Mber 10 - MEY HAYNA WAYNA MA YEZU KRISTE MA MEVEY

Piyer ta Korney

¹ Ndaw ana daha da Sezarey a zəlamar Korney, ŋga bay ma sidzew ma Romeŋ hay, a wey sidzew hay temere, matsakay ta na na, a zəlamar ‹Italik.»

² Da maɗamara ’ar aŋga ta me wesey ŋga ta Bay ma Bəla, ta ndaw ma 'ay ŋga hay dzay ana na, ŋga ma wura har aha a səkway ma Zuif hay, a zəla Bay ma Bəla ka vaw zarra.

³ Pas asləta ma ndzemdey makar ma hakwaɗ na, ŋga ma nəkada madurlam ma Bay ma Bəla ma ɓar vaw ndar ndar, a fuləkwey aha a 'ay ŋga, ma zəla: «Korney!»

⁴ Korney ma zazura ta mewesey aha na, ma mbəɗar kava: «Mey, Bay’ərlam a ɗaw?» Madurlam ma mbəɗar kava: «Me ɗuley mey ɗek, ta ma wura har eɗek a ndaw hay ana na, ka səram ba ka slam dey ma Bay ma Bəla.

⁵ Ekəɗey na, slərey ndaw hay a Zopey, ka da zələmərawa ndaw ana daha, a zəlamar Simoŋ, na ma zəlamar Piyer ana.

⁶ Ŋga ma ndza ha da 'ay ndaw ana daha a zəlamar Simoŋ satsa, a key mber ma mbal, 'ay ŋga na na, ka mey ma bəlay.

⁷ Andza madurlam ana hana, ma tsar guma na ma zəɗafa ba ka slam dey ŋga na, Korney ma zəlawa ndaw ma 'ay ŋga hay tsew, ka zəgawa sidzew ana daha a pey 'ar bəzakakay, ka ndzəmawa ba ka vaw haɗadzidzay da mber aŋga.

⁸ Ma ɓadatara tek ana tabiyaha na, ma sləradata a Zopey.

Tek ma nəkar a dey a Piyer da Zopey

⁹ Andza ma medew ana taya ka tsəveɗ, a husam aha a wuraw ana na, Piyer na ka tsəley ba ka 'ar ma 'ay ma papaya ha, ma da ɗuley mey, pas a key wuzla rəpas.

¹⁰ Amana, may a tsafaha, a wuɗey me zəmey tek. A tamar aha tek me zəmey, tek ma ɓar vaw.

¹¹ Ŋga ma zazəra ndasl ma 'ərlam ma wura ha, tek ana daha ma harɗawa, ndaw a sərada mewey ŋga na kakay, tek ana andza petəle ɗuhwa ha, tsakay ŋga na hay faɗ ma zəga hiya, me ndzey ka dala.

¹² Da huɗa na, gənaw ma ley hay tabiyaha: tek na sek faɗ ana hay, na ma vam ta hwaɗ ka dala na hay ta na ma tsəvey ta 'ərlam ana hay.

¹³ Vəɗe ma ɗay ma tsərawa guma: ‹Arka tok Piyer! Kəɗey na, pəɗey.»

¹⁴ Piyer me mbəɗey kava: «A key vaw kakay, Bay’ərlam a ɗaw, hərway da mendzey ɗaw na, i ka zəmey tek me key tsatsaŋ ana tikay, kwa na me zləɓey ndaw ana kakay!.»

¹⁵ Arka vəɗe ma ɗay ma tsərawa guma dey metsetsew ana sa: «Tek na Bay ma Bəla ma nəkafa andza ma bazləma ha na, ka da nəkafa andza akey tsatsaŋ zlay!»

¹⁶ Ma mada andza ha dey makar, arka tsa na tek ana hana na, me tsekefey təŋga a 'ərlam.

¹⁷ Arka Piyer me yey vaw ma dzada ma wandzalada ka 'ar vaw ŋga na, ɗagay tek ana ŋga ma nəkada na a ɓey na mey, ɗerre da har ana na, ndaw ma Korney ma sləraɓa na hay taya ka mey mambaw, a tsəham aha 'ay ma Simoŋ na ka sləna ɗaw?

