Ìfísɔ̃̀ 6 - Wè-dɔ-wè Dɛɛ

Nɔ́ɔ̀ɓé wà o mìà nì

¹ Nɔ́ɔ̀ɓé, ka bɛ̃̀ɛ̃ kà wɔ̃́ ma ka mìà nì wè là ko Dàa-mì yí zàá, ɓii lɛ wɔ̃́ kɛ-zì kpeĩ ká kɛ ká kɛá kíli.

² “Ì ɓɛ̀lɛyà nɔ i dàa wà i lèe o lɛ̀ɛ.” Lɔ́ɔ̀ɔ yé e kéa lɛ́ e lɔ́ɔ̀ lɛ́ wè-dɔ-wè tóò lɛ à píéa bèĩzɛ̀ káa.

³ Ye lɛ́ e kélɛ̀, “kɛ pɛ séĩ́ é kɛ i mɔ̀ sɛ̀, ɛ̃́ɛ̃́ kɛ í yìì fɛ̃̀ɛ̃̀ kpóṹ làa.”

⁴ Míá ka nɛ́-ye-gɔ̃̀ã̀ ká ɓɛ, yékɛ̀ ká wɔ̃́ kɛ kà nɔ́ɔ̀ nì ká, zi lɛ́ wɔ̃́ è bɛ̀i à mɔ̀ é o wàa à káa píé. Kɛɛ kà o tòlò o kũ̀ gágà wà wɔ̃́ kɛ-zì zɔ̃̀ɔ̃̀ o lɛ̀ɛ ká ko Dàa-mì yí zàá.

Lùò vɔ̀ wà o dàa-mìà nì

⁵ Mia lɛ́ ka lùò vɔ̀ káa, kà mia lɛ́ o ka dàa-mìà nì ká kpóṹ là zèea wéè kɛ. Kà à kɛ túó wà mɛ́ tàle ká. Ɛ́ɛ̃́ kà kɛ zò yiè ká, lɛ̀ zí kà yɛɓo kɛ̀á Kɛ́lɛ̀ì lɛ̀ɛ lɛ́ ɓe.

⁶ Yékɛ̀ ká wɔ̃́ e kéa kɛ yé nɔ́ o nyìɛ, lɛ ka mɔ̀ kɛ ó ka tɛ̀nɛɛ ká. Kɛɛ lɛ̀ lɛ́ ka Kɛ́lɛ̀ì là lùò káa, kà wɔ̃́ lɛ́ Wálà à nàà ká kɛɛ sí ka gé, káà à kɛ̀.

⁷ Kà ka zì kɛ̀ lùò káa mɔ́ɔ̀ yɛɓo kɛ géli ká, lɛ̀ pɛ lɛ́ ka wá yɛɓo kɛpìà mia lɛ̀ɛ, kɛɛ káà kɛ̀ ko Dàa-mì lɛ̀ɛ.

⁸ Kà à yí dɔ kélɛ̀ ko Dàa-mì lɛ́ɛ̀ lo mi fɔ́nɔ́ nɔɔ̀ yɛɓo yiè lɛ́ mi ɓà kɛ̀ɛ wɛ̃́ĩ̀, yé bɛ̃̀ɛ̃ i lùò ká ɛ̃́ɛ̃́ í gɔ̃̀á bɛ̃̀ɛ̃ kɛɛ̀ à káa ká.

⁹ Lùò dàa-mìà, ka bɛ̃̀ɛ̃ kà wɔ̃́ nɔ́ doóa kɛ kà lùò vɔ̀ ká. Kà tèá vùù mɛ̀ o mɔ̀ ká. Kà à yí dɔ kélɛ̀ kà kà lùò vɔ̀ ka Dàa-mì lɛ nɔ́ doó, lɛ́ lɛ lɛ̀ía. Lɛ̀ɛ́ mia ɓo mia bà.

Wálà là gèlè-gɔ̃-pɔ̀ɔ̀

¹⁰ Kɛɛ wɔ̃́ɔ líé-nyɛ-mɔ̀ lɛ́ e kélɛ̀, kà ka zì yíkɛ̀ gágà mɛ́ kɛ é kɛ gágà ko Dàa-mì yí zàá, à zì yíkɛ̀ gáàa mɛ́ gágà zɛ̀ ɓɛ kolo là.

