Titus 2 - Muklom

Asing thung aa tal

¹ Etharin nang aa asing kam alam raaq sha tatal kot ching.

² Tikang tang shima tatal kot u, ning sha thungsik, rangka eq ching, tinthanan tey, kam alam na khakla angtey, tinshittey, etho tinman tey ang ching.

³ Eshimal wiku tang ma tho tatal kot u, ning dangjang sha miq eq rangka eq ching, miq masuq tey, etho kham jatey ang ching ang moq; etharin jaqhal raaq bat kottey ang ching.

⁴ Irimal ang ajo, ning aa kuhan nu tang ma ning ni ning himteywa etho su asa ma tinmat eq ching ta jin batna.

⁵ Ning sha tinman tey, asang eq dangjang tey, him rimtey, numey etho ning ni ning himteywa raaq tattey ang ching, eshimal ang ajo Shkewa raaq sha utang eq tho jin seykham moq angna.

⁶ Irimal hun jaro tang ma tho thungtasik eq tong ma bat ching.

⁷ Thaji na nang ni nang sha jaqhal jaksom na raaq tathaktey ma ang nu; ba raaq tatal sha asing nia arong ang ching,

⁸ miq eq jin seykham ching ang moq raaqsing tatal kot ching, irimal ang ajo ba ralwa tang sha rakri angna chammatakoi ning aa hiqtang ma jashit tung aa raaq bat ching ahung angna.

⁹ Qha tang ma, ning ni ning tangteywa jak khung na tong ma bat u, etho thaji jaksom na ning tasungrang ma bat kot u. Ning raaq sha dan ching ang moq;

¹⁰ etho ning tangwang sha hut ching ang moq, etharin phanrip na jin hanpey eq ching, irimal ang ajo hiqtang Thaluntey Shkewa tung aa raaq sha jaqhal takhi na.

¹¹ Chammatakoi thaji miqna sha thalun ma Shkewa ráng manchan cham takhi aa.

¹² Iri ráng manchan raa, rangwa ma kam alam ahungtey etho hanngam ngikjuk wang tin kaley ma, tinthanan etho asing eq rangwa kàm alam na iri rollung roq tong kat ching.

¹³ Hiqtang sunmaan saal shima hiqtang aa tungmang eq irimal tong ching. Eshi saal sho hiqtang ma ajong Shkewa nia hiqtang Thaluntey Jesu Khristo phun amun sha takhi na.

¹⁴ Hiqtang sha rangnak mong wang thalun ma etho hiqtang ngarey wang tasang ma, piq ni piq tha hiqtang rangma kochak ta. Ethirangma hiqtang sha piq miqtang etho jaqhal jaksom tey angni.

¹⁵ Iri raaq ri tatal kot u, thaji authority som eq, tin tatsan eq etho raaq tatsan eq, ba raaq tattey ma bat u. Utang eq tho nang shi nak cham jin dimnak phu.