Mber 26 - MEY HAYNA WAYNA MA YEZU KRISTE MA MEVEY

Pol me key ka vaw ŋga, ka slam dey ma Agripa

¹ Agripa ma ləvar a Pol: «Ka vələmaka tsəveɗ ba me mbəɗey mey ka vaw ɗek.» Pol ma tsekefey har, ma təkəra guma ma mbəɗada mey ka vaw ŋga:

² «Ka guma ma Zuif hay tabiyaha ma ŋgəlafəmaya na na, teseɗey a daya 'ar bəza kakay, me tsey ka vaw ɗaw ka slam dey ɗek, bay Agripa.

³ Hərway kah na, me key ma tek ma Zuif hay, ta waway ta na ma kam ka 'ar vaw ta na hay, ekəɗey na, i kaka amboh, pafaya sləmay haya haya tey.

⁴ Da har ma ndzawa ɗaw zla, ta bəza ha na, i ndzawa da walaŋ ma ndaw ma dala ɗaw ana hay da Zeruzalem, Zuif hay tabiyaha. a səradama.

⁵ A səradama zla ekəɗey kakay, a slafama ma ka seydewe ŋga na, kendzey haɗaw a wuɗam na, ma ndzawa ɗaw da kuley la na na, i da diya na me ndey kakay ana, na ma Fariziyeŋ hay.

⁶ Ekəɗey teseɗey i ka dala ma sariya na, ka me pey dey la, na Bay ma Bəla ma tsatərawa a baba tete la hay ana.

⁷ Arka gedzek ana, kurow kava tsew ana hay a kama kuley ma Bay ma Bəla ana, rəpas ta dəvaɗ adzay, mandzara ka mətsatar har na, hərway a pam dey ka da nəkadama tek ana, ma da key ana. Ka vəday ma me pey dey a neney na, bay, Zuif hay ma zəgəmiyawa ka dala ma sariya, ma ŋgəlafəmaya na, hərwuiya.

⁸ Ɗagay ka təɓama da walaŋ a kwar, Bay ma Bəla a da mbəladatərawa ndaw ma mətsa na hay kakay na, ka mey?

⁹ Yah na, i ka dzala ba me kəɗey vaw ta gədaŋ a ɗaw adzay, i ka tsənada mezəley ma Yezu ndaw Nazoreŋ ana zlay.

¹⁰ Yah na, i kawa da Zeruzalem na, andza neney: yah ana, ta 'ar a ɗaw ana, i ma həlata ndaw Kokwaɗ ana hay haɗadzidzay, i ma kuyadata a daŋgay, ta gədaŋ ma baba ɗuhwa na me key kuley ana hay, ma vələmiyawa na. Andza a kəɗəmata ha vagay ahiya na, a daya 'ar.

¹¹ I halata 'ay me ɗuley mey hay tabiyaha na, i səkada ma sadata banay, i təkatar ɗay ka mbəkadama me pey 'ar ata, arka ta seweɗ a ɗaw ana dzay na, i səpata ha, kasl a wuraw da 'ar bəla na hay.

¹² andza ha tok na, pas asləta na, i ma daway a Damas, baba ɗuhwa na me key kuley ana hay, ma vələmaya slam har, ta ɗeriwel aha da har, na ma zəgada ndaw ana hay.

¹³ Andza i ka tsəveɗ tok ŋgey, bay, ma wuzla rəpas na, i ma nəkada waw ma tek ana daha, a hərɗawa da 'ərlam, a wezley dey a fəna pas, ma sawa masahətaya ta me wezley dey ŋga na, ta ndaw a ɗaw ma kəsadəmaya na hay dzay.

¹⁴ La ma kuyam tabiyaha ka dala, arka i ma tsənada vəɗe ma ɗay, ma tsiyawa guma ta mey Ebrew: «Sol, Sol, ka kadaya tsetseh na, ka mey? Ka ŋgwetsey təke zlay zləna, ka kar na a vaw ɗek ana.»

¹⁵ I me mbəɗey kava: «Ɗagay kah ana way, Bay’ərlam a ɗaw?.» Bay’ərlam ma mbəɗawa kava: «Yah na Yezu, ka key tatakway na, ta yah,

¹⁶ Amana, lətsey ka 'ar sek eɗek, nəkafa i ɓaka vaw eɗey na, hərway i ka gaɗəmaka ba ma da tərey gawla ɗaw aha, ndaw seydewe ma tek ana ma nəkaka a dey na kah ma nəkadaya ekəɗey ana, ta tek ma da nəkəmaka a dey ana i ma da ɓaka vaw da huɗa na sa.

