Titus 3 - Muklom

Phong miq dangjang

¹ Jaktáng o shingtey tang etho authority tang jakkhung o tong ma etho ning raaqkhat tat ma etho thaji jaqhal jaksom rangma kacha angma miqtang ma tasik bat u.

² Utang ma tho tashit raaq ching ang moq; etharin tinin eq juntey jamoq karok kara ang ching etho thaji miq jamoq tinup eq cham tong aa.

³ Hiqtang tho jakho o thunghung, raaq tatmoqtey etho aja somtey angti. Etho hangam ramcham danjang eq bukjam taphi etho ngeljo ngikjuk na ashey eq ashey ma tha miiksuk eq tongti.

⁴ Etharin hiqtang Thaluntey Shkewa tinin nia tinmat miq ma takhi ta tho,

⁵ piq aa hiqtang sha thalun taphi. Ira hiqtang jaqhal jaksom tungkang o ang moq, etharin piq tinshit o thalun taphi, esha Asang Tsija tungkang o ang aa, barey hiqtang sha tasang eq anal rollung kot aa.

⁶ Shkewa eq, hiqtang Thaluntey Jesu Khristo tungkang o Asang Tsija sha kot aa,

⁷ irimal ang eq hiqtang piq ráng manchan wang Shkewa jakhona asing miq angni etho hiqtang aa bara tungmang ti eshi pattuk rollung sha kapni.

⁸ Ira asing raaq. Nga tathin ang, iri tung aa raaq raa nang aa aching eq bat ching, irimal ang jo barey Shkewa o han aa, ning aa jaqhal jaksom na rangham tatham na. Iri raaq raa thaji rangtán ma rapney jaqhal.

⁹ Etharin thanghung thadan wang, tey aa wa tang tung aa raaq wang, thamol wang, etho thong tung aa raaq thadan wang alo na tong inn, chammatakoi eshi tang sha thanghung etho jaksom qhaq moq.

¹⁰ Raaq takhongtey nia miq taphaltey ma jukshey jukni tatal kot u, eshi jio ning wang adak eq tong inn.

¹¹ Irimal miqtang sha chungtik angta etho ning ni ning ngarey wang ning sha aja ta takhi aa.

Uthun raaq

¹² Nga ba jam náng Artemas tia Tychicus sha takat phang jo, Nicopolis haq na irelnáng katma kacha u chammatakoi nga eshina haqqhuq tok o tong ma tathin táng.

¹³ Zenas khaphung tey etho Apollos lampak nong rangma tathin inn etho ning ma thaji tangwang akum ang ching ang moq.

¹⁴ Hiqtang miq shey jaqhal jaksom shina rangham tatham ma, etho barina ràa aa eshina kotma usam eq ching; ning sha thanghung rollung tong ching ang moq.

¹⁵ Bara i jamna, ning aa nang ma jaktachap kot aa. Kam na í nokwa tang ma jaktachap kot inn. Nim thaji ma Shkewa ráng manchan cham ang aa.