¹¹ Kà gèlè-gɔ̃-pɔ̀ɔ̀ séĩ́ lɛ́ Wálà à nɔ ka lɛ̀ɛ kɛ ka mɔ̀, kɛɛ bɛ̀i é kɛ ka mɔ̀ ká tó dɔ̀á ka dɔ̀lɔ̀ mɔ̀ yé Dɛ́ɓò zì kpàlà-kpáláa aà nuá ka mɔ̀ɔ ká.

¹² Ƃii ko wá gèlè gɔ̃pìà mia gbunu ká. Kɛɛ kóò gèlè gɔ̃ pɛ yɔɔ vɔ̀ kù lɛ́ o lɛ̀ séĩ́ mɔ̀ lɛ̀ía ká. O lɛ́ o kélɛ̀, pɛ yí gáàa zɛ̀ wà yíkɛ̀ gáàa nì, ɛ̃́ɛ̃́ zeĩ́, mia lɛ́ o kpóṹ là zèe líé-sí-mìà ká lúó lɛ́ bĩ́ míì lɛ à ká e kéa káa.

¹³ À mɔ́ɔ̀ wɔ̃̀ mɔ̀ɔ, kà Wálà là gèlè-gɔ̃-pɔ̀ɔ̀ sí. Yé aà kɛ kília, yé lúó yɔɔ aà nua, bɛ̀i lɛ́ɛ̀ lo kɛɛ̀ ka mɔ̀ kɛ ká dɔ ka dɔ̀lɔ̀ mɔ̀ gɛ̃ĩ le, káà gèlè gɔ̃̀. Ɛ́ɛ̃́ yé gèlè e kília kaà nyɛ à gɔ̃ɔ̃̀ mɔ̀ɔ, káà lo kɛɛ̀ tĩã́ dɔ̀á ka dɔ̀lɔ̀ mɔ̀.

¹⁴ À mɔ́ɔ̀ wɔ̃̀ mɔ̀ɔ, kà dɔ ka gã̀ mɔ̀. Sɔ-là-ɓɛ̀lɛ̀ lɛ́ è lo kɛɛ̀ dɔ̀á ka gbĩĩ́a, è kɛ wánà-wɔ̃̀ ká. Kà wɔ̃́ kɛ̀ kpeĩ zì dà ka mɔ̀, kɛ é kɛ ka zò-là bĩ̀ĩ̀-pɛ̀ ká.

¹⁵ Ka dìè pɛ̀ lɛ́ kà kɛ̀, kɛɛ ká ló wɔ̃́ làṹ yiè lɛ́ à gbɛ̃̀ɛ̃̀ lɛ zò-yà-gé mɔ̀ɔ gèeèa, è kɛ ka gã̀-mɔ̀-bàá ká.

¹⁶ Lúó séĩ́ káa, kà lo zò-dɔ̀à-mɔ̀ ká, kɛ é kɛ pɛ lɛ́ è lo gèlè-gɔ̃-làà tèáà nù ka mɔ̀ pìàa ká. Yé aà kɛ ka kɛ̀lɛ̀ɛ, bɛ̀i lɛ́ɛ̀ lo kɛɛ̀ ka mɔ̀ kɛɛ ká kĩ̀ã̀-wɛ́lɛ́ séĩ́ lɛ́ tíé lɛ à lé, lɛ́ Kɛ-pɛ̀ Yɔɔ Kɛ-mì à dùò áà nù ka mɔ̀ɔ, númíì à ká.

¹⁷ Kà la-ɓo sí, ká yà ka wĩĩ́ ka zì gèlè-gɔ̃ gbàlá ká. E bɛ̀i, kà Wálà lé-wè sí, é kɛ gèlè-gɔ̃-làà lɛ́ Gɛ̀ɛ̀ Púlú à nɔ ka lɛ̀ɛ ká.