¹⁸ Taya na ma tsəham ta ma gəla ha, ma zəlam, ma aza ka səradama Simoŋ ana ma zəlamar Piyer ana na, mbəlak ma 'ay ana dərka na ɗaw?

¹⁹ Piyer na, re ma dawara ha, me dzeley 'ar ka tek aŋga hana na, ma nəkar a dey ana mba. Ama Mesəfrey ma ləvar: «Nəkafa ndaw hay daha tsew, a səpəmaka ha.

²⁰ Herɗey bəse bəse, dawam dzaya, ka da kaka da 'ar zlay, hərway ma sləradatərawa na yah.»

²¹ Piyer na, ma harɗawa, ma ndzafata ndaw ana hay, ma ləvatar: «Yah ekəɗey, yah na ndaw ana kuray ma səpam ana, ɗagay ma sawa kwar ana na, ka wuɗam na mey?.»

²² Taya ma mbəɗamar kava: «Ma sləradandərawa na, Korney, bay ma sidzew hay temere, ndaw dzerey aha, a wesey ta Bay ma Bəla; zuif hay tabiyaha a ləvafama na, waya ŋga na ŋga ndaw haya bəza kakay. Madurlam kokwoɗ ana a ləvar akwa na, ka ŋgələmaka a 'ay ŋga, ma ka da pafəmaka sləmay, ka guma ɗek ma da tsey ka tek ma kawa na hay.»

²³ Arka Piyer ma ŋgəlata a 'ay, ma da wafata vaw tok. Ma medew ana tsana, ma dawam dzaya, malam hay daha nekəɗey da Zopey ma kəsadəmata.

²⁴ Arka ma zaŋgar aŋga na na, taya ma husam a Sezarey. Korney tey na, a patar aha dey. Ŋga ma wunata ndaw ma 'ay ŋga hay, ta dzam aŋga ma pəɗey mevel ana hay.

²⁵ Andza Piyer me husey na, Korney ma daway ma da zlam 'ar, ma kəley ka slam sek aŋga, ma hasəkadara bəzay.

²⁶ Piyer ma ləvar: «Lətsey! hərway yah ana na, ndaw tiyatsa.» Ŋga ma dzəna ma lətsada.

²⁷ Arka taya ma tsam guma paɗ tsəveɗ, ma fuləkey a 'ay, ma ndzafata ndaw hay ma kusa hiya haɗadzidzay.

²⁸ Ŋga me ləvey: «Ka səradama ha seŋgey, ka ndaw zuif na, tek haya kakay aha me dzəmey vaw, dakay na a debeley vaw ta ndaw da ’ar bəla na, ama a yah na, Bay ma Bəla ka ɓadaya ba, ɗaɗa ndaw ka bəla a key tsatsaŋ dakay na ma zləɓa ha na, dakay.

²⁹ Nəkafa ekəɗey kah ma zəliyawa, i ka kawa mazəzaŋ kakay na hərwuiya, i tsəhey ekəɗey na, ɗagay ka zəliyawa na, lebere mey?»

³⁰ Arka Korney me mbəɗey kava: «Kekey ekəɗey meney makar, ɗerre andza neney, ma ndzemdey makar ma hakwaɗ na, i ɗuley aha mey da mbaw. Arka tsana, ndaw ana daha, ta zana ha ka vaw a wezley dey ma ɓaya vaw.

³¹ Arka ŋga ma ləvaya: «Korney, me ɗuley mey ɗek ana na, ka tsəney ba, har eɗek ma wurey ana na, ka nəkey ba ka slam dey ma Bay ma Bəla.

³² Slərey ndaw a Zopey, ka wunəmərawa Simoŋ na ma zəlama Piyer ana, ŋga da 'ay Simoŋ, ndaw me key mber ma mbal, 'ay ŋga na na, ka mey ma bəlay.

³³ Arka tsana, i ma sləraɓa ndaw hay tsa, arka ta Kokwoɗ eɗek na, kah ka husawa ba, ka tsakay ɗaw dərka na. Ekəɗey na, la ma tsəha 'ar aya tabiyaha ka slam dey ɗek, ma da paka sləmay tabiyaha, ka guma ma Bay’ərlam ma tsəkawa, ma da tsandar ana.»

