Mboe 8 - Mbula

Iti tomtom pareiŋanda ta Anutu ikam ŋgar biibi piti?

Mboe ki Dabit

¹ O Yooba, Merere tiam, zom biibi ta swe ma irao toono kek. Mi mburom ma mbulu ku ndabokŋana ramaki azuŋka ku, ta ilol saamba ma imap.

² Nu ur zin naŋgaŋ munmun mi pikin siŋsiŋŋan be tiwit urum mi tiswe mburom. Naso pumun kom koi bizin kwon, mi kam zin wal zorzooroŋan ma tiur nin.

³ Nio sombe motoŋ sala pa saamba mi aŋre la pa nomom muriini— puulu ma pitik ta munŋaana men ta ur zin ma tirao murinmurin,

⁴ na aŋso ta kembei: “Wai! Niam tomtom toono koyam na, koroŋ sorok. Parei ta nu kamam ŋgar biibi piam? Mi motom iŋgalŋgal yam paso?”

⁵ Mi nu ur yam irao itum ruŋgum, mi kam yam ma ambot la nu itum tamen kopom mbarmaana. Mi pakur yam mi wit zoyam ma isala kor.

⁶ Pa koroŋ boozomen ta ur zin na, nu ur mar nomoyam be amboro. Koroŋ ta munŋaana men imap imbot la niam tomtom kopoyam mbarmaana.

⁷ Zin sipsip ma makau, mi buzur kar kan mi su kan ta boozomen.

⁸ Mi man ta tirie sala maŋaanaŋana na, mi ye ramaki koroŋ boozomen ta tiwwa pa tai leleene na. Koroŋ ta munŋaana men tana timap timbot la niam tomtom kopoyam mbarmaana.

⁹ O Yooba, Merere tiam, zom biibi ta swe ma irao toono kek.