Mber 22 - MEY HAYNA WAYNA MA YEZU KRISTE MA MEVEY

¹ Malam a ɗaw hay, baba ɗaw hay, ekəɗey na dzəkafəmaya sləmay ka guma ɗaw ana, i ma da tsakwar ma da dzəŋgərey ka vaw ɗaw ana.

² Andza taya ma tsənadama Pol a tsatar guma ta mey Ebrew na, taya ma ndzam tete a fəna sa.

³ «Yah na ndaw Zuif ma yaha da Tars da Silisi, ama i da gəley na, da wuraw a neney, i me ndzefey me dzeŋgey guma ma mewey ma baba lakwa hay haya hayaha na, ka slam sek ma Gamaliyel. I ma həla vaw aha me kəɗey vaw ka mey ma Bay ma Bəla na, kal kal andza ma kwar a neney teseɗey ana tiyatsa.

⁴ Arka i ma kadata tatakway ta ndaw hay, ha a memətsey hərway ma tsəveɗ a neney, i me dzuwey mawal hay ta ŋgwas hay, ma kəladata a daŋgay.

⁵ Baba ɗuhwa na me key kuley ana hay, ta me tsəhey 'ar ma ndaw ma səka na hay, a slafama me key seydewe ana. Arka i me təɓey ɗeriwel ma dada a 'ay malam a lakwa hay da Damas na, da har ata, ma sləradəmaya ma i ka dzuwatərawa, i ka həlatərawa ndaw me səpey tsəveɗ a neney hay, ma da hətata da Zeruzalem.

⁶ Andza i daway aha ka tsakay tsəveɗ, i husey aha a Damas ana na, ma wuzla rəpas, dekeslef i da sərafa na, waw ma tek ana gədaŋ aha, a sawa da 'ərlam ma sahətaya ta me wezley dey ŋga.

⁷ I ma təɗey ka dala, arka i ma tsənada vəɗe ma ɗay ma ləvaya: ‹Sawl, Sawl, ka kadaya tatakoy na ka mey?›

⁸ I me mbəɗey kava: ‹Ɗagay kah ana na way, Bay’ərlam a ɗaw?› Vəɗe ma ɗay ana ma mada sa: ‹Yah na Yezu, ndaw Nazoreŋ. Ka key tatakway na, ta yah.›

⁹ Ndaw ma kəsadəmaya na hay na, ka nəkadama waw ana ba, amana, ka tsənadama vəɗe ma ɗay ana, ma tseyawa guma na, tikay.

¹⁰ I me tsəhey: ‹I ka key na teŋgey, Bay’ərlam a ɗaw?› Arka Bay’ərlam ma mbəɗafiyawa kava: ‹Lətsey, daway a Damas, da huɗa na, a da ɓadəmaka mber ana ma vəla ha, na ŋgeɗek ana.›

¹¹ Andza me wezley dey ma waw ana, ma wuləfaya dey ba na, i da daway a Damas na, ndaw ma kəsadəmaya na hay, ma zəgafəmaya har.

¹² Da huɗa na, ndaw ana daha a zəlamar Ananiyas, ma ɗamara ’ar aha, a tsənar sləmay a mewey, mendzey ŋga ta tek aŋga me key na, a datar 'ar a Zuif hay ma ndza hiya da huɗa na.

¹³ Ŋga ma sawa, ma ndzafaya, ma ləvaya tok: ‹Sawl malam a ɗaw, nəkada dey ka dəba.› Arka, ka slam ana tsana, i ma nəkada dey.

¹⁴ Ŋga ma ləvaya: ‹Bay ma Bəla ma baba lakwa hay ka gaɗəmaka ba, ma kah ka sərada tek aŋga me wuɗey na, ma kah ka nəkada Ndaw dzerey ana, kah ka tsənada vəɗe ma ɗay ŋga,

¹⁵ ma kah ka da tərey ndaw seydewe ŋga ha, ka slam dey ma ndaw hay tabiyaha, ma tek ana kah ma nəkada na, ta na ma tsənada na.