Guma ma Piyer da 'ay Korney

³⁴ Arka Piyer ma wurey mey me ləvey: «Ekəɗey na, i ka sərada tsoy dərka na, Bay ma Bəla na, a weley ndaw tikay.

³⁵ Da mendzey ma ndaw ma dala hay tabiyaha na, kwa way way ma wasada, me key dzerey na, a ŋgəlama mambay aha ka tsakay ŋga.

³⁶ A sləradatərawa guma ŋga na a ndaw ma Israyel hay: Mey Hayna Wayna ma zozoy, ta har ma Yezu Kriste, Bay’ərlam ma ndaw hay tabiyaha.

³⁷ Ka səradama ha tek ma ɓəladata ndaw ma Zudey hay tabiyaha; a zlədrawa na ta Galiley, a dəba ma Zaŋ ma tələkada mey ta ma dzuhəɓey;

³⁸ Yezu ana ma sawa da Nazaret, ka səradama ha andza ma Bay ma Bəla ka kafa zeheɗ ma mal ba ta Mesəfrey Kokwoɗ ana, ta maram aŋga ma slafa tabiyaha na; da me həley ŋga na, ŋga ka key hahaya ba a ndaw hay haɗadzidzay, a ndaladata ndaw na setene ma kadata beke na hay ba tabiyaha, hərway Bay ma Bəla ŋga ta ŋga.

³⁹ La neney na, ndaw seydewe ma tek aŋga na hay, me key ka dala ma Zuif hay ana, ta Zeruzalem adzay. Ma zəɗadəmara 'ar ba, ta ma daradama ka 'ar ma tuwaw.

⁴⁰ Bay ma Bəla ma mbəladərawa da meney ma makar ana, ŋga ma vəlar gədaŋ ma ɓada vaw ŋga.

⁴¹ A ɓar vaw na a səkway tabiya ha kakay, amana, a ndaw seydewe ma zəlaya zla ka vaw ta har ma Bay ma Bəla ana. A la neney ma zəmawa tek, ma səmawa tek dzaya, a dəba ma ma mbəlawa ŋga da walaŋ ma ndaw ma mətsa na hay ana.

⁴² A dəba na tok na, ma ləvandərawa ma la ka taləkadama mey a səkway, ma la ka kama seydewe na: Bay ma Bəla a pey ma da key sariya ma ndaw ta dey ana hay ta ndaw ma mətsa na hay na ŋga.

⁴³ Ndaw sek hay a kəmawa seydewe andza neney na ka ŋga: «Me sey yam ka meŋgəsey hay na, ma vəla ha na da Mezəley ŋga, kwa way way me pey 'ar ka ŋga na.»

Ndaw zuif ahiya kakay ana hay, a ndzafam Mesəfrey Kokwoɗ ana

⁴⁴ Andza Piyer a təkəradatara ha tek a neney hay ma kəmawa na mba na, Mesəfrey Kokwoɗ ana ma harɗafatərawa ka ndaw ma pam sləmay ka Guma ma Bay'ərlam ana hay.

⁴⁵ A da key na, tek ana a rəzley ndaw, da walaŋ ma ndaw ma pam ’ar ana ma sla kuɗey ana hay, ma kəsadəməraɓa Piyer ana: ekəɗey azlakwa na, Mesəfrey Kokwoɗ ana ma vəla ha ba, ma pa mey aha ha kasl ka ndaw ma dala na Zuif ahiya kakay ana hay.

⁴⁶ Hərway a tsənadəmata a tsam aha guma ta mey hay gəle gəle, a səmbərama zozom ma Bay ma Bəla. Arka Piyer me ləvey sa:

⁴⁷ «Ndaw a slafa ma təkata me dzuhəɓey da yam, ndaw a neney hay ma ndzafam Mesəfrey Kokwoɗ ana, kal kal andza lakwa na ɗaw?»

⁴⁸ Ŋga vəley slam har ka dzuhəɓadəmata, ta mezəley ma Yezu Kriste. Arka taya ma tsəhafama ma ŋga, ka ndzey ta taya adiya meney nekəɗey.