ዔብሬ ዓሶም 8 - Maale New Testament

ዬሱሴ ዓኮ ጫኣቁሞኮ ዼኤፒ ቄኤሴ ማዒፆ

¹ ኑኡኒ ሃሢ ጌስታ ባኮኮ ዼኤፖ ባካ ሃያኬ፤ ዬይያ፦ ጫሪንጮይዳ ዼኤፖ ፆኦዛሢኮ ካኣቱሞ ዖይቶኮ ሚዛቆ ዛላ'' ቦንቺንቲ ዴዔያ፥ ቄኤሴኮ ቢያ ዑሢ ማዓያ ኑኡኮ ዓኣያ ማዔሢ ዛሎ''ኬ።

² ዒዚ ማዻሢ ጎኔ ማዔ፥ ዓፒላፓ ማዦና ማኣሮይዳኬ፤ ዬያ ዓፒላፓ ማዦና ማኣሮ ዾቄሢ ዓሲቱዋንቴ ፆኦሲኬ።

³ ፔቴ'' ፔቴ'' ቄኤሶኮ ዑፃ ማዓ ዓሳ ዶኦሪንታሢ ፆኦሲም ዒንጎ ባኮ ዒንጋኒኬ፤ ዬያሮ ዬያ ቄኤሶኮዋ ፔቴ'' ዒንጎ ባኣዚ'' ዎይቴቴያ ዓኣያ ማዓኒ ኮይሳኔ።

⁴ ዒዚ ሳዖይዳታቴ ቄኤሶኮ ዑሢ ማዒንዱዋያታንቴኬ፤ ዓይጎሮ ጌዔቴ ሙሴ ዎጎ ጎይፆና ዒንጎ ባኮ ፆኦሲም ዒንጋ ሃንጎ ቄኤሳ ዓኣሢሮኬ።

⁵ ዔያታ ማዻሢ ጫሪንጫ ማዺንታ ባኮኮ ኮኦኪንሢ ማዓያና ዬያ ባኮኮ ሺቢ ማዔያኬ፤ ዬይያ፦ ሙሴ ዓፒላፓ ማዢንቴ ማኣሮ ኮሻ''ኒ ጌዔ ዎዶ''ና ፆኦሲ፦ «ዹኮ''ይዳ ኔኤም ጴዼም፥ ኔ ዛጌ ጎይፆ ቢያ ባኮ ኮሺ'' ዛጊ ማዼ» ጌዒ ዓይሤ ጎይፆናኬ።

⁶ ሃሢ ጋዓንቴ ዬሱሴ ፆኦሲና ዓሲናኮ ባኣካ'' ማዔ፥ ጫኣቁማ ቤርታኣስካፓ ባሼ ማዔሢጉዲ ዒ ሃሢ ማዻ ማዻ''ኣ ዔያቶ ማዾ''ይዳፓ ባሼኬ፤ ዬይ ዓርቂንቲ ማዺንታሢ ሚርጌና ኮሺ ማዔ፥ ዒንጊንቴ ሃጊ ማዓንዳ ዎዞ'' ቃኣሎ''ናኬ።

⁷ ዎንዳኣ ጫኣቁሞይዳ ፔቴ''ታዖ ፓጬ ባኣዚ'' ባኣያ ማዔያታቴ ላምዓሳ ጫኣቁማ ሃሢ ኮይሲንዱዋያታንቴኬ።

⁸ ዓይጎሮ ጌዔቴ ፆኦሲ፡ ዴሮ''ይዳ ፓጬ ባኣዚ'' ዓኣሢ ዴንቄሢሮ፥ «ዓካሪ ታኣኒ ዒስራዔኤሌ ዴሮ''ና ዪሁዳ ዴሮ''ና ዎላ'' ዓኪ ጫኣቁሞ ጫኣቃንዳ ዎዴ ሙካንዳኔ፤ ጌዔኔ።

⁹ ዬይ ጫኣቁማ ዔያቶ ታ ጊብፄይዳፓ ኩጮ ዔያቶኮ ዓርቂ ኬሴ'' ዎዶ''ና ዔያቶኮ ዓዶንሢና ዎላ'' ታ ጫኣቄ ጫኣቁሞጉዲቱዋሴ፤ ዓይጎሮ ጌዔቴ ዔያታ ታኣኒ ጫኣቄ ጫኣቁሞ ዶዲ ካፒባኣሢሮ ታ ዔያቶ ቶኦዛዺ፥ ዙሌ'' ዔያቶም ጌሤኔ።

¹⁰ ዓካሪ ሃካፓ ሴካ ዒስራዔኤሌ ዴሮ''ና ዎላ'' ታ ጫኣቃንዳ ጫኣቁማ ያዺኬ፤ ጋዓኔ ጎዳ። ታኣኒ ታ ዎጎ ዔያቶ ዒና'' ጌሣንዳኔ፤ ዔያቶኮ ማሊፆይዳ ታ ፃኣፓንዳኔ፤ ታ ዔያቶኮ ፆኦዛሢያ ማዓንዳኔ፤ ዔያታ ታ ዴሬ ማዓንዳኔ።

¹¹ ‹ፆኦሲ ዔሬ› ጌዒ ፔ ዓጪ ዓሲም ማዖም ፔ ጌርሲምታቴያ ዔርዛንዳይ ባኣሴ፤ ዓይጎሮ ጌዔቴ ዻኮ'' ዓሶ ጌይንታስካፓ ዴንዲ ዼኤፖ ሄላ''ንዳኣና ቢያሢ ታና ዔራንዳኔ።

¹² ዔያቶኮ ዻቢንቶ ታ ዓቶም ጋዓንዳኔ፤ ጎሞዋ ዔያቶኮ ሃካፓ ሴካ ታ ዋላ''ንዳኔ» ጎዳ ጋዓኔ።

¹³ ዓካሪ፦ «ዓኪ ጫኣቁሞ» ጌይፆና ቤርታኣ ጫኣቁሞ ጪንቄያ ማሄኔ ጌይሢኬ፤ ዬያሮ ማዺ ጪንቄ ባካ ቢያ ባይቃንዳ ዎዳ'' ዑኬኔ።