Apokalis 22 - MEY HAYNA WAYNA MA YEZU KRISTE MA MEVEY

¹ Arka ŋga ma ɓafaya ka wayaŋ yam me vey ana, a wezley dey andza malam. A vawa na da koriwal ma Bay ma Bəla, ta na ma bəzey təɓaŋ.

² Da wuzlah ma slam me tsəhey 'ar ma wuraw ana, ta me wenəkey ma wayaŋ ana da vaw tsew na, vəɗe ma tek me mendzey ma pətsa ha, a yey dey kurow kava tsew, ka kiya ka kiya na a yey bəzey, arka ɓaslah aŋga na na, a nefey ma ndaladata ndaw ma dala hay.

³ Me kəley 'ar a da key dasakay, koriwal ma Bay ma Bəla, ta na ma bəzey təɓaŋ a da kam na da wuraw ana, arka gawla ma 'ay ŋga hay a da kamar kuley.

⁴ A da nəkadama mey dey ŋga na, arka mezəley ŋga a da key ma winda ha ka 'ərdey ta na hay.

⁵ Dəvaɗ a da key aha dasakay, ndaw a da səpey aha waw ma me ley dasakay, kwa ma nəkey dey ma pas sakay, hərway Bay'ərlam Bay ma Bəla a da ɓatar waw ma nəkey dey ŋga, arka a da kam bay na da mevey temere da mevey temere.

I daɓa ha bəse

⁶ Arka ŋga ma ləvaya: Guma neney hay na, kassla dərka na. Bay’ərlam Bay ma Bəla ma mesəfrey ma ndaw sek hay, ka sləradərawa madurlam aŋga ba, ma da ɓadatara a gawla ma 'ay ŋga hay, tek na ma da husawa da bəse neney.

⁷ Nəkafama i daɓa ha da bəse, ndaw ana ma wafa vaw ka guma neney hay da ɗeriwel ma ndaw sek ana na, ŋga da wuiya.

⁸ Yah Zaŋ na i ka tsənadərawa ba, i ka nəkadərawa ba, arka a dəba na i ma tsənadərawa ba na, ta i ma nəkadərawa ba na, i ma nar dəba ma da ɗular mey, ka slam sek ma madurlam a hana na, ma ɓafataya ka tek ana hay.

⁹ Ama ŋga ma ləvaya: ka da key andza ha zlay! Yah na, mandala ma meslərey ɗek, ta malam eɗek hay, ndaw sek hay ta ndaw ma wafama vaw ka guma ma ɗeriwel a neney hay, ka da nar dəba na, sey a Bay ma Bəla.

¹⁰ Arka ŋga ma ləvaya: ka da kəzlada guma ma ndaw sek a neney da ɗeriwel a neney ana zlay, hərway har ana a gurawa ha bəse.

¹¹ Hayna ndaw ana me key dzerey kakay ana na, ka key dzerey ŋga na kakay ana təŋga, ndaw ana ma zləɓa vaw aha na, ka ndzey da ma zləɓa vaw ŋga na təŋga. Ama ndaw ana a key aha dzerey na, ka key dzerey ŋga hay, ndaw ana kokwoɗ aha na, ka key kokwoɗ adiya sa.

¹² Nəkafama i daɓa ha da bəse ɗey, ta masa ɗaw aha da har, ma da vəladara kwa a way a way, kassla andza ma mber aŋga me key ana.

¹³ Yah na Alfa, yah na Omega, ndaw tsəfəmey ana ta ndaw madakwaydok ana, me zley ta me ndəvey.

¹⁴ Taya da wuiya ndaw ana hay ma pərəmata kəlmedzey ta hay ba, ma da ndzafam slam har ka me zəmey bəzey ma vəɗe ma tek me vəley mendzey ana, arka ma da fuləkwam ta mambaw a wuraw ana na.

¹⁵ Da bəla na, ndaw me key tek so ha na hay! ndaw me key hila hay, ndaw me ney ta ndaw hay so ha na hay! Da bəla na ndaw me kəɗey ndaw vagay ana hay, ndaw ma nəmatar dəba a ’ərlam ndəra ta har ana hay, ndaw me wuɗey maləwaɗay ana hay ta ndaw me tsey maləwaɗay ana hay!

¹⁶ Yah Yezu na, i ka sləraɓa madurlam a ɗaw ba, ma da kadakwar seydewe neney ka guma ma Egliz hay. Yah na bəzey ma hwaɗ ma səkway ma David, bamtay ma zlemedew.

¹⁷ Mesəfrey ta kokwa na a ləvam: Sawa! Hayna ndaw ma tsənada na ka ləvey: Sawa! Haɗaw ndaw ana yam a harta ha na ka sawa. Ndaw ana me wuɗey ana na, a ndzefey yam me vey ana ma hayaha.

¹⁸ I ɓada lele kwa a way way ma tsənadata guma ma ndaw sek da ɗeriwel a neney ana: kendzey ndaw ana ka key yam ba adiya na, Bay ma Bəla a da səkadara magədama ma tek a neney ma winda ahiya da ɗeriwel a neney.

¹⁹ Kendzey ndaw ana ka həlafa ba ka guma ma ndaw sek a neney ma winda ahiya da ɗeriwel a neney na, Bay ma Bəla a da həlafara ba ka bəzey ma vəɗe ma tek me vəley mendzey ana, ta wurow ana kokwaɗ ana, na ma winda ahiya da ɗeriwel a neney ana.

²⁰ Ndaw ma təɓa ba na, a ləvey: Ayaw! I daɓa ha bəse. Amen, sawa Bay’ərlam Yezu!

²¹ Hahaya ma Bay’ərlam Yezu ka ndzey ta kuray tabiyaha!