¹⁷ Zla ekəɗey na, i da ləhadəkawa ba da har ma səkway, ta ndaw ma dala Zuif ahiya kakay ana hay, na i ma da sləradaka ’ar ’ay ta na.

¹⁸ Ma kah ka wuradatara dey, ma mbəɗadatərawa dey ba da ləvaŋ, a waw me nəkey dey, da Slala ma Sataŋ ’ar 'ay Bay ma Bəla, ma aza ka da ndzafam me sey yam, ka meŋgəsey hay, ka da ndzafam slam har ma da zəmey tek ana andza ndaw ma təraya kokwaɗ ahiya ana hay ta me pey 'ar ata, ka yah ana.»

¹⁹ Zla da na ŋga na na tsana, bay Agripa, i slafa i ka kafa gədaŋ, ka tek ana ŋga na ma nəkiyawa a dey da 'ərlam ana kakay.

²⁰ Dzadzak sa tok na, tsəfəmey aha na, a ndaw ma Damas hay ba ɗagay, da Zeruzalem ta dala ma Zudey tabiyaha, arka a ndaw ma dala na Zuif ahiya kakay ana hay, i ma tələkada mey na, ma taya ka mbəɗadama mendzey ta, ka mbəɗam dey ’ar 'ay Bay ma Bəla, ka ndzam na, kassla andza ma mbəɗadama mendzey ta neney ana.

²¹ Zuif hay a zəgəmaya na hərwuiya, ta pas ana i da 'Ay me key Kuley, a wuɗam ma zəɗadəmaya 'ar ba.

²² Ta gədaŋ ma Bay ma Bəla ma wafaya vaw, ha kasl ekəɗey ana, re i key aha seydewe na, ka slam dey ma ndaw bəza na hay, ta ndaw ma səka na hay. Ndaw sek hay ta Moyiz ka tsəmawa ba ka vaw, ka tek ana ma da husawa na, i ka tsey a fəna na dakay.

²³ Kriste na ka key tsetseh ba, arka na ŋga na ndaw tsəfəmey ana, ma mbəlawa da walaŋ ma ndaw ma mətsa na hay, a dafa na ka taləkada mey ta waw me nəkey dey a səkway ta ndaw ma dala na Zuif ahiya kakay ana hay.»

²⁴ Andza Pol, ŋga kava ka guma ma me dzəŋgərey ka vaw ŋga na na, Festus ma tsərawa guma ta magala ha: «'Ar a mbəɗaka Pol! Tek eɗek ana kah ma sərada kambəlaɓa na na, a təradaka 'ar me mbəɗey aha.»

²⁵ Ama Pol me mbəɗey kava: «'Ar a mbəɗaya kakay, ŋgalaka ɗaw Festus, i tsey eɗey na, guma ma dərka na, na ta tsəveɗ ana.

²⁶ Bay a neney na i ma tsadara guma na, ndar ndar ana na, a sərafata ka tek ana hay tabiyaha, i sərada ha dey ta kava tek asləta ma zarafərawa da huɗa na dakay, hərway tek a neney hay a kəmawa na, da slam ma kəzla ha, kakay.

²⁷ Ka pey 'ar ka ndaw sek hay ɗaw, bay Agripa? I sərada ha dey ta kava ka pey aha 'ar'.»

²⁸ Arka Agripa ma ləvar a Pol tok: «A zarawa nekəɗey na ka da ləvey na, kah ka təradaya tsoy kretieŋ aha!»

²⁹ Pol me mbəɗey kava: ka key na nekəɗey, dakay haɗadzidzay na, ka dar ’ar ba a Bay ma Bəla na, kah ana dada tsa, kakay; amana satsa ndaw a neney hay tabiyaha, ma pafəmaya sləmay teseɗey ana hayna, kuray ka təram ɗerre andza yah, amana, mandzara megesele a neney madzuwadəmaya na hay!»

³⁰ Bay me lətsey ba ta Guverner, arka Berenis ta ndaw ma ndza hiya dzaya na hay.

³¹ Andza a dam aha tek ata, na taya ma tsam guma ka 'ar vaw ta na paɗ tsəveɗ ma ləvam: «Ndaw a neney na, ka key tek ɗa ka kəɗama vagay aha, dakay na ka pamar tsalalaw, kakay.»

³² Arka Agripa ma ləvar a Festus: «Kendzey ndaw a neney ka zəley Amperer ka vaw zlay na, akwa na a kəladama ba.»