, sam staɗ: ngurèa 12 km te civèɗ man a géɗèʼa, 5 km te civèɗ nguzlohaʼa te civèɗ nkèl pats, 5 km te civèɗ mvèng pats. Ngurèa 12 km te civèɗ man a dukwaɗ. Gi Zhiklè nkezlaʼa da nza te ndevaʼa.

¹¹ Da ga a skwi ndohi mvi skwi a Zhiklè nkezlaʼa, wudahi Tsadok, man ta wèr di mizlinè ga, man ta zlak ta ɓai, te va man ndohi Israel a ndohi Lévi ta zlak ta.

¹² Sèi tengaʼa da ngotso te va sam nkezlaʼa, a skwi nkezli nkezlaʼa, a tsagi sam ndohi Lévi.

¹³ Ndohi Lévi, lèmèlèmè ara sam ndohi mvi skwi a Zhiklè: Sam 1: ngurèa 12 km, nguzlohaʼa 5 km. Sam tèlèba, ngurèa 12 km, nguzlohaʼa 10 km.

¹⁴ Tʼherkeda haha ta slalia ta prè a ta hümbèɗè skwi azɓai, te man herkeda mbelaʼa. Ta slalia ta va ta a ri ndohi ngiɗè azɓai, te man sam nkezlaʼa, a Ndo nzi pèc pècèk.

¹⁵ Njèkèdi sam, nguzlohaʼa 2 km, civèɗ ngurèʼa 12 km, sam nkezlaʼa ka bai. Ndohi kokwar ta da gi gi a pa, dala ambalai, kokwar da nza te ndevaʼa.

¹⁶ Na haha nlivèʼa: civèɗ man a géɗèʼa: a gi ara 2 km a rèta kèshkata; civèɗ man a dukwaɗ, 2 km a rèta kèshkata; civèɗ mvèng pats, 2 km a rèta kèshkata; civèɗ nkèl pats, 2 km a rèta kèshkata.

¹⁷ Dala ambalai da tèuda kokwar a pa: a tsi ri 250 te civèɗ man a géɗèʼa, 250 te civèɗ man a dukwaɗ, 250 te civèɗ mvèng pats, 250 te civèɗ nkèl pats.

¹⁸ Njèkèdiaʼa, sam te civèɗ ngurèa a ma sam nkezlaʼa, km 5 te civèɗ mvèng pats, km 5 te civèɗ nkèl pats; ndohi man ta gi mizlinè te kokwar da ngotso a skwi nʼndi gi ta.

¹⁹ Tengaʼa man ta gi mizlinè te kokwar, a woy ta zhè te va ndohi verzi Israel tèlèba.

²⁰ Sama tèlèba: te civèɗ ngurèʼa km 12; te civèɗ nguzlohaʼa km 2 a rètaʼa. Tsagi faɗ tèlèba lèmèlèmè. Va-kezla sam nkezlaʼa, a va sam kokwar mbiaʼa.

^21-22 Njèkèdi herkeda te ndev Juda a Benjamin, a bihai. Sam a tsagi sam nkezlaʼa a kokwar mbiaʼa cèw, tʼuda, te civèɗ mvèng pats, a gi km 12, ha ndè a kuma te civèɗ mvèng pats, tʼuda, a civèɗ nkèl pats, a gi 12 km, ha ndè a kuma te civèɗ nkèl pats, ara skwi gwoli ta, ara skwi gwoli ta, bihi da ngotso. Sam nkezlaʼa, a sam gi Zhiklè nkezlaʼa, da nza te ndevaʼa. Aman skwi nʼndi gi ndohi Lévi, skwi nʼndi gi kokwar mbiaʼa a te va ɓai.

²³ Njèkèdi verzi ndohai, herkeda tengaʼa: Benjamin, dak 1; a hinè te civèɗ mvèng pats, ha ndè a civèɗ nkèl pats.

²⁴ A tsagi herkeda Benjamin: Siméon, dak 1. A hinè te civèɗ mvèng pats, ha ndè a civèɗ nkèl pats.

²⁵ A tsagi herkeda Siméon: Issacar, dak 1. A hinè te civèɗ mvèng pats, ha ndè a civèɗ nkèl pats.

²⁶ A tsagi herkeda Issacar: Sebulon, dak 1. A hinè te civèɗ mvèng pats, ha ndè a civèɗ nkèl pats.

²⁷ A tsagi herkeda Sebulon: Gad, dak 1. A hinè te civèɗ mvèng pats, ha ndè a civèɗ nkèl pats.

²⁸ A tsagi herkeda Gad, a civèɗ man a dukwaɗ, nasa kuma Thamar, a hinè te Thamar, ha ndè a ma iyam te Kadès, a ndè a ma a sam woyam Egypte, ha ndè a ma iyam mbiaʼa.

²⁹ Nasa herkeda man kin kezla ta ndohi te verzi Israel a jimèr, a ta ngotsa a skwi nʼndi gi ta. Nasa dak ta, Bi Zhiklè a gaɗa.

Ntamagi kokwar

³⁰ Na haha sam ndè auda te kokwar.

^31-34 Sèi ta baha na ntamagi kokwar a nzlembaɗ verzi ndohi Israel: Sam tèlèba, a ntamagi makar makar, a tsi ri km 2 a rèta kèshkata. A civèɗ te man a géɗèʼa: ntamagi Ruben, Juda a Lévi. A civèɗ mvèng pats: ntamagi Joseph a Benjamin a Dan. A civèɗ te man a dukwaɗ: ntamagi Siméon, Issacar a Sebulon. A civèɗ nkèl pats: ntamagi Gad a Asser a Nephthali.

³⁵ Ntèuda te pa tèlèba, a gi ara km 8. Anai da baha na kokwar a nzlembaɗ: Ndo nzi pèc pècèk a zhè a haha.