Apokalis 4 - MEY HAYNA WAYNA MA YEZU KRISTE MA MEVEY

Koriwal ma Bay ma Bəla ta kuley na ma kam da 'ərlam ana

¹ A dəba na na, i ma nəkada mambaw ma wura ha da 'ərlam. Arka vəɗe ma ɗay ana tsəfəmey ana, i ma tsənadərawa andza tolom ana ma ləvaya: tsəlawa ka sləna, aza i da ɓadaka tek na ma da key a dəba na.

² Arka tsa na, Mesəfrey ana ma zəgaya, arka i da nəkada na, Koriwal ma bay ma pa ha da 'ərlam, arka ndaw mandza ha ka koriwal ana.

³ Ndaw ana ma ndza ha kava, a nəkey andza ŋgwa na daha a zəlamar zaspe ta sarduwaŋ. Kwalay ma ɗawala koriwal ana, me wezley dey ŋga na a nəkey andza ŋgwa na daha a zəlamar emerod.

⁴ Koriwal andza ma bay kokurow tsew kava faɗ ma ɗawalama na hana na, da koriwal ana hana hay na, ndaw ma səka na hay kokurow tsew kava faɗ, ma ndza ahiya, ta zana babara ahiya ka vaw, 'ar ata na hay ma vaha ahiya ta gura.

⁵ Da koriwal ma bay ana na, me weteɗey ma yam ma bəmawa, vəɗe ma ɗay ta me rəvey ma yam ma bəmawa da huɗa. Petərle hay tsəla ta waw ahiya kava, a təɓam aha ka slam ma koriwal ana. Na ŋga na hay na, mesefərey ma Bay ma Bəla na tsəla na hay.

⁶ Ka mey dey ma koriwal ana na, bəlay ma yam ma tek ana daha, a wezley dey andza zay pas. Da wuzlah ma koriwal ma bay ana na, ma ɗawala ha ta gənaw hay faɗ, vaw ta hay tabiyaha ya dey ahiya, ta mey dey ta dəba adzay.

⁷ Gənaw ana tsəfəmey ana na, a nəkey andza mabar, na ma tsetsew ana a nəkey andza gusaŋ ma sla, na ma makar ana na, mey dey ŋga na andza ma ndaw, arka na ma faɗ ana na, a nəkey andza matsav a tsəvey aha.

⁸ Gənaw ana hana faɗ ana hay na, ta gurɓasla ahiya mukwa mukwa, dey hay tabiyaha ma tsəɓa hiya teleleview ta hwaɗ ana, dəvaɗ ta rəpas adzay na, a mətsamar har ma tələkey mey kakay, a ləvam: «Kokwoɗ, kokwoɗ, kokwoɗ, Bay’ərlam Bay ma Bəla ma slafa tabiyaha na, Ndaw na ŋga daha zla ekəɗey kakay ana, ŋga daha ekəɗey ana, ma da sawa na!»

⁹ Andza gənaw ana hay a hasəkadəmara ha bəzay, a səmbərama ha, a ma dəmara ha sise a Ndaw ma ndza ha da koriwal ma bay ana, a Ndaw aŋga na ta dey ana ka mevey temere ka mevey temere na.

¹⁰ Ndaw ana hay ma səka na hay kokurow tsew kava faɗ ana, ma gərdam ka slam dey ma Ndaw ana ma ndzaha da koriwal ma bay ana. A namar dəba a Ndaw ŋga daha ta dey ma mevey temere ma mevey temere kwaza ha na, a kuyada ma lapan ata, ka mey dey ma koriwal ma bay ana, ta me ləvey aha kava:

¹¹ «A kah na təɗe, kassla, Bay’ərlam, Bay ma Bəla la, kah ndzefey maram, ma hesəkey bəzay ta ma slafa, hərway ma katərawa tek hay tabiyaha na kah, kah ka wuɗey ba ka kam andza ha, arka na ma ka ahiya dərka na.»