¹⁶ Ka rey ləma ka mey sa mey? Ndzefey me dzuhəɓey bəse, bəzləma meŋgəsey ɗek hay ba ta ma zəla mezəley ŋga.›

¹⁷ Andza ma mawa ɗaw a Zeruzalem, pas asləta i ɗuley aha mey da 'Ay me key Kuley na, tek ana ma nəkaya a dey.

¹⁸ Arka i ma nəkada Bay’ərlam ma ləvaya: ‹Bəse, bey ba da Zeruzalem, ka rey ləma zlay, hərway a da təɓama ha seydewe ɗek ana, ma da kaya na kakay.›

¹⁹ I me mbəɗey kava: ‹Bay’ərlam a ɗaw, a səradama dey ta kava, yah na ndaw aŋga na ma həlata da 'ay me ɗuley mey hay, ma kuiyadata ndaw me pey 'ar ka kah ana hay a daŋgay ana, ma kəɗata ta lagwada na seŋgey.

²⁰ Andza a kəɗama Etiyen, ndaw seydewe ɗek vagay aha na, yah tiyatsa na, i daha ka slam ana, mey la asləta andza ndaw ma kəɗama na hay, i ma hutafatara ka zana ta na hay.›

²¹ Ama ŋga ma ləvaya: ‹Daway, i sləradaka na dəreŋ, 'ar a dala ma ndaw Zuif ahiya kakay ana hay.›»

²² Andza Zuif hay ma dzəkafama sləmay, ha kasl ka bəzay ma guma neney na, ma zlamar me wudey: «Neney na ndaw ma mbəkada ka ndzey ka bəla kakay, me kəɗey ŋga na na, vagay aha.»

²³ Andza a wudam aha, a kəladəmata ha zana ma memeɗ ta hay, a ndzəkam aha hahay a 'ərlam na,

²⁴ bay ma sidzew ana ma ləvatar a sidzew hay ka fuləkwadama a hwaɗ ma 'ay na, ka tsəhafama bəzay ma guma na ta me kəɗey aha, ka səradama bəzay ma guma na ma wudam hərway ŋga na.

²⁵ Andza a dadama ha Pol ma da kəɗey na, Pol ma ləvar a bay ma sidzew temere na: «Bəzey ma dala ma Romeŋ na, mandzara ka kadəmara sariya ŋga na tsana, slam har a kwar daha ma kəɗa ta laway ɗaw?.»

²⁶ Ka guma neney na, bay ma sidzew temere na, ma daway ka tsakay ma bay ta ɗuhwa na, ma da ɓadara, ma ləvar: «Akwa ka da key eɗey na mey? Ndaw a neney na, ndaw romeŋ.»

²⁷ Bay ta na hana na ɗuhwa na ma sawa ma tsəhafa ka Pol: «Äadaya ɗagay, kah na, ndaw Romeŋ dərka na ɗaw?» Pol me ləvey: «Ayaw.»

²⁸ Bay ta na hana na ɗuhwa na me ləvey sa: «Yah na, i haɗəka na ta sumkwo na ŋga na haɗadzaydzay ana, ma da tərey ndaw Romeŋ ana na.» Pol me ləvey: «Yah na, a yadəmiyawa na da hwaɗ.»

²⁹ Ndaw ma wuɗam ma da kadama tatakway ana hay na, ma mbəkadama ŋguɗek; andza bay ta a hana na ɗuhwa na ma tsənada a da dzuwey ta megesele na ndaw romeŋ na, ŋga me wesey.

Pol ka slam dey ma Sanedreŋ

³⁰ Ma medew ana, ŋga ma dzala, a sar ŋga ka sərada dərka na, Zuif ana hay a kamar a Pol na ka mey na, ŋga ma ləvey ka tsukwadəmara megesele hay ba; arka na ŋga ma tsəhadata ’ar ta Baba ɗuhwa na me key kuley ana hay, ta Sanedreŋ tabiyaha, arka ma hərɗada Pol ka slam dey ta.