2 Zɔ̃̀ɔ̃́ 1 - Wè-dɔ-wè Dɛɛ

¹ Má m mi dìè káa, ḿm̀ wèè ɓí i lee lɛ́ Wálà aà i sí, é dàá ɓà nɔ́ɔ̀ nì bàa, ka bà. Ka lɔ̀ kpɔ́ɔ̀ lɛ m mɔ̀ wánà kpó-kpó ká. Ɛ́ɛ̃́ ye wá bɛ̃̀ɛ̃ m doó ká. Kɛɛ ka lɔ̀ kpɔ́ɔ̀ lɛ mia séĩ́ lɛ́ ò wánà-wɔ̃̀ɔ dɔɔ mɔ̀.

² Ƃii wánà-wɔ̃̀ yàlà kṹũ̀ lɛ ko yí, ɛ̃́ɛ̃́ lɛ́ɛ̀ lo kɛɛ̀ ko píé tòá kíli ká.

³ Wálà lɛ́ e mia Dàa káa, ɛ̃́ɛ̃́ Zízɛ̀ Kɛ́lɛ̀ì lɛ́ e mia Dàa ɓɛ Gbe káa, ò zò-kɛ̀-sɛ̀ ɛ̃́ɛ̃́ mia yéĩ̀ kṹũ̀, e bɛ̀i zò-yà-gé nɔ kɔa lɛ̀ɛ. Ò kɛ kɔ̀à pɛ ká wánà-wɔ̃̀ yí, ɛ̃́ɛ̃́ lɔ̀-kɛ̀à-mɔ̀ kolo là zàá.

Wánà-wɔ̃̀ wà lɔ̀-kɛ̀à-mɔ̀

⁴ M géli kɛ kpó-kpó ɓo lɛ̀ lɛ́ m à yí dɔ kélɛ̀ ɓà nɔ́ɔ̀ɔ dò o tópìà wánà-wɔ̃̀ɔ kpáá yía ká, lɛ̀ zí lɛ́ ko Dàa aà gèe kó kɛáa lɛ́ ɓe.

⁵ Kɛɛ màá, ḿm̀ kpé kã i lɛ̀ɛ dɛɛ ká kélɛ̀ kɔa lɔ̀ è kpɔ́ kɔa kíe nì mɔ̀. Wɔ̃́ e kília ye wá lɔ́ɔ̀ dɛɛ ká kɛ ḿ bɛ̃̀ɛ̃ i píé. Lɛ nɔ́ lɔ́ɔ̀ lɛ́ e kɛ nɔ́ ko kɛ̀lɛ̀ wɔ̃́ gã̀-gbɛ̃̀pìàa ká.

⁶ Lɔ̀-kɛ̀à-mɔ̀ e kília yí lɛ́ e kélɛ̀, lɛ à mɔ̀ kó táá Wálà wéè kɛɛ̀ ká. Lɔ́ɔ̀ lɛ́ kaà gbɛ̃̀ mɔ́ à maà ká wɔ̃́ gã̀-gbɛ̃̀pìàa gɛ̃̀ e ké. Lɛ ka mɔ̀ ká táá lɔ̀-kɛ̀à-mɔ̀ kpáá yí.

⁷ Mia bèkɛ̀-ɓo-mìà búnùzɛ̀ lóò lɛ kpóṹ là lɛ̀ séĩ́ mɔ̀. O mia lɛ́ òó gèe kélɛ̀ Zízɛ̀ Kɛ́lɛ̀ì e kpɔ́ mi gbĩ-kpàla yí lɛ́ e nua ká. Mi sùu e kília lɛ́ e mi bèkɛ̀-ɓo-mì ká, ɛ̃́ɛ̃́ lɛ́ e Kɛ́lɛ̀ì Dàa-gbe káa.

⁸ À mɔ́ɔ̀ wɔ̃̀ mɔ̀ɔ, kà ka yɛ́lɛ́ kɛ ka dìè píé, yékɛ̀ ká kɔ̃́ pɛ lɛ́ kaà à yɛ̀ɓo kɛɛ yí ká, kɛɛ ká ka fɔ́nɔ́ lé paàa zɛ̀ɛ sɔ̀lɔ̀ ɓo.

⁹ Mi nɔ́ɔ fé lɛ́ lɛ̀ɛ́ Kɛ́lɛ̀ì zì pɛ-zɔ̃̀ɔ̃̀-kɔ̀ doóa kṹ e zɔ̃̀ɔ̃̀ ká, tó áà lò e zì dàá bàa, kɛɛ là pɛ wá Wálà ká. Kɛɛ mi lɛ́ è pɛ-zɔ̃̀ɔ̃̀-kɔ̀ doó e kília kũ e zɔ̃̀ɔ̃̀ káa, kɛɛ mia Dàa wà e Gbe o à kɛ̀lɛ̀.

¹⁰ Yé lɛ kília, yé mi dò aà nu ka píé lɛ́ lɛ̀ɛ́ nu pɛ-zɔ̃̀ɔ̃̀-kɔ̀ e kéa káa, yékɛ̀ ká ka kɔ̀ yà à wì ka píé kɛ́ì. Yékɛ̀ bɛ̃̀ɛ̃ ká à vùò-wè gèe.

¹¹ Ƃii mi nɔ́ɔ fé lɛ́ è lo à vùò-wè gèeèa, kɛɛ wà à ye waà dɔ wɔ̃́ yɔɔ lɛ́ è à kɛ̀ɛ yí.

Wéé líé-nyɛ-mɔ̀

¹² Wɔ̃́ búnùzɛ̀ lɛ m lé ḿ gèe ka lɛ̀ɛ. Kɛɛ m̀ḿ naa ḿ gèe kii-lɛ́ɛ́ wà pɛ̃́ɛ̃̀-yíí ká gbaa. M zò lɛ à mɔ̀ kɛ ḿ nu ka píé, kɛɛ kɔ̀à ɓi nì kɔ́á wéé kɔa kíe lé, kɛɛ kɔa zì géli lé kpó-kpó é pa.

¹³ I lèe-gé lee zɛ̀ lɛ́ Wálà aà sía, là nɔ́ɔ̀ óò wèè i bà.