¹⁸ Kà sɛ̀nɛ ɓo kɛɛ Wálà é gbũ ka mɔ̀ wɔ̃́ e kéa séĩ́ kɛɛ̀ yí. Kà sɛ̀nɛ ɓo lúó séĩ́ ká yé Gɛ̀ɛ̀ Púlú aà kɛ ka píéa ká. Wɔ̃́ e kéa mɔ́ɔ̀ wɔ̃̀ mɔ̀ɔ, kà yà ka nyìɛ́, yékɛ̀ ká kɔ̃́ zi mɔ̀. Kà sɛ̀nɛ ɓo teele Wálà là mia nì séĩ́ mɔ́ɔ̀ wɔ̃̀ mɔ̀.

¹⁹ Ɛ́ɛ̃́ kà sɛ̀nɛ ɓo ma bɛ̃̀ɛ̃ m mɔ́ɔ̀ wɔ̃̀ mɔ̀ nɔ́ kíli, kɛɛ yé lúó aà ɓɔ à mɔ̀ kɛ ḿ wééa, é wɔ̃́ m̀ lo à gèeèa nɔ m lɛ̀ɛ, kɛɛ ḿ wɔ̃́ gèe nyìɛ gágà-lɛ̀ ká, kɛɛ ḿ à kɛ mia ó wɔ̃́ lɛ́ lɛ wɔ̃́ làṹ yièa yí, lɛ́ à bĩ̀ĩĩ̀ e kɛá bèĩzɛ̀ɛ, ó à dɔ.

²⁰ Wɔ̃́ làṹ yiè e kéa mɔ́ɔ̀ wɔ̃̀ mɔ̀ɔ, m à mɔ́ɔ̀ Kɛ́lɛ̀ì nyìɛ-wɛ̀lɛ̀ ká, yé bɛ̃̀ɛ̃ m dɛɛ ká bĩ́-kɛ̀ìa ká. Kà sɛ̀nɛ ɓo kɛɛ ḿ à wɔ̃̀ gèe nyìɛ gágà-lɛ̀ ká, lɛ̀ zí máá gèeèáa lɛ́ ɓe.

Wɔ̃́ líé-nyɛ-mɔ̀ wa gèea

²¹ Tíkíkà, lɛ́ e m lèe-gé lɛ́ m̀ lɔ̀ kɛ̀áa ká, lɛ́ e yɛɓo-kɛ-mì zò-dɔ̀à-mɔ̀ zɛ̀ ká ko Dàa-mì là yɛɓoa yía, lɛ́ɛ̀ lo wɔ̃́ séĩ́ lɛ́ à gbɛ̃̀ɛ̃̀ lɛ m mɔ̀ɔ, wɔ̃̀ gèeè ka lɛ̀ɛ, kɛɛ ká zi lɛ́ m lópìà à ká líéa dɔ.

²² Wɔ̃́ e kéa mɔ́ɔ̀ wɔ̃̀ lɛ́ m̀ mɔ́ɔ̀ à vɔ ɓo ka píéa. Ḿm̀ nàà kɛɛ é zi lɛ́ ko lópìà à ká líéa, kɛ á wɔ̃̀ gèe ka lɛ̀ɛ, kɛɛ é fã̀ã́-wàà nɔ ka zò lɛ̀ɛ.

²³ Wálà lɛ́ e mia Dàa káa, wà ko Dàa-mì Zízɛ̀ Kɛ́lɛ̀ì, ó zò-yà-gé wà mi lɔ̀-kpɔ̀ mi mɔ̀, é dàá zò-dɔ̀à-mɔ̀ bàa, ó nɔ ko lèe-gé vɔ̀ séĩ́ lɛ̀ɛ.

²⁴ Wálà zì zò-kɛ̀-sɛ̀ è kɛ mia séĩ́ lɛ́ ko Dàa-mì Zízɛ̀ Kɛ́lɛ̀ì lɔ̀ kpɔ́ɔ̀ lɛ o mɔ̀, ɛ̃́ɛ̃́ lɛ́ à lɔ̀ e kília lɛ̀ɛ́ lo kɛɛ̀ wɔ̃́ dà tã́ã̀ zɛ̀ káa, é kɛ o píé.